Nueva Visita: Pazo de Monterrey

Direición: Avenida de Fernández Balsera, 21 - Avilés

Teléfonu: 985 527 028

Recomendaciones: Pulpu. Sollombu.

Anterior Visita: http://www.lesfartures.com/2015/03/pazo-de-monterrey.html
Facebook: https://www.facebook.com/El-Pazo-de-Monterrey

Calidá: 3/5
Preciu: 40€

Comentarios:  L'añu pasáu fiximos una cena de Navidá nel Pazo de Monterrey y nun salimos nada contentos pa ser un menú de 40€, y como nun nos gusta crucificar un sitiu per una mala nueche, decidimos volver anguaño pa da-yos una segunda oportunidá ... y vaya si l'aprovecharon.

Impresionante cena con Menú de 40€ (mesmu preciu que l'añu pasáu) onde toos salimos mui contentos.

El Pazo de Monterrey ta asitiáu na zona centru d'Avilés, mui cerca de la zona de "movida". Decoración típica de mesón castellanu, puertes de madera, espaciu ampliu. Tien una barra bien llarga con meses pa tomar daqué, y una zona de comedor dixebrada por unos biombos de la barra. Tres una puerta, otru comedor bastante grande. Pero cuidao que suel enllenase, sobremanera pa comíes y cenes los fines de selmana, con grandes grupos,  asina qu'acutái.

Cenamos 13 orcos, de bon xantar, nel salón de tras. El menú ye de Xamón Ibéricu, y esta vegada sí que yera del bonu, non calidá suprema (normal), pero bon xamón. Voló de la mesa. Amás la ración (como sería costume en tol menú) vien con raciones mui amplies.



Siguimos con una de les estrelles de la casa, el Salpicón de Mariscu, nunca falla y siempres ta bonísimo. A mi ye un platu que me gusta p'acompañar, pero ésti ta perbono. Nengún pero. Amás raciones xigantes como puede vese nes semeyes.



Y acabamos los entrantes con otra de les estrelles de la casa, quiciabes el platu que los fai más conocíos y pol que tienen más emponderamientos. Y nun se equivoquen, el so Pulpu a la Gallega siempres ta nel puntu. Pulpu bonu, con testura perfeuta. Vien con unes pataques cocíes a los llaos y pimentón. Ta bien bonu.

Pasamos a los platos principales, unos cuantos decantamos pol Sollombu y la verdá ye que se desfai, nun fai falta'l cuchiellu. Carne bien tienro, pocu fecha nel mio casu (asina lo pidí) y bien bona. Acompañada de pataques y unos pimientos. Amás les pataques son de les de "verdá".



Otros pidieron Paletiya de Corderín al Fornu, que nun probé, pero toos quedaron contentos. Tamién vien acompañada de pataques.

El menú vien con postre, pero axustamos un cambéu por un Quirós per cabeza, tradición na pandiella. Bien ricu y arrogante.

Pa beber, albariño Porta da Ría, y equí éntrenme les duldes. Según la bodega Rectoral do Umía el vinu llámase Pórtico da Ría, asina que nun sé si les nueses botelles seríen d'una añeda más antigua. El vinu taba bien.

Tintu Ondarre Reserva 2010, bon rioxa a un preciu algamadizu.

Agua Cabreiroá. Nun hai manera de beber n'Asturies agua asturiano ...

Con cafés, pagamos 40€ per cabeza. Bon menú, de bona calidá, con bona atención (a pesar del trasiegu d'un vienres nueche) y rápida. Esta vegada nun deceicionó nada.