Publicidá

Contact Me

Nombre

Correo electrónico

Mensaje

Hover Setting

default

El 7 de Sillerías

Direición: C / Sillerías, 7 - Trujillo - Cáceres
Teléfonu:  927 321 856



Recomendaciones:Sollombu ibéricu de Retinto


Web: http://www.el7desillerias.com/
Facebook: https://www.facebook.com/el7desillerias



Calidá: 4/5
Preciu: 35€


Comentarios: Trujillo ye una ciudá preciosa, da gustu pasiase peles sos cais, papase de los sos rincones, visitar el so castiellu, los sos museos ya ilesies ... pero per dios, nun lo faigáis n'Agostu como nós.

Lo bono de visitar una ciudá so un calor infernal (a lo menos pa un asturianu mediu) ye que cada 5 min entres nun chigre a tomar daqué frescu, y tres unes hores de monumentu en monumentu, ún yá tien claro cuál tien meyor pinta pa dir cenar. Y gustónos tantu, que repetimos a otru día na comida.


La terraza que tien El 7 de Sillerías ye una gociada. Un patiu interior perampliu llenu de meses grandes, espaciaes y con llume tenue y música baxa de fondu pa crear ambiente. A pesar d'haber bastantes meses y bastante xente nella, neños incluyíos, l'ambiente ye bien sele y convida a esfrutar de la comida, como asina fiximos.


Empezamos pidiendo un Platu de Xamón Ibéricu d'Abiyota. Tamos en tierra d'ibéricos. El xamón ta na mesa de serviciu, y vemos cómo lu corten y prepárennos el platu. Un detalle que nos gustó enforma y que tendría de dase más dafechu. En cuanto al sabor, paeciónos un pocu secu. Bona ración, y bon xamón, anque nun namoró.

El dueñu preguntónos qué nos paeciera, y cuando-y lo comentamos, indicónos que nun taba mui contentu cola pieza. A otru día volvimos comer y aquello yá foi otra cosa. Pero eso vamos cuntalo dempués.


De platos pidimos, Pulpu a la Brasa. Otru de los puntos fuertes de la zona ye'l pimentón, asina que queríamos probar un platu onde poder esfrutalo na so llucencia, y qué meyor que con una bona ración de pulpu a la brasa. El pulpu ta nel so puntu. Y vien con pataques cocíes y pimentón. Mui ricu.


Yo probé un Sollombu Ibéricu de Retinto. La raza retinta ye autóctona d'Andalucía y Estremadura. Costaba un pocu más que'l "sollombu ibéricu a seques" pero pagó la pena probalo. Sollombu espectacular, que se desfai na boca. Lo único que nos sobra ye'l toque de reducción de módena que-y ponen, anque se soluciona con nun averar el tenedor pellí. Amás vien con pataques y espárragos trigueros.


Agua frío Lanjarón. Y Vino Blanco Estremeñu Suerte del Rey 2015, d'uva Gewurztraminer. Vino "facilón",qu'entra golosón pero apenes persiste na boca. Cumplió'l so oxetivu d'enfrescar, que colos 30º qu'inda había de nueche, yera d'agradecer. Anque nun namoró.

Un rasgu a destacar ye qu'en tolos llocales que visitamos n'Estremadura sirven vinu estremeño. Tamién empiecen a vender cerveza artesano estremeña. Envidia sana d'un pueblu que sabe apreciar los sos productos.

Colos cafés, convidáronnos a un clin de yerbes.

Pagamos 81,20€


Volvimos a otru día pa comer. Pel día pel branu ye impensable comer na terraza debíu al calor que fai, asina que nos allugaron nuna mesa dientro bien enfrescaos col aire acondicionáu.

Empezamos mirando tranquilamente la carta mientres tomábamos unes copes de Habla del Silencio, el vinu más conocíu d'Estremadura.

Tráennos d'Aperitivo un Gazpachu. Bonu y frescu. Tien un toque picante que-y va xenial col xamón.


Por encamientu del dueñu, volvimos atacar el Xamón Ibéricu d'Abiyota, y nada que ver col d'ayeri. Muncho más xugosu y sabrosu. Indícanos que ye la parte más cercana al güesu. Voló.

Pal restu los platos, dexamos encamentar un pocu por ellos. Queríamos tou al centru pa compartir y probar coses distintes a les del día anterior.


Traxéronnos una Tosta de Sardina con Tomate. Buenísima, con mostaza casera y un toque importante afumáu. Encantónos. Amás perbién de tamañu.


Carrelleres de Güe. Otru platu espectacular. Mui suaves. Vienen acompañaes d'un mueyu de Pedro Ximenez y de Pimentón de la Vera.


De postre, encamentáronnos Tarta de Quesu con Figu. Nun ye la meyor que probemos, pero sí de los meyores. Espectacular presentación con forgaxes de chocolate, galleta y naranxa. Gran postre.


Pa beber, otru encamientu de la casa. Coloma 2014. Otru vinu estremeño que nos gustó abondo más que los anteriores. Monovarietal de garnacha. Predomina sabor a cereza y entra abondo fácil.

Esta vegada pagamos 61,10€. Como veis, una rellación calidá aprecio per bona.

Dos esperiencies nel 7 de Sillerías. Sitiu preciosu, con distintos ambientes, tratu esceicional y una cocina que va dende lo clásico hasta dalguna incursión creativa que nun deceiciona. Mui recomendable. 


No hay comentarios

Publicar un comentario