Umami - Cata Bodega Tricó


UMAMI - ESCUELA DE SABOR

Direición: C/ Rufo Rendueles, 48 - Gijón / Xixón
Teléfonu: 695 402 646

Web: http://umamigijon.com/
Facebook: https://es-la.facebook.com/Umami-Gijon
Instagram: [@umamigijon] https://www.instagram.com/umamigijon/


BODEGAS TRICÓ

Web: http://www.trico.es/


Comentarios: Yá vos falamos de Umami, un conceutu dafechu nuevu y distintu n'Asturies, qu'adulces va afitando. Agora amplia ufierta gastronómica aliandose con otru indispensable, Coalla Gourmet, la famosa tienda de productos gourmet con sede n'Uviéu y Xixón.


Inauguraron esti amestu a lo grande, saltándose ún de los axomes qu'adulces vamos superando. ¿Ye'l vinu blanco ensin barrica un vinu namás del añu? Pa cuntanoslo y sacanos de prexuicios, cuntamos cola presencia de Jose Antonio López, propietariu de la bodega de albariños Tricó, enantes en bodegues tan importantes como Morgadío, Lusco o Palaciu Piñeiro, y unu de los precursores de la DO Rías Baixas.


"En solitariu" dende 2008 con Bodegues Tricó, cuenta con 10 hectárees de viñeos, 5 propies y 5 arrendaes, pero cultivaes por ellos. Cúntanos que'l secretu d'un bon albariño ta na viña y non na bodega. "Consiguiendo un vinu de 13 graos, l'albariño va salir perfectu", y nun va faer falta correxir darréu l'acidez, cúntanos Jose Antonio a los asistentes a la cata.


Defensor d'una viticultura sostenible, d'intervenir lo mínimo na viña, critica l'enclín actual del DO Rías Baixas de vendese a intereses económicos y non de calidá a la hora vender albariño. Por eso, defende que'l vinu ha de tar un tiempu reposando en depósitu y botella antes de salir al mercáu, y ye por eso, que nunca viende'l vinu del añu. Anguaño viende Tricó 2013. Daqué impensable nel restu bodegues sacante n'ediciones especiales.


Pa sacanos de prexuicios, lo meyor ye demostralo con fechos y pudimos probar el so vinu dende l'añeda del 2008 hasta la postrera disponible que ye la del 2013. Un exerciciu perinteresante pa comprobar los distintos calteres de cada añeda, que nunca antes fixéramos con vinu blanco., y más con vinos apenes trataos como estos, que caltienen la esencia de cada añeda.


Empezamos probando'l so únicu "vinu del añu" Tablas de Sumar 2015, que tien una producción pequena y apenes se comercializa fora Galicia. Un albariñu de preciu algamadizu, frescu y mineral. Pal "día a día".


Y equí empieza lo bono. Esclárianos más d'una vegada que los sos vinos nun pasen nin por barrica nin se críen sobre madre.

Tricó 2008. Un vinu que -según nos diz- ,al embotellar, faltába-y integración, y que se demuestra perfectu tres estos años. Integráu, ácidu y sedosu. Nun pierde frescura a pesar de los años y caltúvose como ún de los meyores de tola nueche. Un albariñu de 9 años, ¿quién lo diba a dicir? Un 93 na Guía Peñín.


Tricó 2009. Un vinu qu'inda paez nuevu, inclusive daquién diz que lo dexaría más tiempu na botella. Más amable d'acidez qu'el 2008, afayase como un vinu equilibrao. Gustó enforma, anque, pa mi, meyor el 2008.


Tricó 2010. El vinazu la nueche ensin dulda, y diznos Jose Antonio que nun tien más secretu que, al ser una añeda de poca producción, la calidá del vinu ye meyor. Boca espectacular envolvente, fruta maduro y ensin perder un migayín de frescura. Ta nel momentu de consumu perfectu.


Tricó 2011. Vinu muncho más planu qu'el 2010 (yá que, al contrariu que l'anterior, ésta foi una collecha muncho más grande). Ricu, pero nun ta al altor.


Tricó 2012. Otra gran añeda, que va na llínea de la 2010. Tien inda bastante acidez, que se va dir permediando adulces con 2 años más en botella. Va ser un gran vinu.

Tricó 2013. Ye'l vinu qu'anguaño tienen nel mercáu. Ta ricu, ensin dulda, pero en comparanza colos demás vinos que probemos, ye un vinu qu'entá-y falten unos años pa llegar a la so máxima rellumanza. Frescura, mocedá.


Pero ehí nun acabó la cosa. Siguimos colos sos vinu Nicolás Tricó, monovarietales d'albariñu procedentes namás d'una finca y de los que tien solamente unes 5000 botelles al añu y que namás saca al mercáu si esa añeda mereció la pena.

Nicolás Tricó 2010. Con esti vinu surdió la idea de la edición Nicolás Tricó. Yera un vinu orixinal de 15º, con muncha acidez, que foi baxando hasta los 14,5º que s'animaron a sacalo al mercáu. Vinu distinto, con muncho más cuerpu qu'un albariñu al que tamos avezaos y que define como un blancu con "cuerpu de tintu". Va xenial con comíes que pidan vinos contundentes.


Nicolás Tricó 2012. (yá vos cuntamos primero que l'añeda 2011 nun foi de los meyores). Vinu de 14º más equilibráu que l'anterior, anque tien un puntu más d'acidez. Xenial con cocina xaponesa

Nicolás Tricó 2013. Más alcohólicu qu'el 2012, foi'l que menos nos namoró de los 3.


Como podéis ver, un auténticu privilexu de preba, onde los meyores vinos fueron los que más tiempu teníen, y onde se demostró que si'l vinu blanco ye bonu, avieya perfectamente na botella.

0 comentarios :

Publicar un comentario