Casa Vicente

Direición: Avenida Galicia - Castropol

Teléfonu:  985 635 051

Recomendaciones: Pexe

Facebook: https://www.facebook.com/CasaVicenteCastropol

Calidá: 4/5
Preciu: 40€

Comentarios:  Empezamos a namorar de Castropol al traviés de les sos Ostres, y agora siempres que podemos averamos a esfrutar d'esi pueblín tan guapu. Teníamos pendiente visita a casa Vicente, del que dicen ye'l meyor restorán de Castropol, y la verdá ye que salimos encantaos.

Asitiáu nun llugar envidiable, con unes vistes impresionantes a la Ría del Eo, Figueras y Ribadeo; Casa Vicente lleva dende 1940 ufiertando productu fresco de primera. Nun vas tener problemes p'aparcar, yá que tien una escampada enorme xustu en frente. Y encamentamoste que dexes el coche y antes y/o dempués de la comida pasies tranquilamente per Castropol. Va prestate.

Anováu va unos años, el restorán ufierta una decoración clásica y lluminosa, onde destaquen les sos vistes dende les cristaleres a la ría. Asina que si podéis, pidíi mesa bien pegaos a les ventanes. A la entrada tien una barra, con una zona de relax bien guapa pa tomar daqué. Y na parte de tras ábrese un salón enorme, con distintos altores, con meses amplies y siempres espaciaes. Bien guapu.

Comimos 4 persones, pidimos entrantes pa compartir y un platu por persona.

Empezamos con un Pastel de Merluza y Centollu. Yá sabéis, el pastel de centollu o te presta o lu odies, y ésti, entemecíu cola merluza, taba suavín. El sabor del centollu dexa un regustín pero apenes se nota. A nós prestonos.

Amás, ye una bona ración.

Croquetes de Xamón. Bonísimes. Otra ración enorme de 13 croquetes, que se desfaen, y con bonos cachos de xamón. De lo meyor de la comida.

De platos, pidimos Raya, fora de carta. Impresionante ración, pa un pexe bastante desconocíu na gastronomía que nos encanta. Ye un pexe cartilaxinosu, ensin espines, blancu, y con un sabor suave; polo que ye bien importante l'acompañamientu que se-y ponga. La nuesa taba perfeuta,

Ufiértennos distintos panes pa la comida, y casi nun quedó nada con esi mueyu. Perbona.

Cachopu, otru de los platos famosos del local aparte del pexe ya'l mariscu. Y la verdá ye que taba bien bonu. Con pataques de "verdá", bon  rellenu y carne que se desfai. El quesu ye suavín.

Habiendo Salmonetes, siempres hai que pidilos. Ración con dos enormes salmonetes en platu acompañaos d'una ensalada y pataca cocida. Pocu qu'añadir a un pexe que nos encanta pol so sabor. Bonísimos.

De postres, compartimos al centru una Tarta de Quesu, que nos encamentaron. Con base de galleta y una especie de mousse suavina. Enorme cachu circular, por cierto. Mui rica.

Coulant d'Ablana y Chocolate, maraviyosu postre, ensin el típicu bañu de chocolate per fora. Muncho más llixeru y acompañáu d'una bola de xeláu d'ablana.

Pa beber, un par de botelles de Pazo Baion. Albariño sobre madre del so propiu viñéu, con bona persistencia y que va xenial col pexe. La gama alta del Condes de Albarei. Bonu.

Tienen vinu de Cangas, anque namás atopamos referencies a tintos. Y Sidra de mesa Tareco.

Con cafés y Agua Fuensanta, pagamos 177€, a 45€ per cabeza. Nun ye un sitiu baratu, pero'l productu ye de primera y tou taba per bonu. Sitiu recomendable pa dase un homenaxe.