Apiñón Bistró + Kadabra

Señes: Cai Galiana, 30 - Avilés

Teléfonu: 984 390 398

Facebook: https://www.facebook.com/apinontapas/
Instagram: [@apinon_bistro] https://www.instagram.com/apinon_bistro/

Comentarios: Conocíamos Kadabra dende va unos años. Ellaboren na vecina Lleón, en Villadamangos del Pandorial, un pueblu camin d'Hospital de Órbigo, y echaron va años una mano a empezar a dalgún cerveceru asturianu.

Cerveza artesano, fecha con lúpulu de Llión (anguaño Llión ye'l provisor de Lúpulu d'España xuntu con Galicia), tien una imaxe guapa y ellaboren cerveces suaves, perfeutes pa empecipiase nel mundu de la cerveza artesano.

La meyor forma pa empecipiase ye faer una preba informal y risondera, probando, apurriendo lo qu'a caún paez-y, yá'l sitiu perfectu pa faelo ye'l Apiñón Bistró. Una propuesta distinta, atrevida, gayolera, pero seria nel trabayu qu'hai detrás. Y asitiada amás nel antiguu llamber, un sitiu realmente preciosu na Cai Galiana.

Empezamos probando la so Belgian White. Cerveza de trigu, llixera, con golor y sabor final a cítricu, anque llixeru. Entra bien. Perfeuta pa enfrescar.

El toque cítricu, pidía daqué cítricu, asina que Juan propúnxonos como primer bocao de la nueche un Ceviche de Llubina Selvaxe, con llangostinos, platano machu y alga. Tenedor y a esfrutar. Y esi fondu, directu a la boca, que nun se puede desperdiciar. Amiestu perfeutu d'ácidos pa llimpiar la boca y entamar.

Camudamos al so Golden Ale. Roxa llixera, suave y con poco cuerpu. Otra cerveza pa enfrescar y con abondo gas.

Vien con un Moxón Thai con Xelatina de Llimón, Aire d'Alfabaca y Lleche de Cocu. Buenísimo y pa comer d'un bocáu. Otru platu refrescante que ganó claramente a la cerveza.

Probemos la so cerveza más conocida. La so Pale Ale Ecolóxica. Cerveza fecho con ingredientes con certificáu ecolóxicu (única que nun tien llúpulu de Llión, yá que nun esiste nengún llúpulu con esi certificáu). Llixeru toque amargosu, llixeru, con un toque a malta y a cebera. La que más me gustó de toes.

Otru bocáu estupendu del Apiñón. Gyros de Pitu, marinao con Lleche de Cocu con Especias. Mueyu Cevicháu y cebolla encurtida, y un toque de Pepinu. "La versión ameyorada del Gyros de la esquina", según Pablo. Buenísimo.

IPA Kadabra. Toque más amargosu por mor del llúpulu, anque sigue siendo facilona.

Cola IPA, Hamburguesa Big Piñón. Cebolla, pepinu, mueyu secretu y bona carne. Otru bocáu buenísimo pa demostrar que puede faese bona comida rápida ensin necesidá d'estafar.

La so cabera cerveza foi la Red Ale. Cerveza con 5 maltes al estilu irlandés. Toques de malta, daqué de torrefactu y carambelu. Llixeru amargor a la fin.

Cola Red Ale, Tosta de Carpaccio de Novilla Asturiana, Mostaza y Berenxena Afumada. Ún de los favoritos de la nueche. Buenísimo.

Y como extra, de postre, un Brownie con xeláu de toffee.

Encantáronnos los bocaos del Apiñón. Risonderos, informales, y perbonos. Y Kadabra ye perfeuta pa empecipiate si tas de beber la típica cerveza media industrial española. Suave y con un diseñu curiosu.