Contact Me

Nombre

Correo electrónico

Mensaje

Hover Setting

default

Prado

Direición: Avenida Buenos Aires S/N - Bual / Boal
Teléfonu: 985 620 473



Recomendaciones: Pote de Rabiza

Web: http://www.hotelrestauranteprado.es/
Facebook: https://www.facebook.com/hotelrestauranteprado/


Calidá: 3/5
Preciu: 17€


Comentarios: El Suroccidente asturianu ye ún de los grandes desconocíos dientro y fora d'Asturies. Ye un territoriu con un enorme potencial qu'empieza a esplotar gracies a la puxanza del turismu.

Un domingu averamos a faer una Farturruta y tres un paséu preciosu hasta l'Altu de Penouta visitando'l Penedo Aballón (una mole de granitu trémbole que nun sabemos cómo se tien en pie) fuimos a comer al Hotel Restorán Prado. Asitiáu nel centru de Bual, fora tien una terraza onde tomar daqué tranquilamente si'l tiempu acompaña.

Desconocemos cómo serán les habitación del hotel, pero la zona del restorán ye bien guapa. Entrada típica de chigre asturianu, de madera y enllena de detalles, estrecha con 4 meses pa tomase daqué. Tres pasar por un pequeñu pasiellu abre una zona de comedor grande con una decoración clásica. Taba hasta los topes, así que si vais de fin de selmana, acutái.


La carta ta en Castellán, Asturianu ya Inglés.Tien bona variedá en carnes y pexes, y en dómina de caza, siempres vos ufiertarán lo que tengan fora d'ella.

El menú pintaba estupéndamente, y animámonos a comelo. Amás, ún de los motivos de la visita yera probar el Pote de Rabizas o Rabiza (o Pote de Bual). El Pote ta fechu con fueya tienra de nabu, fabes y compangu. Una variación de Bual del Pote Asturianu.


Taba espectacular. Con fabes, patates y la fueya la rabiza. Lleva compangu caseru, y eso nótase enforma nel tastu, con un cachos abondos de compangu pa tolos comensales. Pero pegamonos por repitir esa morciella de la que va costar escaecese. Como suel ser lo habitual nestos sitios, pota enorme al mediu la mesa y cada pocu pasando pola mesa pa preguntar si queríamos repetir. Un luxu. Si hai que poner dalgún "pero", ye que dalguna pataca taba más dura, como si les echaren dempués.


Tamién hubo Sopa de Pexe pa los que nun quixeron pote

De segundu platu, pidimos un pocu de too pa dir probando coses distintes.


El Cabritu foi de los favoritos de la mesa. Bien, bien ricu. Cómese perfeutamente ensin cuchiellu, una delicia que paez mantequilla. Vien acompañáu de pataques frites (de les verdá) y pimientos.


Probemos tamién les Carrilleres de Gochu. Otres que taben impresionantes. Carne de la bona, xugosa, tienra ... perrica. Tamién vienen acompañaes de pataques frites y pimientos.




Non quiximos dir ensin probar un Cachopu de Merluza. Suave y con un mueyu bien ricu, quesu qu'apenes se nota, pero con un puntín de sabor. Y una ración estupenda. Y más pa ser menú.


Los postres son toos caseros, y nun los podéis perder. Sobremanera'l Flan de Quesu. Sabor perfeuto con testura perfeuta. Encantónos. Otros pidieron, Flan de Mazana, un pocu fallíu ya qu'apenes sabe a mazana, paezse más a un flan caseru. Tarta d'Almendra, descomanadamente seca.


Colos cafés, traxéronnos clines. Industriales y insípidos, nun los pidáis. Nun entiendo cómo la hostelería asturiana nun curia nada la tema de los clines con productu asturianu calidable.


Pagamos 17€ per cabeza. Como podéis comprobar polo lleío y les semeyes, una rellación calidá-aprecio estupenda.


Quedamos con gana de probar más productu de caza, asina que queda pendiente otra visita.


No hay comentarios

Publicar un comentario