Nueva Visita: El Corral del Indianu


Direición: Avenida de Europa, 14. 33540. Les Arriondes.
Teléfonu: 985 841 072 


Recomendaciones: Menú Degustación


Web: http://www.elcorraldelindianu.com/
Facebook: https://www.facebook.com/joseantonio.campoviejo
Twitter: [@josecampoviejo] https://twitter.com/josecampoviejo
Instagram: [@elcorraldelindianu] https://www.instagram.com/elcorraldelindianu/


Calidá: 5/5
Preciu: 110€


Anteriores Visites: http://www.lesfartures.com/2015/04/nueva-visita-el-corral-del-indianu.html


Comentarios: Nun se pue tar casi dos años ensin dir al Corral del Indianu. Tendría ser parada obligatoria pa cualquier persona qu'ame la gastronomía. Axunta toles condiciones pa faete pasar un día memorable: el sitiu ye preciosu, la comida ye difícilmente ameyorable y faen que teas como na to casa.

La cocina de Jose Antonio Campoviejo fai un homenaxe a Asturies, treslladándote a emociones primitives, acomuñaes munches d'elles a la infancia, pero con toques de xeniu na cocina. Consigue trescalar, y qu'esfrutes como un nanu comiendo. A la fin, esto va gociar, y d'emocionate, aplicando técniques sencielles o complicaes, pero tou platu tien una finalidá. Y la sorrisa que consigue sacate cuando sales del llocal, fai que yá teas cuntando los díes pa volver visitalo.

Pidimos el so Menú Degustación. 80€. Mesa asitiada xusto onde la cristalera que da a la preciosa terraza que tienen (si podéis, coméi nesa mesa), día lluviosu y casi 3h de puru esfrute.


Mientres decidíamos ufiértennos una copa de sidra EM. Como siempres, rica.


Empecemos con una les sorpreses de la nueche, les Perlles del Eo. Bombón xeláu de chocolate blancu, que t'encamienten meter enteru na boca y apertar cola llingua contra'l cielu la boca. La esplosión na boca ye increíble. Un cachu de mar na boca, entemecíu con un chocolate nidiu. Maraviyosu.


Croqueta de Xamón Ibéricu Joselito. Espectacular.


Bombón de Cabrales con chocolate blancu y mazana asada. Ún de los sos últimos platos más conocíos, con Cabrales Teyedu yá'l bon faer de Jose Antonio Darriba. Anque a priori nun lo paeza, ye elegante y con una testura increíble.


Macarón de Maíz con Sabadiegu de Noreña. Otra de les marques de la casa. L'amiestu del toque duce col sabadiegu ye increíble. La testura, tamién pa morrer.


Amás, tráennos una Mantequilla que nun dexamos que nos quitaren en tola comida. Buenísima.


Cuando acabamos la copa de EM, ufiértennos -cortesía la casa- una copa de Monesteriu de Corias Guilfa, que taba per bonu, vinu que va ameyorando añu a añu. Bien bonu esi toque a madera que tien.


Agua Fuensanta, pero arumada con hierbabuena y llimón. Da-y un toque interesante.


Torta de maíz guacamole y cebolla enchilada. Tortín bien ricu, pero ye qu'el guacamole ta espectacular. Nidiu y para tomar de dos bocaos.


Camudamos a la elección que fiximos del vinu pa la comida. La Zorrina 2013, de Dominio del Urogallo. Vinu ellaboráu nuna parcela bien pequena, y polo tanto, con una producción mui pequena. Ellaboráu na so mayoría d'uva autóctona asturiana Carrasquín, entemecíu con otres variedaes. Ye un vinu fora la DO Cangas.


Tien 12 meses de barrica de carbayu francés. Ye un vinu qu'entra acedu, pero qu'ameyora n'alendando. Elegante. Gustónos enforma.


