Contact Me

Nombre

Correo electrónico

Mensaje

Hover Setting

default

Farturruta Ruta del Augüeira comiendo en As Cortes

Señes: Pezós
Teléfonu: 985 627 018


Calidá: 3/5
Preciu: 12€


Comentarios: Vamos esplorar Pezós, un conceyu del occidente asturianu abondo desconocíu. Un ruta bien guapa, d'apenes 10kms y 3h y media de duración, que pasa per ríos, montes preciosos, antiguos molinos, paisaxes espectaculares típicos del occidente y pueblos preciosos casi abandonaos declaraos Bien d'Interés Cultural.


Ye una ruta circular, que s'empecipia nel mesmu pueblu de Pezós, y que termina ellí, xusto al lláu, amás del Hotel-Restorán As Cortes, llugar onde cuando acabe la ruta vamos comer. La ruta tien un desnivel acumuláu d'unos 400m, hai un par de recuestos curtios duros de xubida para ganar altor dempués de baxar al ríu Augüeira.


Aparcamos el coche nel Palaciu de Ron en Pezós, con orixe nel SXVII. Yá vos falamos d'otru palaciu de la mesma familia en Cecos (Ibias), cuando visitamos la Bodega Siluvio.


Paga la pena perdese por Pezós, un pueblín bien guapu y cuidáu. Baxamos travesando'l pueblu y nel intre atopamos la última casa con pista hormigonada hasta onde empieza dafechu la ruta.


Acabada la pista, empieza una baxada pronunciada (a la vuelta hai que recuperar esi desnivel) preciosa hasta'l Ríu Augüeira. Una baxada de 1km con un monte preciosu de castañales y suelu empedráu.


Perguapa baxada.


Cruciamos la ponte sobre'l Ríu Augüeira.


Empieza una xubida onde n'otru kilómetru casi recuperamos el mesmu desnivel que baxamos. Pero con estes vistas, faise llevaderu.


Con salíes y entraes constantes nel monte. Cuando sales, paisaxe espectacular.


Cuando vuelves entrar, paisaxe espectacular. Inclusive atopes Corros para recoyer les castañes.


La ruta ta indicada en tou momentu.


Una vegada ganáu altor, hemos de volver baxar hasta'l ríu, esta vegada'l Ríu Ío.


Y para ello, hemos de volver enfusanos n'otra preciosidá de monte.


Como veis, el contraste del paisaxe típico del occidente asturianu, colos montes de fayes, carbayos y castañales, ye espectacular.


Tres la baxada, atopamos con una ponte de madera pola qu'hemos de cruciar.


Tien una mesa para sentase a comer, y xusto en frente los restos d'un antiguu molín.


Si siguimos un poco pela sienda,  atopamos nel intre el Molín de Sequeiros. Una redolada preciosa, con mesa para folgar un ratu y unes poces para bañase que tienen que ser una maravía pel branu.


El Molín ta de pie, pero poco más. Una pena, porque restauráu sería una maravía para visitar. Un molín hidraúlico, con trés plantes. L'Infiernu, onde ta la maquinaria de rotación; la sala de moler y na parte cimera, la pequena vivienda del molineru.


Tres un pequenu descansu, siguimos caminando. Salimos de la zona del monte que veis na semeya, y empezamos a xubir en zig-zag.


Ye'l segundu recuestu "curiosu" de la ruta (ánimu, namás queda'l postreru). Kilómetru y medio de xubida en total.


Acabamos la pista forestal pela que xubimos, que tien unes vistes precioses, y siguimos pel camín qu'indica la ruta.


Volvemos entrar nuna zona de pinos y dalguna castañal. Nesta zona, la xubida ye muncho más tendida y na mayoría los sitios, llanea.


Hasta qu'atopamos en metá del camín, la Capiya de San Miguel. Del SXVIII.


Al poco, llegamos a un aparcamientu que nos indica qu'empieza'l pueblu de Argul.


En realidá, nun fadría falta visitar el pueblu, una y bones el camín continua faciendo 180º dende l'aparcamientu. Pero perde-yvos por Argul. Ye una preciosidá.


Declaráu Bien d'Interés Cultural en 2004, tien malapenes 30 cases, y nun queda muncha xente viviendo. Anque cuando fuimos vimos bastante actividá pol pueblu. Arquitectura tradicional bien cuidada, con pasadizos preciosos entre cases y unes vistas bien guapes.


Volvemos pelos nuesos pasos, y na zona del aparcamientu, tomamos la carretera de la esquierda. La única que llega al pueblu.


Ye una baxada per carretera, d'unos 2,2kms, hasta'l Ríu Augüeira. En carretera siempres encamentamos precuru, anque pasen pocos coches.


Y amás, tenéis estes vistes.


Llegamos a la ponte que crucia'l ríu.


Y empieza l'últimu recuestu de vuelta a Pezós. Yá casi podemos goler la comida. El primer tramu de xubida ye por carretera.


Y nel intre atopamos una esviación a un camín (podríais siguir pela carretera pero, amás de ser más guapu, aforráis distancia pol camín).


La última parte ye una xubida de 1km con un desnivel de 150m. Per un camín preciosu.


Empiecen a apaecer les cases de Pezós.


Y vamos a comer a As Cortes, l'únicu restorán de Pezós. Tamién ye hotel rural.


Un local preciosu, bien curiáu. Con una barra de madera tallao maraviyosa, y casona de piedra. Meses para tomar daqué.


Una terraza preciosa.


Y naa parte de tras un comedor preciosu.


Cantáronnos el menú. De primeru, Sopa de Fideos. Bien rica. En pota.


Y de segundu, Carne Guisao. Buenísima.


Con Pataques Frites y Pimientos.


Para beber, preguntamos por vinos de la zona. Dixéronnos que llantaron uva autóctona l'añu pasáu y qu'esperen nunos años producir so propiu vinu. Hasta entós, merquen la uva nel Bierzu  y ellaboren el vinu en Pezós. Iniciatives guapes qu'esperamos siguir de cerca.


De postre, Flan Casero. Mui rico. 


Pagamos 12€, con café. Prestonos. 


Acabantes comer, ye visita obligada'l Mirador d'A Paicega. Queda mui cerca en coche de Pezós, ya inclusive ye una bona candidata para faer como Farturruta. Son 8kms dende Pezós, con un desnivel averáu de 300m. Nós fuimos en coche a Sanzo, aparcamos el coche ellí y fuimos caminando'l kilómetru que dixebra hasta A Paicega.


A Paicega ye un pobláu que se construyó a mediáos del sieglu pasao, específicamente para la construcción de la Presa de Gandras de Salime. Vivieron nel poblao unes 2000 persones. Anguaño'l pueblu ta abandonáu, pero les vistes sobre'l Ríu Navia son impresionantes.


Palacios señoriales, montes de castañales, molinos hidráulicos, pueblos medievales del SX y miradores impresionantes. Preciosa Farturruta por un conceyu bien desconocíu n'Asturies.


No hay comentarios

Publicar un comentario