Contact Me

Nombre

Correo electrónico

Mensaje

Hover Setting

default

Vinoteo: Xornaes de Tronos

Direición: C/Campoamor, Nº 29 - Uviéu / Oviedo
Teléfonu: 984 081 696


Web: http://vinoteo.com/
Facebook: https://es-es.facebook.com/vinoteo
Twitter: [@vinoteo] https://twitter.com/vinoteo


Volvió la serie de moda, volvieron les intrigues, les batalles épiques, los dragones y ... tamién les grandes fartures de Xuegu de Tronos. George R. R. Martin ye un apasionáu de la gastronomía (y asina nos los demostró nes sos visites a Avilés), y asoleya con tou detalle nos sos llibros un universu llenu de delicies. Esi universu recuéyenlu Chelsea Monroe-Cassel y Sariann Lehrer (col beneplácito del autor) nel llibru Festín de Hielo y Fuego (que ta escosu).  Tienen una web interesante onde arrexunten recetes que ta xenial (http://www.innatthecrossroads.com/)


Inspiráu nos llibros,  Juanjo Cima, alma del Vinoteo y Las Tablas del Campillín, entamó en LibroOviedo una cena entemeciendo platos de la saga cola presencia de Cristina Macía, traductora oficial al español de los llibros, qu'amás, ye asturiana. La cena foi tou un ésitu, escosándose les entraes en poques hores, polo que da otra oportunidá de tastiar los platos nel so propiu restorán.


Dende'l 14 al 22 de Xunetu, Juanjo ufierta un menú, pero la idea ye caltenelo mientres el branu y camudalo cada selmana según cada nuevu capítulu de la séptima temporada con distintos platos (y distintos personaxes de cabecera). Allegamos a la presentación de les xornaes con Tyrion Lannister, el nuesu personaxe favoritu, presidiendo la carta de presentación del menú.


Empezamos con una Ensalada del Castiellu Negru. Una ensalada perfecta pa empezar con arándanos coloraos que-y da un puntu xenial.


"Vien de la mesa del mesmu Lord Comandante", díxo-yos Bowen Marsh. Había ensalaes d'espinaques, garbanzos y nabiza, y de postre, concos d'arándanos xelaos y natielles. Del llibru Xuego de Tronos


Siguimos con unes Cebolles en mueyu de carne de los Stark. Pero un pocu asturianizaes, yá que Juanjo rellenoles de carne. Siguen col puntu cruxente de la cebolla que s'indica nel llibru (quiciabes sía lo que más choque) pero con un mueyu pa dexar media barra de pan.


Ben Stark echóse a rir. "Lo que me tarrecía, A lo último yo yera más mozu que tu cuando m'enfilé a conciencia". Coyó de la bandexa más cercana una cebolla asada que rezumía mueyu escuru y dio-y un mordigañu. Oyóse un gruñíu cuando-y llancó los dientes. Del llibru Xuego de Tronos.


Xamón asáu con miel y cenahories saltiaes con mantequilla de Cersei Lannister. L'amenorgamientu del zusmiu de la carne cola cenahoria va xenial. El xamón, nidiu.


La mesa de Cersey taba bien surtida, aquello yera innegable. La cena empezó con una crema de castañes sirvida con pan cruxente  acabante faer, y verdura con mazanes y piñones. Depués sirvióse empanada de llamprea, xamón rustíu con miel, cenahories refogaes en mantequilla, xudíes blanques con tocín y un cisne asáu rellenu de cogordes y orca. Del llibru Choque de Reyes.


Y acabamos con una Lleche xelada con miel de Desembarco del Rei. Lleche y miel, ¿a quién nun-y recuerda a la so infancia?

"¿Queréis dalgún mandungu? ¿Unos dátiles? Tamién tengo unos caquis bien bonos. Yá nun puedo tomar vinu; por desgracia nun lo dixero bien, pero puedo ufiertavos lleche xelada adulzada con miel. Ye per refrescante con esti calor". Del llibru Xuego de Tronos.

Pa beber, otra sorpresa Vino con Miel. Típicu de los romanos, pero que la so tradición caltúvose mientres sieglos. Más propia de los países mediterráneos porque al norte lo propio yera faer Hidromiel (énte l'ausencia d'uva). Perfectu para ambientar na cena.

Dany almorzó sol palu santu que crecía nel xardín de la terraza, (...) Missandey sirvió-y güevos de coríu y salchicha de perru, y media copa de vinu adulzáu entemecíu col zusmiu d'una llima. El miel atraía a les mosques, pero una vela arumosa calteníales a distancia. Del llibro Tormenta de Espadas. 

El menú cuesta 40€ por pareya. Previa reserva. Cola banda sonora de fondu ... a mi casi hasta me sobraben los cubiertos.


No hay comentarios

Publicar un comentario