Nueva Visita: Casa Noval

Señes: Cai Aceiterías, 9. 24402. Ponferrada. Llión

Teléfonu: 987 406 000

Web: http://www.casanoval.info/
Facebook: https://www.facebook.com/pages/Casa-Noval/
Anterior Visita: http://www.lesfartures.com/2015/03/casa-noval.html

Calidá: 4/5

Preciu: 25€

Comentarios: Parada en Ponferrada n'ún de los sitios que más nos prestó de la nuesa anterior visita. Casa Noval. Queríamos conocelo de día y amás, ufiertáronnos la posibilidá de tomar un menú por 25€.

El sitiu ye preciosu, asitiáu nuna cai piatonal en plenu centru de Ponferrada, tien una entrada con unes escaleres hasta'l primer pisu, y apuertes a la parte'l restorán. Ye un poco raru, pero paga la pena. Porque dientro, atopes con un ampliu salón, espaciosu y bien guapu.

Pero amás, al fondu, un increíble patiu interior con una terraza onde si fai bonu, puedes comer. Nel pisu de baxo tienen salonos privaos, con accesu al xardín, asina que tien que ser un sitiu perfectu pa celebraciones.

Comimos dientro'l salón. Y ufiertáronnos menú de fin de selmana. A 25€.

De primeru, Croquetes de Cecina y Calabacín y Quesu. Bien, bien bones, rellenu increíble de cecina ... Rellenes de verdá.

Pidimos tamién un Revueltu de Cogordes. Bien ricu, y con variedá de cogordes.

De segundos, Llombu de Merluza con alioli de Cecina. Bien ricu, anque a la merluza faltába-y un pelín de cocina. Pero platu bonu.

Sollombu d'Ibéricu a la Pimienta. De gochu. Nidiu y cola pimienta xusta. Bon platu.

De postre, recordábamos de la otra vegada la Tarta de Quesu, y sigue tando perbona.

Nel menú, vinu del Bierzu. Porque puede faese un menú con vinu local, daqué que paez impensable n'Asturies. Pago de Valdoneje 2016 Mencía. Amás taba ricu.

Agua y cafés convidáis, pagamos 25€ per cabeza.

Un sitiu preciosu, en plenu centru, pero alloñáu del xaréu "turísticu", onde amás se come perbién.