L'Artesana: Presentación Porterhouse

Direición: C/ Santa Clara, 8 - Oviedo / Uviéu

Facebook: https://www.facebook.com/Lartesana2/

Web: http://www.theporterhouse.ie/
Facebook: https://www.facebook.com/PorterhouseBrewing/
Twitter [@Porterhousebars]: https://twitter.com/Porterhousebars

Comentarios: Diz muncho a favor de los mozos de L'Artesana que Cervebel, la distribuidora n'España de la Cerveza Irlandés Porterhouse, escoyera'l so nuevu local n'Uviéu pa presentar les sos cerveces y la so nueva imaxe n'España.

Lleven abiertos pocu más d'un mes n'Uviéu, anque celebraron yá'l so segundu aniversariu en La Felguera, y yá tán entamando presentaciones d'una de les marques de cerveza más importantes d'Europa. Pablo y Edu tán faciendo un trabayu increíble.

Pa la presentación, cuntamos cola presencia de Neil Fisher, export manager de Porterhouse, y d'Erik Coene, de Cervebel, belga afincáu en Navarra, distribuidor de cerveza, una de les razones poles qu'agora bebemos tan bona cerveza per estos llares y vieyu conocíu de Les Fartures (inda recordamos una prueba de cerveza belga nel Cabanón va faer unos 10 años).

Neil falaba y Erik traducía (qu'entender a un irlandés falando nun ye nada fácil). Faláronnos de la filosofía de la empresa, venturera, un poco alloriada y con ciertos toques de gamberrismu bien propios de los oríxenes de la filosofía "craft beer" o cerveza artesano, como la traducimos equí.

2 primos irlandeses empezaron fai 21 años a faer cerveza en Dublin. Dublin, capital mundial de Guinness, con un monopoliu total. Por tanto, como naide-yos distribuyía la cerveza, la so única opción foi abrir un Brew Pub onde vendíen la so propia cerveza. ¿Y ónde lu abrieron? En plenu Temple Bar, el barriu de "movida" por excelencia en Dublín. Amás, faciendo'l mesmu estilu de cerveza que Guinness, tan propiu d'aquellos llares.

Foi-yos tan bien, qu'acabaron abriendo otros Brew Pubs n'Irlanda, en Londres o Nueva York. Inclusive abrieron el so propiu hotel na mariña irlandesa. Agora ye la fábrica de cerveza artesano más grande d'Irlanda.

Les sos cerveces échense con nitróxenu, como la Guinness, lo cual apurre la característica espluma cremosa a la que tamos toos avezaos. Por eso, resulta tan difícil la so esportación, yá que precisa un cañero específicu pa sirvila. Yá adondaron al embotellar la so cerveza (primeramente namás podíes beber la so cerveza nos cañeros de los sos propios chigres) por cuenta la alta demanda, y agora abren mercáu dende Dublin al restu'l mundu.

D'ende que, anque yá llevemos un tiempu esfrutando de les sos botelles en dalguna cervecería asturiana, vinieren presentanos la so cerveza oficialmente.

Empezamos cola so cerveza más suave, Porterhouse Red Ale, per típica de la zona d'Irlanda. Nidiu, de 4,2%, de color coloráu escuru, turbia. Una cerveza llixero, onde gana la malta y qu'inclusive tien dalguna nota de carambelu.

Con cada cerveza, porque ési foi otru de los puntazos, probemos una cerveza o pinta per cabeza, cuando lo normal nes prebes, ye compartir una botella ente 3 persones (ye lo que pasa cuando xuntes a un irlandés y un belga con dos llocos de la cuenca), L'Artesana púnxonos una tapa que pegara con ella. Nesti casu, un Taragañu de Merluza y Puré de Pataca con Mahonesa Azul. Al más puru estilu Fish and Chips de la zona.

Siguimos col so Plain Porter. L'estilu porter ye'l clásicu de la clase obrera nes isles. Cerveza negro, con amargor proveniente de la malta turrada y del lúpulu, d'unos 5% d'alcohol.  L'amargos y el secante del final enfresquen enforma y fai que nun puedas parar de bebela. Mui rica.

Con Galleta Salada con Deconstrucción de Tortiella de Bacaláu. Mui ricu'l bacaláu col hoxaldre. Gustó enforma.

La rareza la nueche vieno cola so Oyster Stout. Una cerveza tipo Stout (premiu al qu'atope un entendíu en cerveza qu'estreme una porter d'una stout. Son bien asemeyaes) a la que-y echen unes 100 ostres vives per barril en saques de malla, mientres la cocción de la cerveza. La ostra apurre salín y nótase. El sabor ye bien particular, distintu a tou. Salín, amargosu y con un toque duce con solu 5,2% d'alcohol.

Amás primero tomámosla en botella, y darréu en pinta. De barril. Pa que comprobáramos la diferencia ente'l carbónicu de la botella yá'l nitróxenu de la pinta. Evidentemente, la pinta ganó en cremosidá y en complexidá. Gustóme abondo más.

Vien con un Hoxaldre de Verduras y Gambes con Mueyu d'Ostra. Otru bocao esceicional d'hoxaldre que foi perfectu cola cerveza.

Acabamos cola xoya la corona, Celebration  Stout. Una Imperial Stout d'unos 7% que s'ellaboró pa celebrar el décimu aniversariu de la cervecería. Buenísima cerveza negro. Más fuerte pa tomar a temperatura ambiente en dómines de fríu, con notes de chocolate y café. Xenial pal postre. Tienen amás ediciones avieyaes en barriques de güisqui que son un espectáculu.

Y con ella, el postre, Brownie de Chocolate con Crema de Naranxa y Forgaxes de Chocolate y Piel de Naranxa. Combinación clásica con un imperial stout, pero bien efectiva.

Nueche completa. Con una organización de luxu, esfrutando d'una cerveza que siempres nos prestó, y amás honraos de qu'escoyeren la nuesa tierra pa presentala.