Publicidá

Contact Me

Nombre

Correo electrónico

Mensaje

Hover Setting

default

Clandestino Gastrobar

Direición: Calle Cervantes 1, Lleón
Teléfonu: 987 793 971



Recomendaciones: Tapea y esfruta


Web: http://www.clandestinoleon.es/
Facebook: https://www.facebook.com/clandestinogastrobar
Twitter [@leonclandestino]:  https://twitter.com/@leonclandestino
Instagram [@clandestinogastrobar]http://www.instagram.com/clandestinogastrobar


Calidá: 4/5
Preciu: 35€


Comentarios:  Maraviyosu descubrimientu nel centru de Lleón. A pocos pasos de la Catedral y de una de les sos cais principales, atópase un nuevu Gastrobar de recién apertura que ta enllenu de sorpreses.

Lo primero que destaca ye la so decoración, moderna, industrial, con muebles restauraos, meses de madera, vigues nel techu, columnes de lladriyu. Tou informal, inclusive con dalguna mesa alta grande pa compartir con otros comensales. Según entres una zona de barra pa tomar daqué, y na parte de tras un salón ampliu con munches meses pero qu'en nengún momentu suxere aforfugu a pesar del trasiegu continuu de xente.


Na parte de tras, una terraza climatizada cubierta pa fumadores. La decoración ta bien cuidada, muebles restauraos, caxes de madera con plantes, cocina abierta ... l'ambiente yá predispon a esfrutar.


Otra cosa que prestó enforma foi l'atención, cercana, informal, atenta. Gustónos esi tratu cercanu, que va más allá del típicu tratu veceru-camareru, abiertu a suxerencies, y siempres respetuosu. Quiciabes otru tipu de veceru prefiera guardar más distancies, pero que llegue un camareru y pregunténos qué tal tamos, preséntese y que nos encamente platos pa comer, siempres ye daqué d'agradecer. Y qu'indiquen el preciu de los platos fora de carta yá ye daqué qu'ablucó porque nun tamos acostumaos a ello.


Personal mozu y dinámicu, tantu na cocina como nel serviciu, que-y da un ambiente informal a tou, pero non por ello menos profesional. Al contrariu. Foi tou xenial.

Meses de madera ensin manteles. cubertería nueva y cuidada y platos al centru de la mesa pa esfrutar. Prácticamente tolos platos tien preciu de ración y de media ración.


Empezamos con un Tartar d'Atún, Guacamole, Yuzu y Llima. Quiciabes el platu al que más avezaos tábamos toos, yá que ta mui de moda, pero non por ello dexa de tar menos ricu. L'atún xenial, con un toque allegre que-y da la llima que prestó a esgaya. Bona ración amás.



Steak Tar-tar de Canguru. Carne mui suave de por sí que precisa los condimentos pa potenciar el so sabor, asina que ye un platu perbién compensáu, anque si te pases echando wasabi na ración ... yá sabes lo que te puede pasar.



Per bon platu.


Nachos con Botillo, Kimchi y Quesu Afumao, Mui ricu. Base de carne con gratináu de quesu y nachos pa untar. Perfeutu pa los amantes de quesu yá que ye un platu potente. Bona ración amás. Vien ente'l platu con unes bolines de quesu azul que combinen xenial cola carne de rabu de xata.


Besugu en Tempura, Wok de Verdures con Lleche de Cocu y Emulsión de Guindilla Verde. El platu orixinal ye con Cabra en cuenta de Besugu, pero cásique meyor asina. Xenial el besugu en tempura, desfaese, perricu; y dempués combináu col toque de guindilla inda gana más.


Tacu de Carne Colorao Supremo, Noodles y Mueyos Clandestinos. Ufiértennos el platu con carne normal, o escoyida pagando un pocu más. Escoyemos pagar un pocu más. La carne taba bonísima, casi nun precisa nengún condimentu. Vien acompañada de dellos mueyos pa da-y un toque, asina que xugamos a probar a ver con cúal combinaba meyor.

Hasta agora, tolos platos mui bonos. Presentación de 10, bona calidá, quitando la carne que venía un pocu más escasa, el restu bones raciones ... pero ye que los postres yá fueron un mundu aparte ... qué gociada.


De postre tomamos, Tartaleta de Cítricos: Crema de Mantequilla de Llimón, Espluma de Mandarina, Twist de Pomelu y Xeláu de Yuzu. Mui ricu. Cola acidez de los cítricos pero bien compensada col xeláu, nun se va en nengún momentu.


Falsa Mandarina y Cocu Xeláu. Fascinante. El mio favoritu. Boles de chocolate blancu rellenes de mousse de mandarina, con una base de xeláu de cocu y un zusmiu de mandarina ... tou na boca maraviyosu. Impresionante postre.


Tarta de Quesu, con una presentación de 10 en forma de mazana, con carambelu, y per dientro una especie de mousse perricu. Mui, mui bona.


Kinder Sorpresa, un güevu de chocolate relleno d'uves y arándanos y peta-zetes. Al postre bañalu un chocolate caliente y ye fascinante metelo tou na boca y notar cómo esplota'l peta-zeta cola combinación de sabores duces.


Maraviyosu


Bona carta de vinos de la zona, con delles DOs y tirando de productu mozu y distintu, con dalguna mención a dalgún clásicu. Bebimos un Seis al Revés 2009, tempranillu merlot. Un vinu acedo y potente qu'ameyora entemeciéndolo cola comida. Gustónos. Amás Agua Cabreiroá


Con cafés y tés, pagamos 4 persones 130,70€. Per bona rellación calidá-aprecio pa tou lo que comimos y la calidá y presentación de tolos platos. 


Salimos namoraos del Clandestino y de xacíu que vamos repitir en cuanto averemos por Lleón.


No hay comentarios

Publicar un comentario