El Retiro

Direición: Pancar S/N - Llanes

Teléfonu:  985 400 240

Recomendaciones: Menú Degustación

Web: http://www.elretirollanes.es/

Facebook: https://www.facebook.com/El-Retiro-Pancar-
Twitter: [@elretirollanes]: https://twitter.com/elretirollanes
Instagram: [@ricardosotres1]: https://www.instagram.com/ricardosotres1/

Calidá: 5/5

Preciu: 100€

Comentarios: Por fin pudimos probar la última Estrella Michelín en llegar a Asturies (esperemos que nun sía la postrera y qu'anguaño caya dalguna más).

Asitiáu en Pancar, un pueblín cerca de Llanes, nuna antigua casona asturiana preciosa dafechu rehabilitada. Tien un parking propiu un pocu más palantre la casa. Entrar pola parte antigua del chigre-tienda que rexentaba la so familia y que, tres la reforma, sirve pa recibir a los veceros.

Tien dos comedores grandes, con meses amplies y cómodes, abondo espaciaes pa comer tranquilamente, y con dos chimenees na paré qu'ayuden enforma a crear ambiente. Amás, tienen un comedor priváu pa 6 persones. Serviciu rápidu y sollerte.

Tienen carta y dos menúes degustación, ún tradicional, más curtiu, por 45€ yá'l completu, por 85€. Esti postreru foi'l que probemos.

Carta amplia de vinos, onde, POR FIN, atopamos na primer páxina toles referencies asturianes: vinu, cerveza y sidra. Perbién por ellos.

Entamamos colos aperitivos:

Conu de quesos asturianos con mazana y marmiellu. Cruxente con un amestu clásico, pero efeutivo, dientro la gastronomía asturiana. El quesu suave. Mui ricu. 

Croqueta cremosa de xamón. Ensin semeya. Sabemos que Ricardo trabayó en casa Marcial. Asina qu'imaxinaos cómo taben. Dos croquetes, una por persona. Delicioses.  

Mantequilla Casera. Suave y cremosa. Encantónos.

Chorizu Caseru. Nun conocemos la procedencia, pero súponos a gloria. Amás, entre tanto platu "ellaboráu" siempres vien bien una vuelta lo más cenciellu (y ricu) de la vida.

Tortu, verdures asaes y bocarte en vinagre. Otra semeya que m'escapó. Pa tomar d'un bocáu (o dos). Bien ricu. Gana'l bocarte en sabor. 

Bloody Mary con virigüetos. Combinación refrescante pa tomar con cuyar. Templada.

Y pa acompañalos, el nuevu aperitivu de Sidra del Llagar Panizales Viesk, del que yá vos falamos equí. Buenísimo  col toque de naranxa y llimón. Tenéis de probalo. 

Ostra con mazana, alfabaca, llimón verde y xarazáu d'apiu. Un xarazáu estupendu, quiciabes mui fríu pa la integración del platu. Los contrastes na boca son una gociada, y amás gana la mazana yá'l pepinu. Cúntanos Ricardo que les ostres son franceses, un productu con un sabor más nidio  y qu'al nun predominar tantu, fai que pueda amestalo con más sabores.

Virigüetu n'escabeche de perdiz, algues y biltos marinos. Vien acompañáu de delles algues que ye un preste probar por separáu pa probar los sos sabores. Como nos vieron faelo, tráyennos una Fueya de Mar pa que la probemos, y sí, tien un llixeru regustu a ostres. Bien ricu'l platu. 

Consomé de boletus, cebolleta y calamar. Esplosión de testures, sabores (y colores). El caldu espectacular. Amiestu de tierra y mar en perfeuta harmonía. 

Guisu d'oreya asturcelta con carabineru en dos servicios. Una maravía de platu. El sabor del carabineru cola testura la oreya va espectacular. Son estos amiestos raros qu'o encaxen o son un fracasu, y ésti encaxó perfeutamente. Amás, el mueyu la oreya ye una maravía. Encantónos. 

Amás tráinnos la cabeza'l carabineru pa qu'acabamos de rellambenos. Buenísima. 

Foie-gras asáu con llenteyes, anguila y ayu negru. Gana'l caldu la llenteya, que ta buenísimo. Lleva unes esferes de vinagre de módena, l'anguila afumada que cola base de foie ta espectacular. Ún de los favoritos de la comida. Maraviyosu.

Ostra caliente con guisu de callos de bacaláu al curry. Otru de los favoritos de la comida. L'amiestu de testures de la ostra col cruxente la corteza queda xenial. Amás tien un toque picante que-y va xenial al platu. Per bonu. 

Como a Laura siéntan-y mal les ostres, traxéron-y un Salmonete en Mueyu dela so propia Espina. Y yá sabéis que si'l salmonete ye bonu, nun fai falta más ... y ésti lo yera. 

Pierna de venáu bañada en mueyu d'anchoa y nel so propiu zusmiu. Un platu mas contundente, con un venáu que predomina, pero qu'oldea xenial col mueyu l'anchoa. La carne, tiernísima. Dos bocaos, pan, y a esfrutar. 

Falpayar asada con ravioli de caza, apionabo y kalamata. Otru platu xenial. La falpayar persuave, con sabor, pero que complementa. El ravioli ye, a cencielles, xenial, encantónos. Otru platazu. 

De siguío los postres. Foi quiciabes la parte que menos nos sorprendió de tola comida.

Crema de mazanes asaes, yogurth, pan de especies y mazana cocida. Ensin semeya. Combinación de mazana asada y xeláu de yogur. Lo único que nos sobra foi'l cilantro. El xeláu de yogur buenísimo. 

Esponxa de chocolate y café. Espluma de tiramisú y crema d'ablana. Ye como volver a la infancia. Per ricu.

Pa beber, la maravía de Sidra Brut Nature Reserva Práu Monga. Si siguísnos, yá la conocéis de sobra, y si non, yá táis tardando en probala. Ye fina, elegante, va xenial con entrantes y pexes; y amosóse a gran nivel coles carnes. Amás, al tener menos alcohol qu'un vinu, cuando vimos a los "amigos" na rotonda de Llanes nun hubo problema.

Colos cafés, tráyennos unos Dulces de Sobremesa, mui ricos. Un Financier d'Almendra, Galleta de Frutos Secos y Bizcuechu de Chocolate. Per ricos.

El preciu del menú son 85€. Cola Sidra (17€) y cafés y demás, pagamos unos 100€ per cabeza. Tomamos el menú caru, pero nun penséis que los precios del restorán son asina, tienen carta onde podéis iguavos la comida que queráis.

Esta nueva xeneración de cocineros nun son una inversión de futuru, yá son una realidá. Ricardo González Sotres tien namás 31 años, yá anduvo cocinando por dellos estrelles michelin d'España y tornó al so Pancar a facese cargu del negociu familiar. Reformólu, actualizó la so cocina ensin perder los sos oríxenes y amiesta a la perfección cocina tradicional asturiana cola cocina más innovadora.

Hubo platos que namoraron más qu'otros, inclusive dalguna detalle a meyorar, pero'l nivel de la comida foi peraltu y salimos con esa sensación que te dexa un llocal cuando yá tas cuntando los díes pa volver a siguir probando coses nueves.