Nueva Visita: La Cueva

Direición: Ouviñana s/n. 

Teléfonu: 985 596 249

Recomendaciones: Pexe

Visita Anterior: http://www.lesfartures.com/2009/08/la-cueva.html
http://www.restaurantelacuevacudillero.com/

Calidá: 3/5

Preciu: 40€

Comentarios: La Cueva siempres foi ún de los nuesos fixos nel Occidente d'Asturies, productu de primera allugáu nun sitiu preciosu y con una terraza que pel branu fai les delicies.

Esta vegada nun salimos tan contentos como davezu, pero entá con tou, siguimos falando d'un productu de primera difícil d'atopar n'otros llaos.

D'aperitivo traxéronnos un Paté de Centollu con Quesu Azul en Crema. Ricu. Gustónos. El saborín del centollu bien marcao.

Pidimos d'entrante unos Calamares, que taben espectaculares. Como vos dixi, productu de primera y perbién fechos.

De platos, pidimos una Merluza a la Plancha, equí yá vamos siempres a tiru fixu porque sabemos que la merluza ye de primera. Per bona, y perbién fecha. Vien acompañada de llimón, un pocu d'ensalada y unes pataques panaderes.

Llubina a la Plancha, tamién bien bona de sabor, con ayu y unes pataques panaderes, pero lo que menos nos gustó foi que la traxeron de ración y non entera. Paeciónos poca cantidá pa lo que pagamos. Eso sí, el sabor bien bono.

De postres pidimos una Tarta de Mazana, recién fecha. Un espectáculu, per rica. Y una Tarta de Turrón. Los dos postres caseros y bien bonos.

Con cafés, agua y media de Martin Codax (había que conducir), pagamos 79.64€

Salimos un pelín decepcionaos, pero sigue siendo un sitiu calidable de primera. De xuru tamién ayude que les otres vegaes comimos fora y, claro, presta tou muncho más.