Contact Me

Nombre

Correo electrónico

Mensaje

Hover Setting

default

Farturruta Cascada Cioyo comiendo n'El Risón

Señes: Paseo del Muelle - Castropol
Teléfonu: 985 635 065


Calidá: 4/5
Preciu: 50€





Comentarios: Vamos faer una Farturruta facilina, pa tola familia visitando una cascada espectacular. La ruta son 3kms en total (día y vuelta) y pues facela, caminando seliquín,  n'hora y media. Tien 150m de desnivel, a la ida baxes al ríu Porcía, a la vuelta xúbeslu de vuelta. La baxada a la cascada ye per un camín con abonda roca cayida, polo que persones con movilidá amenorgada pueden tener dalguna dificultá pa faer la ruta.


Una redolada preciosa, con lleenda incluyida y nel que podrás bañate cuando'l tiempu acompañe.


L'entamu de la ruta ta ente los pueblos de Penzol y Vilarin. Nel mediu, atópense les escueles abandonaes de Vilarín, puntu d'aniciu de la ruta. Nes mesmes escueles (o un pocu antes) atopamos una zona onde aparcar.


Ello ye que podéis empezar la ruta visitando les escueles abandonaes.


La ruta ta perfectamente indicada, y, amás, nos sitios de más dificultá, vas atopar una cuerda pa sofitate na baxada.


Un cartelu al entamu de la ruta recuérdanos la Lleenda la Cascada.
La hestoria de la creación del llagu asitiáu a los pies de la cascada anicia nel mitu d'una xana qu'habitaba nel llugar y que quedó prindada d'un mozu. Esti baxaba acaldía a dormir el pigazu al llau del ríu, mientres dexaba que'l fluyir de les sos agües arropárenlu. Una tarde, la mala fortuna quixo qu'una intensa nube asocediera, llevándose al mozu ríu abaxo, faciendo que la so vida apeligrara al desaguar na cascada. La xana, siempres atenta al so namoráu, utilizó la so maxa pa que nun espeñara, creando una poza a la fin del saltu pa salvalu.

Un camín preciosu.


L'entamu del camín recuérdanos al típicu paisaxe del occidente asturianu. Llenu de colores. Y con dalgún molín de vientu al fondu na sierra d'A Bovia.


Al poco yá atopamos un cartelu qu'ndica una esviadura a la derecha, con una baxada pronunciada y una cuerda que nos acompañará hasta, casi, la mesma cascada.


Una baxada entre carbayos y castañales d'una guapura espectacular.


Dalgún pasu ufierta dalguna dificultá, pero ayudaos de la cuerda, nun hai muncho problema pa baxar.


Nel intre llegamos al ríu Porcía (que va acompangándonos col so ruxerrux en tou momentu).


Y asomamos y vemos la espectacular cascada. Un tabayón d'unos 30m d'altor. Tien una zona de roques onde podéis averar pa davos un bañu.


Esisten otres dos cascaes, que podéis visitar si quedastis con gana de más. Volviendo pelos vuesos pasos vais atopar una bifurcación xustu al lláu del ríu, con un camín que s'esvia escontra riba a la izquierda del camín principal. Xubiendo per él, vais atopar otros dos tabayones, muncho más pequenos y menos espectaculares, pero guapos porque amás el camín sigue'l cursu del ríu. A cencielles vais tener que xubir los 30m de desnivel y de la cascada principal y vais atopalos. Solo recomendable pa persones que tean más en forma.


Nós tornamos pelos nuesos pasos porque queríamos faer otra visita antes de comer.


A unos 12kms del entamu de la ruta, atópase'l Mazu de Meredo, o Mazu de Suarón. Un conxuntu etnográficu preciosu, con área recreativa incluyida, onde vais poder visitar un complexu pal aprovechamientu de l'agua, qu'esiste dende'l SXVIII, anque tien oríxenes medievales.


El conxuntu tien un mazu, molinos ya inclusive piedra d'afilar. Y una preciosa cascada p'aprovechar la fuerza l'agua.


Tres la visita, fuimos comer, a Castripol, al Risón.


Ta asitiáu en plenu paséu del muelle, con unes vistas precioses sobro la ría del Eo, As Figueiras y Ribadeo.


Tien una terraza en madera precioso, pa sentase a tomar daqué y tar hores en paz. Inclusive tamién puedes comer fuera si'l tiempu acompaña.


Dientro zona de barra, con meses pa tomar daqué. Y pasando per un pasiellu, un comedor preciosu. Con vistes tamién.


Sentámonos dos persones a comer. Traxéronnos de aperitivo un Paté con Compota de Mazana.


Yá que tamos nel Eo, hai que pidir Ostres. Y qué ostres, menudu tamañu, y qué sabor. Espectaculares. Viéndenles por unidaes.


Siguimos con unes Navayes. Como veis, d'un tamañu formosu. Bien bones.


Y acabamos con Arroz con Llubricante (Bugre), que pidimos por encargu cuando llamamos p'acutar. Caldosu, en pota, qu'amás caltien el calor muncho meyor. Una maravía.


Bien arrogante, amás. Repitimos 3 vegaes. Asina que nun llegamos al postre.


Tienen bona carta de vinos, con presencia asturiana, amás. Tomamos un Señorío de Ibias que ta perrricu. Albarín Blanco.


Pagamos por tou 95€. Perbién de preciu, con productu de primera y perbién ellaboráu. Atención bien bona nun sitiu preciosu. Encantónos Risón.


Cascaes con lleenda, inxenios d'aprovechamientu d'agua medieval, restorán casi raspiando la ría comiendo ostres de la mesma ría y un arroz con bugre pa la posteridá. Preciosa Farturruta.


No hay comentarios

Publicar un comentario