Otra de les xoyes la comida. Oricios glaseaos nel so zusmiu, mazana verde y viña. Pa comer de cuyar. Un pocu zusmiu, un pocu d'oriciu, un pocu mazana, un pocu viña y ... tou pa la boca nun sabor increíble, Buenísimo. Increíble combinación col vinu, una de los meyores.


Como una ensalada cola so llechuga, tomate y cebolla (arreglada con una crema fría de vinagre de sidra). El conceutu d'ensalada de Jose Antonio. Pa tomar con cuyar, col sabor de siempre, pero con una testura dafechu orixinal. Encantónos.


Más xoyes. Los dos afumaos: el Gamonéu del puertu y l'anguila con matices. Pa tomar con cuyar, sí, sí, con cuyar. Un pocu pan ... y a esfrutar d'esa maravía qu'entemez de forma espectacular. Base de Gamonéu y angula nun contraste xenial.


Raviolis de papada, caviar iranín, zusmiu de sardina salones. Gana'l sabor a caviar. Otru platu pa tomar de cuyar, onde gana'l sabor a mar, y a la fin atopes la testura del ravioli pa oldear.


¿El mio platu favoritu en muncho tiempu? Puede ser. Atún del norte asáu al carbón nun llixeru escabeche de cenahories encurties. Cuntáronnos que tienen dende'l branu un nuevu fornu de carbón que ye una maravía, y que de xemes en cuando faense con dalgún atún del norte que para pol Cantábricu y tráenlos especialmente pa ellos de la pescadería. Increíble ventresca, pero increíble.


Pero ye qu'amás vien acompañáu d'unes pestañes, que ye la parte más sabrosa l'atún y ... son un auténticu manxar. Increíbles.


El siguiente platu dempués d'atún, teníalo per complicáu. Caltener esi nivel ye bien difícil, pero ... consiguiolu. Calamar asáu y guisáu, fervinchu de los sos interiores (Calamar hasta lo fonderu). Volvimos a la cuyar pa siguir les indicaciones y aprovechar el platu dende'l fondu. Sabor a esencia pura de calamar, con amiestos de testures líquides y el calamar mesmu presidiendo'l platu.
Sía comoquier, siguíamos saborguiando l'atún hasta que ... llegó'l salmonete.


Artesanía oceánico (El Salmonete). Si'l salmonete ta ricu ... malu va ser pa que'l platu nun trunfe. Y taba buenísimo. Vien con una Salmis de los sos interiores (mueyu fechu col interior del salmonete, espines, cabeza ...) y algues en testura. Otra maravía de platu.


Acabamos con una carne, Pluma Joselito  a la brasa, mole almendráu raigaños asaos. La carne va sola, nidia, deliciosa, corta ensin necesidá de cuchiellu, pero ye qu'amás, el mueyu tien un toque picante que-y da una allegría increíble al platu.


Pa los postres, camudamos de vinu y tráennos el Porto Blanco Maritavora. Va xenial colos postres.


Les emociones de la lleche. Trés testures distintes en forma lleche, espluma, llíquida y sólida pa un postre duce. Per ricu.


Otra de la sorpreses de la nueche. Los 3 caminos ... un solu fin (Xalapeños, panceta afumada, albaca, maíz). Postre mui orixinal y atrevíu. D'esos qu'o t'encanten o nun puedes con él. A nós encantónos. 3 caminos distintos pa llegar a la felicidá. Un postre entemeciendo'l chocolate con xalapeñu, que pica de verdá; chocolate con panceta afumada ... Presidiendo, esfera de hierbabuena con panceta afumada y raxa de mazana. Fascinante.


Regalu la casa, foi l'últimu postre. A puntu d'españar yá. Chocolate Tostáu con Xeláu. Pa compartir al centru mientres tomábamos los cafés. Espectacular.

Pagamos en total 222€. Teniendo en cuenta que'l vinu costaba 56€.

Ensin dulda, una de les meyores esperiencies gastronómiques que tuvi na mio vida. Gracies Jose Antonio por faenos tan felices. Increíble.

0 comentarios :

Publicar un comentario