Llagar de Colloto - Ganadería Cabrero

Direición: Calle Camino Real, 53 - Oviedo / Uviéu
Teléfonu:  985 081 339


Recomendaciones: Carne de Güe


GANADERÍA CABRERO

Facebook: https://www.facebook.com/GanaderiaCabrero/


LLAGAR DE COLLOTO

Web: http://www.llagardecolloto.es/
Facebook: https://www.facebook.com/llagardecolloto/
Instagram: [@llagardecolloto] http://instagram.com/llagardecolloto


Comentarios: La última vegada que visitamos El Llagar de Colloto  foi na presentación de la Carne Txogitxu y salimos con una sensación d'envidia d'un empresariu vascu que mercaba vaca vieya (ente elles asturiana) y vendíanosla como la meyor carne del mundu. Envidia pol so sentíu del marketing y de defender la carne vasco como la meyor del mundu; y envidia por nun saber faer nós lo mesmo.


Esta vegada, añu y medio dempués, volvimos pa daqué bien distintu. La Presentación d'una Ganadería de Gües 100% asturianos. Fai casi 6 años, Jose Manuel Suárez, propietariu de la ganadería, mercó 8 gües entemez de raza Casina y Asturiana de los Valles. L'amiestu de les dos races tien una razón, la raza Casina apurre una calidá suprema a la carne pero'l so tamañu torga -diznos-, que sían vidables económicamente, polo que se crucien con Asturiana de los Valles qu'apurre volume al güe.


Agora cunta con 56 (más 3 qu'apocayá sacrificaron) y la so idea ye siguir ampliando hasta llegar a los 100, adulces. Conocemos dalgún ganaderu más que cría gües asturianos (cruciaos o non) y que los viende, pero ésta ye la primer ganadería que lo fai a una escala mayor, y empobináu a ufiertar la meyor carne posible nel restorán.


Toos conocéis el bulo xeneralizáu qu'esiste cola carne de güe, y son famoses les escapaes d'asturianos al Capricho de Lleón, o nel nuesu casu al Grand Prix n'Ávila. Agora, sicasí, podemos esfrutar d'una carne de güe 100% real, y amás, 100% raza autóctona asturiana. Por fin esplotamos una de la meyor carne del mundu nós mesmos.


Para presentala en sociedá, Impact5 entamó un alcuentru con medios qu'empezó con una visita al práu onde viven a cuerpu de rei los gües. Yá conocéis Asturies, a 5 min de casi cualquier núcleu urbanu atopes metanes praos y tranquilidá. A menos de 10min d'Uviéu y Cualloto viven tranquilamente los gües y pudimos dir visitalos.


Ellí Jose Manuel cuntónos que'l güe polo menos ha tener 5 años antes de sacrificalo, y que suel capalos a partir del añu y medio por que nun "se quede tiesta de vaca", anque namás ye una mera cuestión estética. Comen ente 10 y 12 quilos de veza (forraxe) al día, pueden algamar los 1300 quilos de los que namás se pueden aprovechar una tercer parte y que nun tien nenguna subvención del Principáu.


Tres posar pa nós como si fueren modelos profesionales. Volvimos al Llagar de Colloto onde escuchamos al famosu dietista, nutricionista y biólogu asturianu Ramón de Cangas, que nos faló de les bondaes de la carne colorao y n'especial de la de güe, refugando los falsos bulos que salieron en prensa apocayá. Necesaria 2 vegaes per selmana, la carne de güe ye perfecta pa dietes de control de pesu y dietes saludables  por cuenta'l so altu conteníu en grases insaturaes, Vitamines del grupu B y Minerales. Vamos, que si non la comemos más ye pol so altu preciu y non por perxudicar la salú.


Tamién cuntamos cola presencia d'Ander Esarte, bicampeón d'España del Campeonatu de Parrilla y propietariu del restorán Txuleta de Donosti que se punxo al mandu los fogones xuntu col equipu del Llagar.


Iván Suárez, propietariu del Llagar de Colloto comentónos que mercaron el 100% de la producción de la Ganadería Cabreru. Asina que si queréis tastiar auténtica carne de güe 100% asturiana ... yá sabéis ónde habéis dir. Avisu importante: la carne ta disponible na carta, pero si queréis comer un chuletón tenéis d'encargalo antes pa garantizar que tea en perfectes condiciones (la maduración óptima de la carne ye d'hasta 90 díes). Amás, comentáronnos qu'acutando un chuletón van ufiertar la posibilidá de dir visitalos nun coche dende'l Llagar pa que podáis velos in situ. Un aciertu.


Sentaos na mesa, empecemos tastiando Carpaccio de Güe con Lláscares de Parmesano y Callos de Güe. Tou nel mesmu platu. El carpaccio nun precisa'l parmesano, ye mui tienru, y desfaise. A priori paez que va tener un sabor muncho más intenso, pero tiende más a la elegancia. Per ricu.


Los callos perfeutos. con un toque picante, pero nun cayen gordos. Empezábamos bien.


Siguimos con una Hamburguesa de Güe. Una señora hamburguesa enorme acompañada d'Afumáu de Pría, pataques a l'antigua, mostaza y ketchup caseru con piquillos. Un espectáculu. Volvemos a lo d'antes, esperaba muncha más intensidá na carne y entra perfectamente. Sedosa y elegante. Per rica.


Y el conxuntu, pa morrer.


Empezamos colo "importante" (como si lo anterior nun lo fora). Punta Pierna, esa parte tamién llamada "falsu sollombu" porque empieza onde acaba ésti. Per bona, carne con un sabor muncho más intenso y qu'entra sola na boca.


Col sal gordo xusoa percima (anque lo estremamos pa probar la carne solo) y nel so puntu perfectu.


Pero l'acabose foi cuando nos traxeron la Parte Baxa la Chuleta. Espectacular. El cuchiellu nin fixo falta, carne que desfái nel platu y ye como pura mantequilla na boca. Supera llargamente al cachu anterior (y yera complicáu) y quedamos toos maraviaos ...


... tanto que repitimos.


Los espárragos y los pimientos que lu acompañaben nin los probemos. Nun faía falta.


Acabamos col postre, casi lo refugo por cuenta la fartura hasta que vi lo que yera ... Tulipa de Xeláu de Turrón de Diego Verdú. Ensin palabres.


Los precios nun son baratos, Cecina (25€/kg), Callos (18€), Hamburguesa (18€), Chuletón Parte Baxa (95€/kg), Parte Alta (110€/kg), Cabecera (90€/kg) y Sollombu de Güe (180€/kg), pero son precios a los que táis avezaos si visitáis cualquier templu onde sirvan carne verdadero de güe. Recuérdovos qu'el chuletón ye por encargu.


¿L'únicu pero de la comida? El Edulis Rioja qu'acompañó la comida, non pola so falta de calidá, sinón porque la presentación d'un productu 100%asturianu pidía un vinu 100% asturianu. Y nun lo digo solu yo, díxolo dalgún mediu que vieno de fora a la presentación.

Esta vegada sí que salimos del Llagar de Colloto llenos d'arguyu. Por un ganaderu qu'apuesta por anovar  curiando gües 5 años antes de vendelos y por un restorán qu'apuesta por llograr la excelencia cola que dicen ye una de les meyores carnes del mundu y qu'apenes ta esplotada. Esperemos que cunda l'exemplu, non solo con gües, tamién con vaca vieya asturiana y empecemos a sacar partíu de tola riqueza que tenemos.

0 comentarios :

Publicar un comentario