Contact Me

Nombre

Correo electrónico

Mensaje

Hover Setting

default

Origens


Direición: Rua de Burgos -  Évora - Portugal
Teléfonu:  +351 266 704 440 / +351 964 220 790



Web: http://origensrestaurante.com/
Facebook: https://www.facebook.com/origensrestaurante/
Twitter [@origensfood]: https://twitter.com/origensfood
Instagram [@origensrestaurant]: https://www.instagram.com/origensrestaurant/


Calidá: 4/5
Preciu: 20€


Comentarios: Ye una gociada cuando atopes por casualidá un sitiu onde comes a gustu, pagues pocu y tou ensin planialo.

Atópeste nuna ciudá desconocida (Évora), ensin munches referencies pa investigar sobre restaurantes más qu'el archiconocíu Tripadvisor (que dalguna vegada atinó, pero otres ...), y de sópitu una semeya del puestu númberu 30 de la llista te llama l'atención y decides probar y ... atines.


Origens ye un llocal pequenu asitiáu nuna d'eses binielles d'Évora camín de la Catedral y de les ruines romanes, que tien tantu encantu. Ye un llocal pequenu, que s'enllena fácil (asina que meyor acutái, que nós casi nos tenemos que quedar coles ganes), cola cocina dafechu abierta al fondu.

Meses pequenes y estreches, más pensáu pa grupos pequenos. Y un pocu apetiguñáu tou, pero en cuanto te sientes y t'atienden ... ún s'escaez tou y empieces a esfrutar.


La decoración ye bien guapa y ta mui cuidada. Basen la so cocina nel productu llocal con un toque de creatividá, pero curiando enforma'l productu. Siguidores del movimientu Slow Food.

Otru de los aspeutos a destacar (y podemos estender a tolos llocales de Portugal, yá comiéramos meyor o peor) ye l'amabilidá del personal. Siempres intenten falar en castellán, esforciándose n'entendete (anque-yos falemos nun amiestu d'asturianu-portugués), con una sorrisa na boca ... realmente te sientes perbién tratáu. Y n'Origens, sobre manera.


Entamamos con un aperitivu de la casa, Quesu Fresco Llocal con Cacagüeses. Suave y refrescante, y xenial la testura colos cacagüeses integraos. Gustónos enforma, anque nun pudimos apuntar qué quesu yera.


Pidimos d'entrante una Crema de Melón con Xamón. Fora del llocal tenía d'haber unos 35º, asina que precisábamos daqué refrescante, y cumplió. Lleva unes flores d'apiu, que-y dan un contraste interesante y con forgaxes de xamón. Mui ricu.


Siguimos con unes Sardines Asaes nun Turráo d'Ayu con Mueyu de Tomate. Yá veis la semeya, maravía de platu que taba buenísimo. La sardina predomina, el toque d'ayu, el mueyu de tomate, pimientu, apiu, rúcula ... buenísimo.


De platu pidimos Pollines en Vinu Tinto. Brochetes de gochu negru en vinu tinto con cebolles, xudíes verdes y puré de pataca. Desfácense soles, col mueyu yá'l puré ... xeniales.

De postre ufiértennos o un platu de fruta o la so "confíe nel chef". Viendo lo visto, como para nun confiar en Gonzalo Queiroz. Y atinamos.

Tolos platos pa compartir.


Un Brownie de Chocolate con Nata, arándanos, cereces y galleta. Y no fondero ... Nutella. Cenciellu pero bien ricu. Compartimos el postre pa dos persones.


Pa beber, vinu local. Encamentáronnos Monte da Ravasqueira Blanco 2014. Y gustónos enforma. Lleva uva albariño y viogner, una uva bastante desconocida qu'apurre un toque a especies importante. Un vinu fresco, con llargor en boca y un toque astrinxente. Gran descubrimientu.


Al rematar la comida, el chef Gonzalo Queiroz vieno preguntar si nos prestó la comida ya ufiertónos un vinu duce portugués. Adega Coop. Borba. 18 graos pa un vinu que nos sirven del tiempu, Entra duce y acaba con un toque amargosu prestosu. Gustónos.


Tienen una bona carta de vinos alentejanos, sobremanera, y portugueses polo xeneral.


Siempres presta que daquién s'esfuercie tantu p'asoleyar los sos productos, con tan bon gustu y tan bon faer como Gonzalo Queiroz yá'l so equipu. Realmente salimos maraviaos d'Origens, encantónos. Y pagamos por tou, con cafés, 40,50€. Impresionante rellación calidá-aprecio.


No hay comentarios

Publicar un comentario