Facebook: https://www.facebook.com/CerveceriaElLupuloFeroz
Fáense perpoques prebes de cerveza lámbica nel mundiu, pola so escasa producción, pola exclusividá del productu, polo desconocíes que son y polo complicao d'esportar un sabor tan propio de Bélxica al restu del mundiu. Y Asturies foi ún d'esos sitios. Un auténticu privilexu al que pudimos asistir na Cervecería El Lúpulu Feroz.
Lo primero qu'hemos d'esplicar ye qué ye una cerveza llámbica. Como yá vos esplicamos na nuesa visita a les instalaciones de Cantillon, una cerveza llámbica ye una cerveza de fermentadura natural, que s'ellabora na zona de Bruxeles, y que nun añede lleldu, sinón qu'ellabora a partir de los lleldos selvaxes y bacteries qu'hai nel ambiente. Para ello, déxase'l mostiu caliente en depósitos abiertos mientres los meses d'iviernu y termina de lleldar en barriques de madera mientres 1 o 2 años.
Por tanto, ye una cerveza que s'ellabora d'una forma bien similar a la sidra asturiano, con un marcáu sabor acedo. Ello ye qu'ún de los lleldos selvaxes presentes nes cerveces lámbicas son les brettanomyces, bien conocides como famosu defectu va años na nuesa sidra. Amás, utilícense llúpulos avieyaos dos o trés años pa qu'apenes apurran amargor, pero sí consistencia. Amás de ser un antiséptico natural.
Por eso ye una bebida única, dafechu natural y tradicional. Una vegada fecha la cerveza base llámbica, el maestru cerveceru amiesta lámbiques mozes de distintes barriques, embotellales, añede un poco de zucre y dexen que faigan la segunda fermentadura na botella. Produciendo una cerveza llámbica de tipu Gueuze, qu'amás de l'acidez marcada, tien gas y munchos más matices na boca.
Para falanos de too esto y muncho más, cuntamos cola presencia de Cedric Geluk, un belga afincáu en Barcelona, distribuidor pa España de les cerveces llámbiques, y que cunta col nuesu Lúpulo Feroz como ún de los sos principales veceros.
Amás, Aitor Luis Vega y Jose Angel, d'Exclusivas Vega, contribuyeron a cerveces tan esclusives con quesos únicos, a los que yá nos tienen avezaos, pero con unes cuantes novedaes que tuvieron al altor.
Empezamos con una Lindemans Our Lambic. Mínimu 1 añu en barrica de carbayu. Una lámbica moza, ensin apenes gas, para tomar reposada, n'una de les marques comerciales belgues que faen llámbiques. Rica.
Los dos quesos que probemos con esta cerveza fueron, Brie de Meaux. Lleche cruo de vaca, producción pequena y ganadería propia. Toque a mantequilla y a frutu secu, con corteza, que tamién se come. Cremosu. Ricu.
Rocamadour. Lleche cruo de cabra. Francés, entre'l macizu central y la zona los pirineos. Pasta blando con corteza con mugor. Más ricu inda que l'anterior. Quesu documentado dende'l sXV, bien famosu por tar na zona de pelegrinación del Camín de Santiago, tien un toque importante caprino y a nueces.
Camudamos a Boon Lambic 2 Years Old Foeder Num @84. Llámbica de la fábrica Boon, avieyada 2 años en barrica de carbayu. Sigue siendo llámbica básica, polo que nun hai carbónicu. Tien más matices que l'anterior.
Taleggio. Quesu italiano de lleche cruo de vaca. Ún de los quesos de pasta blando más antiguos del mundiu, ta documentado dende'l s XI, en Taleggio, zona de Bérgamo. Quesu con forma cuadrada por cuenta'l so orixe medieval (los moldes d'aquella dómina son cuadraos). Cremosu. Estreguen a diariu la so corteza con paños d'agua y sal, ello ye que pueden atopase pequenos cristales de sal al comelo. Un quesu bien difícil de consiguir.
Morbier. Lleche cruo de vaca francés. Caracterizase por tener una raya gris de ceniza qu'estrema'l quesu horizontalmente en dos, Mauración mínima de 45 díes, y empezó a ellaborase a partir de la parte sobrante del Comté
Empezamos con palabres mayores, Cantillon Gueuze 100% Lambic Bio. Una de les maravíes llámbiques que podemos beber davezu en casi cualesquier cervecería especializada. Cerveza llámbica de tipu Gueuze, esto ye, con segunda fermentadura na botella, y polo tanto, con gas. Una cerveza único que naz d'entemecer distintes llámbiques moces al gustu del maestru cerveceru, y de forma dafechu artesanal, polo que cada llote sabe distintu. Maraviyosa.
