Las Carnes de Viñapedrosa : La Oveja Negra La Parrilla

Direición: Av Galicia, 24 - Oviedo / Uviéu

Teléfonu: 985 202 168

Web: http://www.laovejanegraoviedo.com/

Facebook: https://es-es.facebook.com/La-Oveja-Negra
Calidá: 4/5
Preciu: 33€

Comentarios:  La idea ye bien cenciella, xuntar ún de los meyores vinos tintos españoles coles meyores carnes asturianes. D'esa unión naz Las Carnes de Viñapedrosa, unes xornaes que durante dos fines de selmana entamaron 50 restoranes asturianos.

Entamáu por Idea Redonda, averamos a La Oveja Negra, unu de los templos de la carne asturiana, a tastiar el menú. Preciu afecho pa dos persones con un vinu qu'en restorán tranquilamente algama los 23€.

Comenzamos con un Xamón d'Abiyota Señoría de Montanera, a lo grande. Platazo pa dos persones con un xamón esquisiuo con un puntu de sal perfecto. nun conocíamos esta casa, pero encantónos.

 Acompáñenlo d'un pan turráu con tomate y ayu.

Ensalada de Tomate Raf y Tueru de Bonitu Don Bocarte. Un platu cenciellu pero maraviosu. De mano la color del tomate Raf col Aceite de Oliva, yá conviden a comer colos güeyos. Pero ganó por goleada el bonitu de Don Bocarte. Bonos cachos de bonitu na ensalada, con un tastu bien bono. nun conocíamos esta marca de conserves, pero habrá qu'averase a ella.

Diba de descubrimientos la comida.

Entrecot de Güe (45 díes de maduración) a la Parrilla y Pimientos Confitaos. Carne IGP Xata Asturiana de Trasacar, según indicaronmos. Poco más qu'añedir a una carne espectacular, que se desfai con namás mirala. Acompañada de pimientos y pataques "de les de verdá". Placer absolutu.

Acabamos con una Tarta de Mazana. Nun soi nada fanáticu de los postres de manzana (la manzana ye pa facer sidra :P) pero taba bien bona.

Del vinu que nos acompañó na comida, poco más puedo dicir. Viñapedrosa Crianza 2013. Auténticu vinazu, ún de los favoritos de Ribera. Mui  famosu y con una rcp bien bona. Si tenéis ocasión habéis de pidilo. Creo que pa les xornaes el preciu afíxose inda más. Un vinu potente, pero elegante, que va perfeutamente cola carne yá'l xamón. Persisti na boca y dexa un llixeru toque amargurientu al final. Mui, mui bonu.

Per bones xornaes, a mui bon preciu, pa los amantes de la carne y de'l bon vinu.