Chapones Tierra Ástur, la sidre bien echao

Direición: C/ Gascona, 9 - Uviéu / Oviedo
Teléfonu: 984 846 624



Web: http://www.tierra-astur.com/
Facebook: https://www.facebook.com/TierraAstur
Twitter [@tierraastur]: https://twitter.com/tierraastur
Instagram [@tierraastur]: http://www.instagram.com/tierraastur
Youtube: https://www.youtube.com/user/tierraastur


¿Por qué echamos la Sidre Natural Asturiana? Munches persones inda piensen que ye por daqué estéticu o marketing, pero'l diseñu la botella, del vasu la sidre y too'l ritual de l'echao o escanciao de la sidre ye ún de les mayores meyores de i+d+i de la hestoria d'Asturies.

Echase sidre n'alto dende la botella pa consiguir el mesmu efectu que se consigue dende'l tonel. D'esta forma, cuando'l llíquidu ruempe escontra'l vasu produz unes pequenes burbuyes d'Anhídrico Carbónicu qu'abasnen l'arume la sidre. Reafíten les cualidaes de la sidre, espertando'l carbónicu endóxenu y volatilizando l'ácidu acético (más desagradable pa la ñariz) que tien la sidre. Por cuenta d'eso, el vasu la sidre ye anchu, pa poder introducir la ñariz y atopar eses propiedaes olfatives.


¿Echar o Escanciar? La sidre échase. La palabra echar vien acomuñada a la cultura'l vinu, anque'l so usu ta consiguiendo que práuticamente s'axunte namás a la sidre. Ye un defeutu cada vez más común que refuguemos el vocabulariu propiu de la sidra -asturiano yá único nel mundu-, p'adoptar términos provenientes del vinu ensin nenguna necesidá.

Recordemos qu'Asturies ye l'únicu llugar nel mundu onde la sidra s'echa, ye daqué únicu, diferencial, con un atráctivo turísticu inmensu y amás, con un por qué que-y da sentíu.  Y como bonos asturianos que somos, tamos cargándonoslo. En cuenta d'esplotalo yá utilizalo como seña d'identidá, cada vez cuesta más atopar una sidrería onde echen la sidre fora la barra, y comer nun comedor nuna sidrería con un camareru qu'eche la sidra empieza a ser práuticamente imposible. Cada vez tán puxando más los tapones, escanciadores elléctricos, inventos con botones integraos na paré; xuníu a que nun esiste una figura d'escanciador reconocida llegalmente, nin siquier una asociación d'echadores (anque hubo dalguna tentativa va unos años).


Y non tola culpa ye del hosteleru. El nuesu Principáu sigue entamando los sos actos oficiales con Vinu Rioja y los nuesos conceyos (salvo rares esceiciones) como muncho, camuden a Ribera de Duero. Los nuesos llagareros esmolecen-se de pañar les meyores mazanes, y faer el meyor productu posible, pero nun s'ocupen de controlar que llegue n'óptimes condiciones al consumidor final resalvando tol procesu d'almacenáu, caltenimientu y serviciu al veceru. Con tal de vender la sidra, almitimos lo que sía.

Nin siquier llibramos el consumidores, bebemos la sidra comoquier, danos igual que la mazana venga de Polonia o de Nava (pa qué vamos pagar la diferencia que cuesta una sidra con DO), y pocu más y montamos la Tercer Guerra Mundial cuando a unos hosteleros asocedióse-yos xubir el preciu de la sidra 30cts. Menos de 3€ por una botella de la que salen 6 culetes, eso sí pagamos bien gustosos sobrecargos del 200% en botelles de vinu, sacantes sía asturianu, nun vaya ser.


Si a esto sumamos qu'otros territorios con mayor capacidá de valorase a sigo mesmos empiecen a entamar concursos d'echadores de la so sidre, como Galicia o'l País Vascu, en curtiu vamos empezar a lleer que l'echao la sidre ye un inventu vascu y qu'espicha ye un términu gallegu.

Por eso ye tan importante que Tierra Astur, la mayor cadena de sidreríes d'Asturies, entamara una xornada pa reivindicar l'echao la sidre; y convocáranos pa esplicanos cómo curien ellos la sidre, desque la reciben hasta que la sirven al consumidor final.


Pa ello cuntamos cola presencia de Lluis Nel Estrada, collaborador de Tierra Astur y Sabino Pérez, maestru escanciador de Tierra Ástur.

Dambos cuntáronnos la importancia d'echar la sidre y cómo Tierra Ástur fai 8 años creó los Chapones Tierra Astur. Esisten 3 categoríes de chapones: bronce, plata y oru. Y por cada chapón que llogra un echador de Tierra Astur la so nómina vese amontada. Los exames (voluntarios) suelen ser trimestrales yá'l xuráu ta compuestu por persones especializaes nel mundu la sidre, siempres presidíu por Sabino.


Los chapones son visibles nes solapes que lleven siempres los camareros, y toles sidreríes Tierra Astur cunten con dalgún echador que tenga'l distintivu Chapón de Plata. Anguaño namás Sabino ostenta'l Chapón d'Oru, y non tolos echadores tienen chapones, nin siquier el de bronce yá que siempres busquen la escelencia máxima.

Mientres la presentación el mesmu Sabino (Chapón d'Oru) y dellos escanciadores chapones de plata diéronnos a probar los distintos palos de sidra natural qu'ufierta Tierra Astur: MuñizLlarada Etiqueta NegraTrabanco Selección y Sidra Llaneza (DO de Fonciello).


Per bon entamu de Tierra Astur, evidentemente la solución más afayadiza sería una figura d'echador regularizada por un organismu públicu que controle a TOLES sidreríes, pero a falta de voluntá política, bones son estos entamos privaos.

Dexámosvos un resume de la xornada emitíu pola TPA.


Yá'l spot que realizó la mesma sidrería


0 comentarios :

Publicar un comentario