La Corona

Direición:  El picu, Pruvia. Asturies
Teléfonu: 655 97 36 08

Facebookhttps://www.facebook.com/LaCorona2015/

Calidña: 3/5

Preciu: 20 €

La verdá que dimos con esta casa de comíes de casualidá, en principiu la idea yera acutar nel restorán Via Carisa en Carabanzu del que nos falaren perbién pola so comida casera y de calidá, sicasí cuando consiguimos contactar col teléfonu comunicáronnos que pesllaren el restorán, pero que los mesmos xerentes abrieren esta casa de comíes en Pruvia, asina que decidimos probala.

Falárennos perbién de los sos menús de fin de selmana y decidimos probalo, de mano traxéronnos un aperitivu de llagostinos al ayu, perbién fechos y con gran sabor.


Como primer platu toos decidimos pola fabada y nun fallamos, una de les meyores fabaes que pudi probar fora de casa, fecha en fornu de lleña adulces lo que-y da un toque especial, el compangu con muncho sabor y de calidá.



Gran cantidá de fabes y compangu, sirviéndolo dixebráu pa que caún coma como-y pete. 


Una faba de bon tamañu y fecha nel so puntu de manera que desfai na boca y nun atopabes la piel. Gran platu.


Pal segundu platu escoyemos variáu pa poder probalos toos, empezamos pol bacaláu encebolláu, hai que dicir que yo nun soi apasionáu del bacaláu, pero taba suave y xugosu, sirvíu sobre una cama de pataques panaderes, la esperta en bacaláu de la familia quedó per encantada.


Tamién probemos el cachopu de venao, sirvíu con un mueyu de quesu cabrales mui suave, nunca probara un cachopu de venao y la verdá ye que sorprendió gratamente, un rebozáu finu que fai bien facil de comer el platu. Bon platu.


D'últimes entrecot de güe, fechu nel so puntu, anque dempués del restu de platos foi'l que menos prestó.


Faciendo un esfuerzu llegamos a los postres, tarta xelada, flan de café, tarta de tiramisú y yogurt con compota de mazana. Costó enforma finalos, y los que más gustaron fueron la tarta de tiramisú y el yogur con compota de mazana.


Pa beber agua y vinu 828 crianza 2012 Rioxa


El preciu d'esti menú especial de fin de selmana ye de 18 €, bona rellación calidá-preciu.

Dempués de falar col dueñu quedamos con ganes de probar el xabalín o'l cabritu,  asina qu'ensin dulda vamos repetir.


0 comentarios :

Publicar un comentario