Taste Tavern


Direición: Calle Almacenes, 2 - Gijón / Xixón
Teléfonu: 662 614 940


Recomendaciones: Cerveza artesano + Picotéu


Facebook: https://www.facebook.com/TasteTavern/
Twitter: [@tastetavern] https://twitter.com/tastetavern
Instagram: [@tastetavern] https://www.instagram.com/tastetavern/


Calidá: 3/5
Preciu: 15€


Comentarios: Adulces van abriendo nuevos locales n'Asturies onde tomar cerveza artesano y al empar, xintar. Yá vos falamos apocayá de L'Espumeru en La Felguera. Agora tóca-y el vez a Xixón, colos propietarios de la Cerveza Artesano Bayura y del llocal IPA, La Cervecería del Millón de Ibús.


Serxu Solares vien ellaborando Bayura dende 2012, probando y anovando. Empezó n'Espineo (Mieres), nes instalaciones del Llagar Panizales (yá vos falamos nel so día d'ello equí) y va unos años abrieron fábrica propia en Xixón. Cola fábrica, vino la cervecería IPA, La Cervecería del Millón de Ibús, y agora amplian ufierta con un llocal, onde amás de cerveza y gastronomía, vas atopar muncho más.


Asitiáu al lláu de la Plaza'l Carmen en Xixón, abrieron el 9 de Febreru. Decoración informal, con sielles de colores, distintes; meses antigües, reutilizaes y parés de colores. Amplies cristaleres que dan a una cai piatonal (onde van poner la terraza) y ambiente sele para relaxase y esfrutar.


Acaben de recuperar los derechos para comercializar la mítica cerveza de Xixón que cerró en @1974, Estrella de Gijón.. Una roxa suave qu'enfresca y entra sola. Y va ser la primera de les 6 cerveces que vas atopar nos sos grifos de cerveza, siempres fixa.


Amás, una tostada d'increíble calidá, St. Bernardus 12, y otros 4 grifos rotativos cola meyor cerveza, onde vas poder atopar dalguna Bayura fecha por ellos.


Amás, 10 vinos "distintos" rotativos na carta, y a bon preciu; para dar a conocer opciones distintes y salise de lo habitual.


Si te paez pocu, ufierten unos 17 Vermús (y creciendo), y 2 Gintonics a la selmana, el clásicu yá ún distintu cada selmana. Zusmios artesanos, ensin café, ensin refrescos azucaraos industriales y dogfrienly.

Tocantes a gastronomía, la ufierta ye bien variada. Dende los 3 platos tradicionales fixos que siempres tán na carta (bocata d'albóndigues, cebolles rellenes y arroz con lleche casero); bocaos (calientes o fríos, colos meyores productos) y llates para complementar.


Pero'l toque mñas interesante del llocal ye la posibilidá de configurar la to propia tabla d'embutíu o quesos (o de llevatelos a casa). Taste Tavern ufierta los precios para 100grs, pero va cobrate la parte proporcional a partir de 10grs pesáu na máquina. Asina, si te prúi 10grs d'una cosa, 30grs d'otra y 50grs d'otra, van cobrate'l preciu proporcional.

Probemos un pocu de too con Serxu y Adriana.


Empezamos coles Anchoes Sobaes a mano na casa. Si te gusten les anchoes, van encantate, porque tienen un sabor muncho más intenso que'l sabor de llata al que tas avezáu. Presentaes de 10, Serxu indícanos que sobans a manu cada anchoa con un aliñu especial con aceite virxe estra para potenciar muncho más el sabor. Per bones.


Probemos 100grs de Cecina d'Angus. Cortada fina, y suavísima. Mui bona.


Y nun podíamos dir ensin probar el Bocata d'Albóndigues de xata. Menudu espectáculu. Desfaise sola y con pan tostao.


Amás, vienen acompañaes con pataques frites ecolóxiques frites n'aceite virxe estra 100% arbequina.


Para probar dalgún quesu, Serxu sacónos El Viejo Mundo, quesu de lleche crudo de vaca. Meyor quesu d'Asturies 2016.


Y un quesu de Mahon bien ricu.


Acabamos col únicu postre qu'hai, pero que ta buenísimo. Arroz con Lleche. Col toque xustu d'anís, mestu ... ricu.


Para beber, cerveza Bayura Gulismia. Llámbica asturiana. Una llámbica jóven, qu'inda tien enforma percorríu y que pasó 6 meses en barriques de carbayu francés de vinu tinto. Ye una llámbica moza, qu'inda nun ta al altor de les grandes belgues, pero que va per bon camín.


Nun pagamos, pero los precios son algamadizos. Amás, viendo la versatilidad que da'l local, puedes combinar vermú + cerveza/vinu + tapes + gintonic. O combinalo como quieras.


Una bona noticia qu'empiecen a tenese en cuenta esti tipu de locales.

NOTA: Infórmennos que NUN almiten Tarxetes de Credito.

0 comentarios :

Publicar un comentario