Pasarela del Niemeyer

 

Direición: C/ Llano Ponte, 4 - Avilés
Teléfonu: 984 112 111


Web: http://pasarelaniemeyer.com/
Facebook: https://www.facebook.com/pasarelaniemeyer
Twitter: [@Rte_Pasarela] https://twitter.com/Rte_Pasarela


Calidá: 4/5
Preciu: 75€


Comentarios: Desconocíamos dafechu la dinámica los restoranes nos Menúes de Nuechevieya, asina que 1 mes antes punximos a la gueta d'un sitiu onde cenar esa nueche per Avilés. De les 8/10 opciones qu'atopé ENSIN COTILLÓN POSTERIOR, namás 1 baxaba los 70€. Y viendo los menúes qu'ufiertaben, nengún superaba los 40-50€.


De toos, el menú que más nos convenció foi'l de La Pasarela del Niemeyer, restorán perteneciente al Hotel Palacio Valdés de recién reapertura. En plenu centru d'Avilés y con vistes a al edificiu del famosu arquiteutu brasileñu, entres per una cristalera axacente al hotel, con un accesu independiente al mesmu.

Dientro zona de barra y cafetería, y na zona de tras dos comedores, qu'esi día taben llenos. Bona decoración, meses amplies y serviciu bien sollerte mientres tola nueche. Nel menú gustáronnos unes coses más qu'otres.


Empezamos con un entrante fora del menú, Palinos de Pan Casero con Mueyu Alioli y Brava. L'únicu problema ye que los palos nun cruxien.


Empezamos con una Crema de Mariscu con Gyoza de Txangurro. Primero tráennos la gyoza nel centru del platu y rellenenla con una xarra cola crema mariscu. Mui ricu, tanto la crema, como la gyoza con una testura perfecta.


Amás, paeciónos una presentación per orixinal.


Siguimos con una Coca d'Anchoes y Caviar d'Aceite. Lleva tomate y una crema pepinu. Mui ricu la parte que cubre la coca, la coca en sí ... nun cruxe. Supongo que son los problemes típicos de dar el mesmu menú a tantes persones al empar.


El pexe del menú foi Rubiel Confitáu n'Aceite Naranxa y Menta con Guisu de Quinoa y Llagostinos. Bona pieza de Rubiel. La pena yera que taba pasáu, y pasónos en tola mesa, pero ameyoró enforma col restu del mueyu.


La estrella ensin dulda foi'l Sollombu al Foie con Mueyu de Porto y Cogordes. Otra bona ración pa un sollombu que tuvo al altor. Per ricu, la carne desfaise yá'l mueyu ta buenísima. Gran platu.


El postre fueron unos Profiteroles con Blinis de Turrón y Crema Castañes. Taben ricos, y notábense caseros. El blinis (tuvimos de buscalo) nun yera una mini torta como lleímos, sinón una base d'un partel de turrón que taba nidiu y complementó perbién colos profiteroles.


Pa beber mientres la cena, Palaciu de Bornos Verdejo "La Caprichosa" 2012. Verdejo sobre enguedeyes con un 90 de nota na guía Peñín. Gustónos.


El tintu yera un Dominio de Bornos tinto. Un tempranillo con crianza. Ricu. Amás, Agua Borines.


Coles uves traxéronnos Cava At Roca. Preguntamos por Sidra Brut y nun teníen, sí qu'ufiertaben El Gaiteru. Vinu esplumosu ecolóxicu del Penedés. Ricu.

Darréu les uves, ensin cargu extra, un DJ poniendo música, polo qu'aprovechamos a tomanos la primer copa nel llocal.

Faláronnos bien del sitiu, y vemos qu'ufierten xornaes gastronómiques, amás d'un menú degustación. Va haber que pasar a probalo porque ye un sitiu qu'apunta maneres.

0 comentarios :

Publicar un comentario