Majorero DO Tetir. Lleche cruo d'Oveya de Fuerteventura. Pasta de color blancu marfil, golor a lleche de cabra intensu, y la corteza cubrenla con pimentón duce para evitar el mugor. Un quesu quebradiegu con un toque picante. Bien ricu.
Dziugas. Lleche pasteurizai de vaca. De Lituania. 18 meses de mauración que producen cristales de proteína , sabor intenso, y una corteza buenísima. Una de les sorpreses de la nueche. Tien un toque acedu bien interesáu.
D'una de les sorpreses de la nueche, a la cerveza estrella de la nueche que nos namoró. Cantillon Vigneronne. Cerveza esclusiva, perdifícil de consiguir, y que poques vegaes pudo probase n'España. Amiestu de llámbiques de 18 meses con uva moscatel. Fresca, menos aceda que l'anterior debíu al toque duce del moscatel y más algamadiza. Maraviyosa.
Con ella, Pesebre Viejo. Lleche cruo d'oveya. De Cuenca. Un manchegu con un sabor intenso y una testura buenísima. Producción bien pequena. Corteza natural que se llava cada 15 díes con un amiestu d'aceite y miel.
Pecorino Stagionato. Lleche cruo d'oveya de La Toscana, Italia. Toque de mantequilla y nuez. bien bonu.
Tilquin Gueuze à l'ancienne. Única fábrica de cerveza que nun ellabora la so cerveza propio, compra la llámbica básica a otres fábriques y ellabora la gueuze a partir d'elles. Y a nós encantónos dende siempres. Pelín más alcohólica que Cantillon.
L'Etivaz. Lleche cruo de vaca de los montes alpinos de Suiza. Bien paecíu al Comté, frutal, con un toque a nuez. Tien amás proteína cristalizaes, que ye una gociada para la testura.
Los Castañeros. Lleche cruo de vaca y cabra de Gran Canaria. Quesería bien pequena y bien artesana, solamente faen 4 quesos al día, y polo tanto, ye casi imposible de consiguilos. Ganadería propia. Bien ricu.
Ye bien típicu de la zona añedir fruta a la cerveza para evitar tanta acidez y faeles más algamadices, asina que probemos la Boon Framboise. Cerveza avieyada en barriques de carbayu con más de 300gr por llitru d'artimores fresques y locales. 5% d'alcohol para una cerveza fresco y nuevo, bien bona de beber. Entra sola.
Naroy. Lleche cruo de cabra y oveya, de Gran Canaria tamién. Dos ximielgues de 23 años que se fixeron cargu de la ganadería los sos padres, polo que namás ellaboren quesu de la so propia ganadería. Maurecen los quesos hasta 6 meses nuna cueva natural, que foi casa del so güelu. Solamente ellaboren 10 quesos al día. El quesu, a éstes ta buenísimo, y pica.
Gamonéu del Valle El Recuestu. Gamonéu del valle de lleche cruo d'oveya, vaca y cabra, anque s'ellabora principalmente con lleche de vaca. El quesu maurezse dempués d'afumalo, 3 o 4 meses nuna cueva natural de los Picos d'Europa. Ta buenísimo.
La siguiente cerveza ye lo más paecío a una porra de koyack que vais a tomar na vida. Boon Kriek. 250gr de cereza fresca por llitru, 9 meses en barrica, y 4%. Nun trunfa. Abondo duce.
Montagnolo. Quesu de lleche pasteurizao de vaca de Baviera, Alemaña. Fechu con vieyes recetes tradicionales, tien una testura más mantegosa que la de cualesquier otru quesu azul. Sabor duce y toque picante a la fin. Nidiu para ser un quesu azul y corteza con mugor.
Zelu-Koloria. Lleche cruo d'oveya de los pirineos vascu-franceses. Quesu semiduro, con un arume a corte importante, y bono de comer. Gustónos
Y acabamos con una rareza. Stout Rullquin. Amiestu d'una cerveza stout (negra) con llámbiques. Ensin filtrar nin pasteurizar y con segunda fermentadura na botella. Curiosa, y rica.
14 quesos, dalgún abondo complicáu d'atopar. Y 8 de les cerveces más esclusives qu'esisten, toes d'una zona de la que yá ye complicáu hasta consiguir les más "comerciales". Ensin dulda, un eventu únicu y difícilmente repetible, con un nivel impresionante.
L'eventu costó 45€, pero lo que comimos, foi impagable.
No hay comentarios
Publicar un comentario