Nueva visita: Crocante

Direición: Calle Rosario 7, Cimavilla, Xixón

Teléfonu: 984 84 64 54

Facebook: https://www.facebook.com/pages/Crocante/311061692340144

Visites anteriores: 
http://www.lesfartures.com/2015/03/nueva-visita-crocante.html
http://www.lesfartures.com/2014/02/crocante.html

Calidá: 4/5
Preciu: 35€

Gústanos esti sitiu, la so llocalización na Cimavilla, y encántanos la so comida. Por eso volvemos cada ciertu tiempu...y cómo suelen camudar carta y tener nueves creaciones, siempres hai daqué por probar...

Yá describimos el llocal n'otres entraes. Añadir qu'agora tienen tamién una segunda planta como comedor, colo que consiguen una mayor bayura de xente...y suponemos qu'acabar agotaos ...


Volvimos al primer turnu, a les 21.15, ya que como yá comentamos otres vegaes, entendemos que nun podríen salir alantre ensin intentar doblar les meses...Entá siendo ceo, el primeru comedor taba completu. Suponemos que nun van tener problemes de serviciu agora que tienen un comedor más pa la so per reducía cocina. Sicasí, el serviciu nel nuesu casu foi rápidu, atentu y distendíu. Como gusta.

Repetimos el vinu la nuesa cabera visita, un Ribeiro, The Flower and the Bee, un comodín:

Siempres presta llanzase a los fora de carta, porque son o nueves creaciones, o productos del día, colo que siempres cumplen mires. 

Asina que n'atendiendo les maravíes que nos cantaron de les Navayes con Mueyu de Miso a la plancha nun pudimos aguantanos. Y cumplieron. Delicioses!!!!

Llamónos l'atención una Lasagna de Centollu y Oricios. Guapa presentación. Maraviyosu sabor. Ciertu qu'el oricio nun destaca, costaba detectar el so matiz, anque en dellos taragaños faese notar. Pero'l platu en sí, fantásticu:

Y otru fora de carta, Cachopinos con mueyu de mazana. El mueyu espectacular, les pataques bien frites. Gústennos asina. La carne perrico. En xunto, xenial. Nun quedó restu:

Y acabamos con otru sorpresón. Encamentáronnos con enfotu un postre de nueva creación. Una Crema de Pera con chocolate, menta y carambelu. Comiendo de baxo enriba, como encamentaron, entemeciendo ingredientes.

Presentáu nun vasu. Simple pero resultón. Foi'l final perfeutu pa una gran cena. Combinaciones perfeutes. Nada empalagosu. Que lo sigan preparando porque vamos dir a por más:

35€ persona. Bien comíos y bebíos. Xenial. Pol sitiu, l'atención, la comida y les sorpreses.

Como solemos dir de cutiu últimamente, ponemos otros platos de los que probemos y que, como'l restu, tán increíbles.

Pulpu al Caricote con Ali-Oli y Pimentón. Bien de puntu, muncha cantidá y bona presentación:

Canelones de Pitu Caleya y Fungos. Espectacular. Otru platu distintu que se curren perbién:

Tataki d'Atún. Nunca falla equí:

Convertióse yá, pa nós y muncha xente, nun imprescindible de Xixón. Vamos volver y van volvenos a sorprender. De xuru.