Sidra Denominación d'Orixe Protexida (DOP) d'Asturies: Llagar Castañón

Direición: Barrio Los Pisones, 90 - Carretera San Miguel D'arroes - Quintueles - Villaviciosa

Teléfonu: 985 894 576

Web: http://www.sidracastanon.com/
Facebook: https://www.facebook.com/sidracastanon/
Twitter: [@SIDRACASTANON] https://twitter.com/SIDRACASTANON

Instagram: [@sidracastanon] https://instagram.com/sidracastanon/
Youtube: https://www.youtube.com/user/sidracastanon

Finamos el día sidreru visitando una de les esperiencies de SidraTurismu que s'ufierta agora mesmu n'Asturies. Históricamente siempres rellacionamos los llagares de sidra a sitios escuros, húmedos y llenos de trastos; pero nada que ver cola realidá actual. La mayoría les instalaciones modernizáronse (por entamu propio o por imposición de sanidá) pa evitar contaminaciones na sidra y ye raru ver un llagar que nun tea llambíu.

Munchos llagares aprovecharon pa reformase ya introducir una de les propuestes que más aceptación tán teniendo ente les persones que vienen visitanos: el SidraTurismu. El turista cuando vien a Asturies busca sidra, busca tradición, y quier conocer tol procesu ancestral d'ellaboración de la nuesa bébora.

El Llagar Castañón ye un perfeutu exemplu d'ello, con una tradición llagarera na familia dende 1938, en 2011 inauguró unes nueves instalaciones onde pudo aumentar la so producción, y, amás, ufiertar esperiencies de sidroturismu a tol que s'averara pellí

Pa ello, cunten con Marta, esperta en comunicación, que d'una forma bien prestosa va aprendienos tol llagar, esplicándonos el procesu d'ellaboración de la sidra natural: dende cómo se recueyen les mazanes hasta la prueba de la sidra final llista pa vender al públicu.

Y eso fai que puedan introducir nuevos productos y asoleyaos nel mercáu, como nel casu del Llagar Castañón, col so Roxmut, la compuesta de sidra (vermú nun podemos llamalo, yá que nun ta fecho con vinu) que trunfó de forma natural nel mercáu.

Tou ensin que'l funcionamientu del llagar resiéntase, ello ye que la so sidra DOP Val d'boides foi galardorniada como Meyor Sidra DOP 2016.

Amás, el Llagar Castañón ufierta tres esperiencies de Sidraturismu distintes según el tipu de consumidor que los visite:

• La visita guiada, con una duración averada de 45min, onde se va visitar el llagar y podrá bebese sidra direutamente espichada del tonel. Por unos 6€.
• Una visita igual que la guiada, pero añadiendo un pinchín de quesu y embutíu asturianu pa tastiar cola so sidra. Por unos 10€ y con una duración averada de 1h 30min.
• Y la so visita más completa, acompañaos d'un enólogu, onde se va probar sidra de distintos toneles y va aprendese les cualidaes qu'ésta tien de tener de la mano d'un espertu. Por 10€. 

De xacíu, tou con cita previa, sobremanera si ye de fin de selmana y pel branu, yá que se suelen enllenar.

Otru de los usos que se-y ta dando al llagar ye la celebración d'eventos (y bodes) cola posterior espicha nes sos instalaciones. De pie (como ha de ser), espichando direutamente dende un tonel (como ha de ser) y con una degustación de quesos asturianos y productos asturianos de primera (como ha de ser). Con una impresionante sala llena de toneles de madera, y cola presencia de Rodrigo Cuevas, imaxe de la marca DOP, rematamos un día nel qu'aprendimos un montón sobre la sidra, y, sobremanera, sobre cómo ameyorar pa valorar el nuesu productu y vendela.

Tou esto solo por 50cts más la botella. Yo tengo claro qué sidra pidir la próxima vegada, ¿tu?