Casa Fermín

Direición: San Francisco, 8 - Oviedo / Uviéu

Teléfonu: 985 216 452

Recomendaciones: Menú Degustación

Web: http://www.casafermin.com/
Facebook: https://www.facebook.com/RestauranteCasaFermin
Twitter [@CasaFermin]: https://twitter.com/CasaFermin
Instagram [@casafermin]: https://instagram.com/casafermin

Calidá: 5/5
Preciu: 70€

Comentarios:  Casa Fermín nun precisa nenguna presentación, un clásicu d'Uviéu que foi la primer Estrella Michelín d'Asturies ente los años 1974 y 1997.

Nun allugamientu inmeyorable nel centru d'Uviéu, afayamos un local clásicu, pero preciosu; con una decoración abierta y cuidada onde la elegancia prima sobre cualesquier otra carauterística. El principal problema que tien ye la entrada, que quiciabes non se vea a güeyu. Pero una vegada dientro'l llocal, atopamos un pequenu hall de bienvenida al usu los antiguos hoteles (ello ye que d'antiguo yera un hotel).

 Recibíos por Luis Alberto y Maria Jesús Gil, tercera xeneración en casa Fermín (entá m'alcuerdo cuando de pequeñu'l mio güela llevábame al Cristu), presentáronnos al so fíu, Guillermo, que ta asumiendo llabores en cocina p'acabar siendo la cuarta xeneración en casa Fermín, en busca constante de la recuperación de la Estrella Michelín pa Uviéu.

 Compartimos mesa, blogueros y amigos, Olalla d'A Buen Bocado, Carlos d'Historias de un Foddie, Juan Luis García sumiller del grupu Manzano y Nacho Sandoval, lluchador de la gastronomía asturiana por escelencia en Madrid.

Un miércoles lluviosu, horariu de cena y Casa Fermín casi n'esclusiva pa nós. A pol Menú Degustación.

Empezamos con una Sidra Brut Nature EM (Emilio Martínez), perfeuta como siempres pa entamar (o acompañar o rematar) cualquier comida.

Con ella, traxéronnos 6 aperitivos,

Foie con Llenteya Negra Frita y Bombón de Foie, Naranxa, Vermut y Aceituna



Anchoa con Dulce de Lleche en pan de Cristal, 

Carambelu de Morciella,

y Croqueta de Xamón Ibéricu.

Onde ensin dulda trunfaron el Bombón de Foie, el Vermú de Naranxa y, cómo non, el so míticu Carambelu de morciella, tan imitáu.

Siguimos con ún de los meyores platos de la nueche, Ostra escabechada con Agua de Mar y Fruta la Pasión. ostra que sabe a ostra y con esi toque cítricu necesariu pa contrastar.

Los dos platos que menos gustaron del menú, fueron los dos siguientes. Platos a altu nivel, pero quiciabes menos sorprendentes que'l restu'l menú ...

Tacu de Salmón Afumáu con Yogur, Aceite de Vainilla y Granaos, bon tacu, suave, pero con un acompañante que nun acaba de convencer. Demasiao tacu, pa poco acompañante. Nun convenció.

Pa entós, abandonamos la sidra pa tomar un Monasterio de Corias Albarín Blancu, la so Viña Grandiella más "básica" (nun llega al nivel del so Guilfa) va perfeuta con esti tipu de platos. Empezar con sidra asturiano y siguir con vinu asturianu. Tou un aciertu de Casa Fermín.

Meyor el Tartar d'Atún coloráu con Xeláu de Wasabi, anque ta taaaaan de moda que ... pero perbién el toque del Xeláu de Wasabi.

El puntu d'inflexón de la cena, onde yá quedamos toos maraviaos, foi cola Cigala a la Plancha con Pilpil de Bacaláu y Ayu Negru. Maraviyosu platu, maraviyosa cigala y maraviyosu pilpil. La combinación de too ye a cencielles perfeuta.

La presentación de les Cogordes Saltiaes con Tocín Ibéricu y Yema de Güevu, con mini campana incluyida (y el ritual de retirala al empar) yá convidaba a un gran platu, y asina foi.

Platu dafechu temporal y perfeutu pa una nueche lluviosa como aquella. La yema ensin dulda da-y un puntu de cremosidá.

Camudamos de DO y Casa Fermín llevónos a un esceicional Remirez de Ganuza 2013 (DO Rioja) Blanco. Pergrande blancu qu'afayamos per primer vegada (cola sorrisa cómpliz de Juan Luis) y que nos namoró por completu. Frescu, cítricu, con gran final y bona acidez. Vinazu.

Otra maravía foi'l Guisu de Callos de Bacaláu, testura fascinante col cruxente de les mini pataques frites. Un platu con allegría pero al que toos echamos en falta un puntu más arriesgáu en cuanto al picante.

Acabamos los pexes con unos Salmonetes de Roca con Quinoa d' "abiyota". Qué bonos los salmonetes, y enriba cola cebera de moda. Otru platu perfeutu. Pocu más qu'añadir. Y amás cruxente.

Pa les carnes, traxéronnos otru vinu maraviyoso, un Contino Reserva 2009 (DO Rioja). Un rioja potente pero qu'entra perbién.

Empezamos con un Steak Tartar con Xelaos de Mostaza y Xalapeños Verdes. Pregúntennos si queremos el platu "allegre" o "picante". Yo pidí picante y ... si yes amigu de les emociones fuerte vas esfrutalu. Platazu pal qu'hubo que rellenar les copes delles vegaes y la nuesa temperatura corporal xubió un par de graos. L'allegre tien un puntín picante, pero muncho más llevaderu.

Otra de les estrelles de la nueche Tendón de Xata con Bearnesa de Chocolate Blanco y Pataca Negra. Xenial la testura del tendón con esi mueyu "duce". Contraste maraviyosu pa un platu que va ser complicáu d'escaecer.

Acabamos les carnes con un Pichón Asáu con Verdures Escabechaes nel so Zusmiu. Auténticu platazu clásicu, pero llenu de sabores. Xenial.

Los postres, onde munchos grandes viénense embaxo, equí dexáronnos dos esquisiteces.

Un Sorbete de Gintonic, Sopa de Cítricos y Enebro. Gintonic pa tomar con cuyar, a cencielles maraviyosu, y nada secu, gracies al cítricu. Per bonu.

Y acabamos con un Milfueyes de Yogur y Chocolate Blanco con Xeláu d'Artimora. Espectacular. Otru de los puntazos de la nueche. Menuda maravía.

Empezamos con sidra y acabamos con sidra, Aguardiente Vieyo de Sidra San Juan del Obispu. Sabéis que ye una vieya reclamación nuesa ameyorar la calidá de los aguardientes que tomamos cuando rematamos les comíes. Bien, pos ésta ye una forma inmeyorable d'acabar una cena.

Maraviyosa cena en casa Fermín, con grandes anfitriones y gran compañía. El futuru ta aseguráu con Guillermo.