Contact Me

Nombre

Correo electrónico

Mensaje

Hover Setting

default

Farturruta De A Estierna a Braña de Trabáu comiendo en Tixileiro

Señes: A Estierna - Ibias
Teléfonu: 985 818 707


Calidá: 4/5
Preciu: 30€





Comentarios: Ente Ibias y Degaña, casi na frontera con Degaña, atopase A Estierna, un pueblín bien guapu con namás 6 vecinos. N'A Estierna atópase l'Hotel Rural Tixileiro: hotel, apartamentos, tienda, spa y, tamién, restorán. Un sitiu perfectu pa folgar y desconectar.


Dende'l mesmu restorán sal una ruta bien guapa escontra la Braña de Trabáu. La ruta ye dura, con bastante desnivel, unos 600m. 9kms en total. La ruta sigue un pocu más hasta les Llagunes de Trabáu, pero nun nos avagó llegar en formatu Farturruta.


Na mesma carretera xeneral, casi en frente l'hotel, atopes el cartelu qu'indica l'entamu la ruta. Encamentamos llevar agua (hai una fonte nel pueblu) porque la metá del camín vas ensin la protección de los árboles.


Empieza una xubida en zigzag ente castañales y ablanares.


Inclusive cruciamos con un corzu a metá del camín. Van tan rápido que nun m'avagó enfocar meyor.


Llegamos a la Collada de Beisán. Con unes vistas impresionantes sobremanera'l valle. Na seronda tien que ser increíble cola tonalidá los colores.


Tenemos un tramu de respiru, baxando hasta la Braña de Moreda.


De la Braña de Moreda apenes queda nada, dalguna cabana cayida pero unes camperes impresionantes con, inda, daqué de ganáu.


Baxamos pa cruciar la Regueira de Moreda o das Mestas.


Empieza la parte más guapa la ruta, cruciando montes de carbayos, castañales y ablanares. Hai partes daveres espectaculares. Xusto al pasar la Regueira, atopamos colo que queda de la braña.


Empieza la xubida pela fastera d'A Serrapia.


Dura, pero preciosa. 


Llegamos a la Braña d'Enriba. De la que poco queda yá.


Y dende ende, xubiendo un pocu más, la Braña de Trabáu.


Dende ehí, podemos siguir xubiendo, y paga la pena hasta les Llagunes. A nós yá se faía tarde pa llegar a la hora al restorán. Tolos indicadores de la ruta paeciéronnos escasos col tiempu envaloráu, porque la ruta faise más dura de lo que pon l'indicador.


Desandamos el camín, que, como ye baxada, faise muncho más rápido. Cruciamos con 0 persones, ruta abondo desconocida.


Llegamos al Tixileiro y recibiónos Jose. Anfitrión maraviyosu que nos enseñó l'hotel, el spa, aconseyónos sobro qué comer y regónos la comida con vinu NAMÁS de la zona. Un exemplu d'apostar pol productu llocal y de calidá. Amás, comimos de luxu.


Tixileiro tien un espaciu enorme cola barra pa tomar daqué, dende ehí aportes a la tienda con productos locales y una variedá de vinos de la zona enorme. Na parte de riba, el comedor, con cristaleres y vistes al pueblu y al entamu de la ruta. El sitiu ye preciosu.


Punximonos en manes de Jose pa la bébora y foi tou un aciertu. Muncho interés y conocencia. Empezamos con un Vermú blancu con Llima, un chorrín de Puertu d'Indies y Granadina. Buensímo (y más dempués de la ruta). Secu y toque duce.


D'aperitivu, Cecina de Valle de Forniella (El Bierzu), Forgaxes de Besos del Rey Silo y AOVE. Buenísimo. La cecina ye espectacular. 


El pan d'occidente sabéis que ye espectacular. Pos esti nun se quedó tras.


Empezamos bebiendo Panchín Branco. Vinu gallego pero fecho xusto na frontera con Asturies, en Negueira de Muñíz. Colo qu'ellos llamen "uva lexítima", esto ye, Albarín Blanco. Vinu del que s'ellaboren perpoques botelles, entra solo, con cuerpu, toque d'acidez. Gustónos enforma.


Pimientos Asaos en Casa, Massimo de Rey Silo y Anchoes. Menuda maravía.


Camudamos al mio favoritu de la comida, un Chacon Buelta 2016, con 24 meses en barrica. Una auténtica maravía de la que nun queden munches botelles (namás ficieron 1100 botelles). Mineral, con cuerpu, con acidez. Cómo echamos de menos los Nibias.


Tomate d'Ibias, Piparras y Ventresca d'Atún. Otru espectáculu. Si pilláis la temporada de tomates, nun la dexéis pasar, son d'otru mundu.


Costó dexalo, pero pasamos a Panchín Tintu. 100% Mencía. Meyora n'alendando un pocu, gustónos, tien acidez pero tou bien integrao.


Bacaláu al Estilu Tixileiro. Con pistu y pataques panaderes. Faenlo a baxa temperatura. Ye una pieza buenísima que sdesfái sola. Encantónos.


Camudamos a Aroma de Ibias 2018. Verdejo Negru, Carrasquín y Albarín Tintu. Con más acidez que l'anterior. Tamién precisa alendar un pocu. Bien bonu. Gustónos más que l'anterior.


Y llegamos al Chuletón. De Zarréu. Qué maravía.


Primero Jose presentónos la chuleta.


Y despiezola delantre de nós. Una presentación de luxu.


Vien acompañada de Pataques Frites y Pimientos.


A puntu d'españar, pero nun nos dexaron colar ensin probar los postres. Una Tabla de Quesos. Veigadarte, semi curao de cabra, del Bierzu. Geo de Lazana. Quesu Azul Chatín de Bembibre. Con mermelaes caseres.


Y con ellos, Sidra de Hielo de Viuda de Angelón. Casi cai una llárima d'emoción al ver la botella n'Ibias.


Un pocu de Llicor Café.


Pagamos 70€. 35€ per cabeza. Sitiu bien recomendable.


Acabante comer, Jose enseñónos les sos instalaciones.


Y casi quedamos a vivir ellí.


Pa baxar la fartura, encamentónos dar un paséu hasta'l Mirador El Pousadoiru. Un paséu de 1km dende'l mesmu hotel, y que forma parte d'una calzada romana. Dende ellí puede baxase al pueblu de Il Curralín, que sería una Farturruta tamién guapa d'unos 8kms.


Queda pendiente pa cuando volvamos. 


Nós acabamos nel Palaciu de Tormaleo, que ta a 10kms del Hotel. Del SXVIII, d'estilu barrocu, tien trés torres y non cuatro por espresa prohibición real una y bones la cuarta torre taba acutada a los edificios de la realeza. Llamentable l'estáu nel que s'atopa, que nun tea restauráu y que nun se pueda visitar. Ye un palaciu espectacular.


Según cuenta la lleenda recoyida por Berto Peña nel so llibru Un Paseo por la Mitología Asturiana, en dichu palaciu habitaba un trasno (asina llamen a los trasgos en dellos conceyos del occidente) y una de les sos aficiones yera entrar nes cuadres y trenzar les clines de los caballos, de tala forma, que yera imposible desenguedeyales. Cuando un caballu tenía les clines enguedeyaes dicíase que fuera acaballáu pol trasno.


Hoteles con SPA, Brañes abandonaes, Ríos, Montes máxicos, Miradores espectaculares, Palacios con lleendes y una comida con cocina y vinos de la zona. Una auténtica maravía. 


No hay comentarios

Publicar un comentario