El Molín de Mingo

Direición: Les Canaliegues - Peruyes - Cangues d'Onís

Teléfonu:  985 922 263

Recomendaciones: Pitu con arroz

Facebook: https://es-la.facebook.com/pages/El-Molin-de-Mingo

Calidá: 4/5
Preciu: 30€

Comentarios: Cuando te llama per teléfonu Juan Luis García, sumiller de Casa Marcial, y te diz que prepares el 4x4 pa llegar al Molín de Mingo, sabes que la cosa pinta bien; pero cuando llegues al preciosu pueblu de Peruyes, y ves que la carretera camuda en caleya, que la caleya acaba en caleyu y qu'a la fin s'abre un valle pequenu con un conxuntu de cases, entós yá quedes cola boca abierta.

Molín de Mingo ye un antiguu molín asturianu rehabilitáu, con rio al llau. El conxuntu ta formáu por un par de cases yá un horru. Y tou con unes vistes precioses. Si amás acompaña'l día y podéis comer fuera (o tomar el café), entós la esperiencia conviértese a cencielles en perfeuta.

Ye un espaciu abiertu, con zona por que los crios xueguen, con pitos de caleya, pollinos, cabres ..., y ensin cobertoria. Ideal pa relaxase.

La so cocina ye casero, nun ye esperéis muncha creatividá; pero sí productu de primera, caseru, y perbién executáu. ¡Ah!, y na carta nun hai pexe. Ye un sitiu p'amantes de la bona carne, asi que quedais avisaos.

Entamamos tomando unes botellines na zona l'horru.

Y siguimos la comida na zona habilitada que tienen debaxo l'horru, un sitiu decoráu en piedra y madera, preciosu, muncho más informal que'l salón del edificiu principal. Destacar que tola decoración del conxuntu ta cuidadísima hasta l'últimu detalle. Meses amplies y cómodes pa sentite a gustu, y atención mui afayadiza, a pesar del llenu del local.

D'entrante traxéronnos una Crema de Gamonéu, suave, casi más pa comer en cuyar que pa untar, con un toque d'aceite. Ta mui rica, anque apenes-y notemos el puntu de Gamonéu. Pa moyar col pan, perfeuta. Amás tráyennos un pan turrao p'acompañalo. Ye una ración enorme.

Siguimos con unos Tortos de Maíz Variaos. Mini tortos variaos, d'emberzáu, picadiellu, güevu con bacon, compota de mazana y bacaláu. A destacar los tortos, llixeros y nada grasientos. Yá'l conteníu, quitando'l que picadiellu yera "suavín", prestó a cada cuál más. Xenial el bacaláu, que nun lo probáramos con tortos.

Dos raciones de Croquetes, de Xamón y de Compangu. Caseres, y mui riques. Los dos tipos. con una bexamel perfina que se desfai y un sabor impresionante.

De platos principales pidimos,

Pitu con Arroz. Sí, pitu con arroz y non arroz con pitu. Enormes cachos de pitu caleya, del escuro, del que sabe. Y l'arroz nun se queda tras, nada qu'envidiar al famosu arroz de Casa Marcial, en serio, nada qu'envidiar. Nel so puntu tou. Pidimos 4 raciones pa 5 persones y sobró. Son raciones enormes. Amás, l'arroz ta perfeutu dende'l primer minutu hasta qu'acabamos la ración, y el toque que-y da la carne ye perfeutu. Buenísimo.

Na mesa, tamién pidieron un Platu Típicu. tortu, güevu, picadiellu y pataques. Pocu más qu'añadir a esta bomba casera que taba buenísima. Eso sí, nun hubo quien lo acabara. Enorme.

Y Presa Ibérica. Tamién acompañada d'unes pataques de les de "verdá" y con unos cachos de carne buenísimos de calidá escelente.

A los postres nun nos animamos. Nun entraba más. Asina que salimos fora, que'l día convidaba y fuimos al sol a tomar los cafés y dalgún clin.

Pa beber, carta pequena pero con toques de calidá (nótase la mano de Juan Luis). Decidimos por un Pésico Blanco, escelente como siempres, y portándose xenial col arroz. Vinu blanco asturianu buenísimo. Eso sí, a 30€ la botella ... abondo caru.

A la fin, salimos a 40€ por persona, pero namás 20€ yeren de vinu. Con otru más afechu, relaxaría'l preciu.

Un sitiu maraviyosu pa perdese y esfrutar de la so comida casera y de la zona. Eso sí, imprescindible acutar. Suelse enllenar. ¿A ameyorar? La carta vien ensin IVA y la sidra taba caliente. Ellí nun hai cobertoria,  asina qu'escaecéivos de pagar con tarxeta.