Contact Me

Nombre

Correo electrónico

Mensaje

Hover Setting

default

El Requexu: Menú a 6 Manes

Direición: Av de la Costa, 30 - Xixón/Gijón
Teléfonu: 984  395 520

Recomendaciones: Menú Degustación
Calidá: 4/5
Preciu: 40€

Web: http://sidreriaelrequexu.es/
Facebook: https://www.facebook.com/SidreriaElRequexu/
Twitter:  [@ElRequexuhttps://twitter.com/ElRequexu


Comentarios: Muncho méritu lo qu'entamó mientres 4 díes la Sidrería'l Requexu col so cocineru Diego García a la cabeza. Una sidrería en plenu Xixón, buscando un plus de creatividá y calidá. Yá los conocíamos d'una harmonización que fiximos va unos años cola Revista La Sidra y Agromar y sosprendiónos la calidá yá'l tratu recibíu.

El merito, amás de la propuesta venturera del menú, y la complexidá de cocinar a 6 manes persones que nun tán acostumaes a trabayar xuntos, ta en compaxinar el menú degustación col restu la carta. Un fin de selmana, nun llocal enorme, llenu hasta la bandera, compaxinando cenes de grupos, despidíes. Xente cenando con sidra, con vinu, tapes, platos ... una auténtica llocura. Yá'l contrariu de lo que podía paecer, foi tou como la seda. Muncho méritu. Repito.

Sidrería El Requexu ye un llocal enorme, con una zona de barra a la derecha pa tomar sidra. Namás tienen los 3 palos de Trabanco (Normal, Selección y Sobre la Madre). Empezamos na barra tomando una botella de Trabanco Sobro La Madre. Per bona.

El menú ta entamáu por Diego García, cocineru d'El Requexu, y fechu a 6 manes cola ayuda d'Andrés Ortega, cocineru d'Aguilar de Campoo y Alberto Ojeda, de Confitería Albert, al mandu de los postres. Si tengo que definir con una palabra'l menú, amás de Ventureru, quedaríame cola Intensidá que tresmiten tolos platos. Ensin dise del equilibriu, toos apurren sabor, muncho sabor, y eso encantónos.


Pasamos al comedor y entamamos col primer vinu. Valeria. Finca el Carril. DO Manchuela. Premiu 2016 Plata. Vinu blanco con crianza de Bodegues Iniesta que sabe a piescu puru. Nun namoró.


El primer entrante ye l'Ayu Blanco con Granizáu de Mangu, Uves y Fenoyu. Toa una declaración d'intenciones empezar asina un menú. L'ayu da un puntu picante y allegre al platu, con una testura llíquida. Na parte cimera, llexando, xarazáu de mangu y cuando afondes cola cuyar, cachos d'uva. Como podéis imaxinar, el contraste ye brutal. Sírvese templao tirando a fríu.


Siguimos con un Tortu de Maíz, Salmorejo, Guacamole y Anchoa del Cantábricu n'Aceite d'Oliva. Ricu, anque foi'l que menos namoró. Tanto salmorejo fai que la base pierda un pocu'l cruxente. Anque'l contraste de sabores sigue tando presente.


Camudamos de vinu, al tintu. Pago de Valdoneje Mencía. Vinos Valtuille. DO El Bierzo. Ellaboráu por Raúl Pérez. Un mencía que tampoco namoró.


Puerros de Sahagún a la Plancha con Menizueles de Corderu y Cremosu de Pataca Afumada.  A partir d'equí la progresión nos platos ye imparable. Gustónos enforma la combinación, los puerros con un toque de plancha, con esi amiestu de cruxente y testura blanda, coles monizueles. Xenial.


Bombón de Manines y Carabineros en Mueyu de Caldereta. Ún de los favoritos de la cena. Intensidá de platu brutal, l'amiestu de les manines, cola so testura, col sabor de los carabineros ye xenial. Encantónos. Tien un toque picante.


Empezamos colos platos. Tacu de Bacaláu Tostáu en Corteces de Gochu, Pilpil de Cóngaru y Chutney de Repollu. Un rebozáu per orixinal con corteza de gochu, cruxente, col bacaláu dientro. A éstes el bacaláu (que tamién lo probemos estremao, perfeutu). Mui, mui bonu.


Y finamos cola carne, Lasaña Cruxente de Pitu Capón y Cogordes de Temporada. El mio platu favoritu de la cena. Base cruxente coles últimes cogordes de la temporada y un pitu caleya que taba perfeutu. Yá'l puntazo de les cogordes, per ricu.


Lleguen los postres, ponemos en manos d'Albert. Pero antes camudamos de vinu. Val de Reyes. Fariña. DO Toru. Yá conocíamos el vinu de cuando visitamos Bodegues Fariña y ta bien ricu.


El primer postre foi Blanco y Rojo. Una mousse de quesu con artimora. Senciellu, pero bien ricu.


Y acabamos col que más nos gustó de los dos, Placer Tropical. Un cruxente de chocolate con sabores cítricos que taba buenísimo. Debemos visita a la Confitería d'Albert en La Felguera.


Tou esto por 40€ por persona. Yo que tu non me lo perdía si vuelven repitir esperiencia, qu'esperemos que lo faigan. Gran trabayu de Diego, Andrés y Alberto y gran apueste de Sidrería El Requexu, demostrando que puede anovase n'ambientes más tradicionales, y que cuando se xunta talentu, l'apueste ye sobre seguro.


No hay comentarios

Publicar un comentario