Nueva Visita: Aramar

Dirección: Sablera Aramar, entrada per carretera d'Antromero, AS-239. Gozón

Recomendaciones: Va restavos tou

Calidá: 4/5
Preciu: 23€

Facebook: https://www.facebook.com/pages/Aramar-Playa/
Instagram: [@aramarplaya] http://instagram.com/aramarplaya

Anterior Entrada: http://www.lesfartures.com/2015/08/nueva-visita-aramar.html

Comentarios: ¿Asina que yes de los pocos qu'aina nun conoz Aramar? Viendo la cantidá de visites que tenemos nes sos entraes, el feedback que nos dais y lo que nos cunten Marcos y David, ensin dulda, Aramar ye'l chiringu de moda n'Asturies, y la verdá ye que lo merecen.

Como queríamos faer semeyes y esfrutar tranquilamente de les novedaes d'anguaño na carta, averamos un día ente selmana nublao, porque de fin de selmana o si fai de sablera, aquello ta pa españar.

Yá conocéis la redolada, un prau con unes vistes sobre una sablera de pedreru preciosa, onde ún puede bañase ensin peligru (con unes chancles) y onde s'agüeya una capiya a la que namás se puede aportar cola marea baxa, al fondu. La parte mala que tienen ye l'accesu; esperemos que'l conceyu ponga les piles ya igüe la ponte que conecta Lluanco con Aramar.

Tres l'ésitu del caberu añu, Marcos y David invertieron p'ameyorar el chiringu. Ampliaron y ameyoraron les instalaciones de la cocina pa que Marcos pueda "crear" al debalu y sorprendiéronnos con una chalana-asientu que nos encantó. Ameyoraron el techu, modificaron los baños ... estéticamente ta bien curiáu.

Amás, diéron-y una vuelta a la carta y podemos aseguravos que tres la comida que vos vamos cuntar, comimos n'Aramar meyor qu'en munchos restoranes.

Oficialmente yá tienen sidra, y amás Viuda de Angelón, tantu la natural como la DO Prau Monga. Asina que foi la bébora escoyida mientres la comida. Siempres que podemos, bebemos DO.

Pa entamar la comida, con sos Fogaces de Pan de Lluanco con Tomate n'Aceite y Sal de Naranxa. Una auténtica gociada. Pan "de verdá" col toque de tomate y el sal de naranxa.

Como entrante, pidimos Carpaccio de Xata Asturiana con Forgaxes de Quesu Gamonéu. A priori paecía un platu contundente, pero al contrariu, ye un platu frescu, perfeutu pal branu. El carpaccio ta buenísimo, y les forgaxes de quesu apurren en cuenta de matar el platu. Xenial toque d'alcaparres.

Una gociada.

Como platu principal, pidimos pa compartir Llombu de Bonitu a la Plancha con Mueyu Romescu. Precisamente acababen de traer el bonitu, más frescu imposible. Coméntennos que la so hamburguesa sigue siendo la estrella la casa, pero que los veceros tán respondiendo perbién a esti platu. Y ye que ta buenísimo. Bonos cachos de llombu, con un mueyu que tien un toque suavín de picante de primeres. Sía comiquiar, si'l bonitu ye bonu, y ésti lo yera ... el mueyu casi nos sobra. Amás vien acompañáu con unes pataques que nos encanten.

Platazu.

En cuenta pidir otru platu, fuimos a los postres, y ye que nun nos podemos resistir a esa espectacular Tarta de Quesu con Xeláu d'Heliu, igual de maraviyosa que siempres.

Hai de probala.

Amás, probemos un postre nuevu d'anguaño, la Copa Banoffee. Un postre cenciellu pero resultón, que nos encantó.

Toques de plátanu, toffee, ñata ... buenísimo.

Con unes botelles de Prau Monga, pagamos dos persones 45€. Como veis, una rcp bien bona, amás teniendo en cuenta les vistes, la decoración y l'ambiente qu'ellí s'alienda.

Amás, acepten TicketsRestaurant. 

Siguimos namoraos d'Aramar, cada añu más. Y tu, ¿ainda sigues ensin conocelo?