Direición: Espineo - Mieres
Twitter: [@sidrapanizales] https://twitter.com/sidrapanizales
Calidá: 4/5
Preciu: 23€
Anterior Visita: http://www.lesfartures.com/2016/07/bokaos-con-sentimientu-quesos-delvira.html
Comentarios: Llagar Panizales préstanos pola vida, pola so filosofía y, tamién pola sidra que faen. Fueron pioneros n'anovar pero ensin perder nunca de vista'l llabor d'un llagar tradicional de sidra. Falámosvos d'ellos unes cuantes vegaes, cuando fuimos a vistalos per primer vegada, cuando presentaron Viesk y cuando entamamos un Bokaos con Sentimientu cola so sidra y los quesos d'Elvira García. Pero teníamos pendiente dir un día a conocer el so restorán.
Asina qu'averamos un domingu ensin reserva previa, y casi quedamos coles ganes porque'l llocal taba a españar, y mira que ye grande ... asina que yá sabéis. Si vais de fin de selmana, meyor acutái.
Si revisáis les semeyes de los otros artículos, podéis faevos una idea del llagar. La zona de baxo ta acutada para ellaborar tolos tipos de sidra que faen, incluyida la natural, y la parte de riba correspuende al restorán, con terraza, zona so cubierta y comedor interior grande. Y taba tou llenu.
La carta del restorán ye tradicional, col cocíu y los arroces como fuerte. Sé que tienen un corderu a la estaca con muncha fama pero supongo que ye por encargu.
Nós pidimos Bombón de Foie con Compota de Mazana. Ración enorme, pero enorme, de foie cubiertu de cacáu. Bien ricu, y acompañáu amás de mermelaes caseres de naranxa y artimora. Tuvimos que cortanos para nun acabalo tou porque casi enllenamos solo con ello.
Arroz con Pitu. Espectacular. Pitu de los de verdá. Buenísimo, y con un arroz col mesmu caldu que ta para morrese. Otra ración enorme para dos persones, y viendo que dexábamos abondo na paellera, metiéronnos lo que sobró n'un tuper del que dimos bona cuenta en casa a otru día. Panizales dende yá pasa a ser unu de los nuesos sitios favoritos para tomar arroz.
Imposible probar un postre. Imposible.
Para beber, Sidra Panizales. Siempres bien echada y a temperatura perfeuto. Lo interesante del Llagar Panizales ye probar cualesquier de los sos distintos tipos de sidra qu'ellaboren, amás de la natural. Llegar, y pidise un aperitivo de sidra de Viesk, y comer con Titán, Hera, Hera Rosée o Sidra Brut Casería. Pero quedamos cola natural.
Lo que sí probemos, y yá foi dempués na terraza cuando salimos para pidir el café, foi la so Sidra de Xelu Panizales. Perfecta para quesos azules y postres ... Sidra de xelu d'unos 12%, dulce, mui duce, para beber ensin xelu y que ta per bona.
Pagamos por tou, 56€. Gran sitio Panizales. Un llagar típicu, pero qu'ufierta, amás de la natural, sidra distinto, y con una cocina casera bien bona.
No hay comentarios
Publicar un comentario