Latiza & Picakechinga

Señes: Calle Aurelio Martínez, 7 - Ḷḷuarca

Teléfonu: 618 030 273

Facebook: https://www.facebook.com/GASTROBARLATIZA
Instagram: [@latizagastro] https://www.instagram.com/latizagastro/

PICAKECHINGA

Señes: Calle Galiana, 12 - Avilés
Teléfonu: 618 030 273

Facebook: https://www.facebook.com/picakechinga/
Instagram: [@picakechinga] https://www.instagram.com/picakechinga/

Comentarios: A Luis presta-y el rock, y nun namás nótase na so forma de vistir, tamién na so cocina. La so cocina ye sabrosa, tien un puntu atrevíu, y peca (benditos pecaos) de potencia. Por eso, nun tendría sentíu que se xunte pa faer un A 4 Manos con daquién que nun comparta esa mesma filosofía na cocina.

Y Naimity y Arancha son perfectes pa eso. Abrieron va unos años Picakechinga n'Avilés, en plena cai Galiana, xusto debaxo d'Apiñón, nun acepten reserves y ta siempres llenu de fin de selmana. Fuxen de los "tópicos" de la cocina mexicana, y, como bona mexicana que ye Naimity, enséñente la cocina mexicana de cai, sabrosa, potente y, volvemos a lo d'antes, con muncho rock'n'roll. ¿Cómo nun diben llevase bien con Luis?

Empezamos con un aperitivo na barra, de pie, informal, pa romper el xelu. Cola espluma preparada ellí mesmu. Pa tomar de bocao, en cuyar, y acompañalo de la bébora que tuviéramos mientres esperábamos a sentanos. Fresa, espluma de quesu Besos de Rey Silo y ... peta zeta. Refrescante y esplosivu na boca. Xenial.

Avisu. Salimos a españar. Los platos yeren contundentes non, lo siguiente, y enriba con cantidaes. Picakechinga empezó atacando col so Molotito de brie/oaxaca y chile poblano. Base de tosta de maíz, pa tomar de 3 o 4 bocaos, coles manes y esfrutar del cruxente la base, del toque sabrosu la verdura yá'l platu cruxente que corona'l platu. Bien bonu.

Latiza propúnxonos la so Versión del Marmitako. Y lo de versión nunca meyor dichu porque inda nun tábamos en temporada de bonitu. Ye con Albacora, familia del atún. Preside'l platu una espluma de pataca con un toque de fruta en verde de trufa. La combinación final del platu ye un caldu de 8h colos escayos del propiu pexe, la testura del pexe, y al empar el contraste fríu la espluma. Bien ricu.

Tatemado de maiz y mar. Platu del centru de México, envolubráu nun sobre de maíz negru 100% natural (sí, esiste maíz negru), rellenu con variedaes del mar. Contundente.

Tráennos amás picante por si queremos añedir, y la verdá ye que gana.

Culminaciones de Caza con Chocolate. Xabalín con un toque de chocolate, que queda xenial. Mueyu de llombarda, con mazana asada. Lleva amás violetes, los carambelos típicos madrilanos. Bien ricu.

Tacu de Carnitas glaseadas al Wok y Chicharron. Tacu mexicanu, non fajitas. Dexenlo bien claro. Feches a mano, rellenes con distintes partes del gochu. Quéda-y xenial el chicharrón, que ye piel cruxente del gochu tostao. Foi'l nuesu platu mexicanu favoritu.

Y acabamos los platos con una combinación de Casquería con Mariscu. Manines guisaes con Caldu de cabeces de mariscu. El mueyu vien na cabeza del llagostín, ya dícenmos qu'hemos d'entornala na cañamina. Otru platu xenial pa pringase y zucar los deos. Foi'l mio platu favoritu de la nueche. Bien, bien bonu.

Otra de les sorpreses de la nueche foi Olivia Palencia, cocinera de Latiza con moliciones na cocina, que s'animó a faer el postre y ... dexónos maraviaos.

Fruta de la Pasión. Una testura maraviyosa de mousse, bien nidia, con un toque acedu y alredor, cruxente la galleta. Esperemos qu'Olivia s'anime a faer más coses, porque pinta perbién.

Pa beber, punximos tamién en manos d'Olivia y tráxonos Acón Roble. Un tempranillo Ribera de Duero qu'entró perfectamente y foi perbién con tola cena.

Empieza la temporada fuerte en Latiza. Paga la pena la visita, productu frescu, toque d'imaxinación, xente de 10 y ... dempués de probar Picakechinga, va haber que da-y un poco d'allegría mexicano a Avilés.