Sidrería Alonso


Direición: Melquides Álvarez, 67 - La Felguera
Teléfonu: 984 085 930

Web: http://www.llagaralonso.com/
Facebook: https://www.facebook.com/Sidreria-Alonso/
Twitter: [@JaviDiaz21] https://twitter.com/JaviDiaz21
Instagram: [@llagaralonso] https://instagram.com/llagaralonso/


Recomendaciones: Pulpu a la Sidra y Frixuelos

Calidá: 3/5
Preciu: 16€


Comentarios: Si esti día falemos del conceutu Brewpub de L'Espumeru, güei falamos de los chigres que vienden la so propia sidra. Siempres foi una práctica bastante habitual, y yá en dalguna ocasión falamos d'elles, como  Cortina, Panizales o El Cuchareru.

El Llagar Alonso ta en Ciañu, cerca del Ecomuséu Valle de Samuño y modernizáu va unos años. La so producción aprosimao ye de 50000l y, amás, vienden a más sidreríes amás de la suya (sobre manera na zona la cuenca'l Nalón). Lleven más de 20 años faciendo sidra, y utilicen sobre todo manzana de la cuenca. Amás anguaño en La Felguera ganaron el premiu a la votación popular a meyor sidra.

La Sidrería del Llagar Alonso ta asitiada na Felguera, na carretera xeneral que la traviesa, y ye un chigrín pequeñu pero con mucho encantu, de los d'antes, y familiar. Vienden la so propia sidra, y amás cómese de vicio (y baratu).

Como ye un chigrín pequeñu, suelen tener dos turnos pa cenar los fines de selmana. Así qu'averamos un sábadu sobro les 23h a cenar 10 persones. Pidimos al centru pa picar y dexamos emponer por Maria del Mar, la dueña.

Lo único que nun pudimos negociar foi qué beber. Sidra Alonso pa cenar. Rica y fresca, y a buen ritmu, nun faltó en nengún momentu.


Comenzamos con un Paté de Pexe. Mui ricu. Xugosu y bona ración. Cola sidra va xenial. 


Siguimos con unos Chopos con Xamón, que taben per ricos. Xenial la combinación colos cachos de xamón. Pasaos pola freidora. Ración bien abondosa amás.


Pulpo a la Sidra. Una cazuela con pulpo con gambes a la sidra Alonso realmente espectacular. Con salsa pa morrer moyando pan. El pulpo perfectu nel su punto, yá'l toque de sidra ye xenial. Auténticu platazu que nos prestó pola vida.


Tamién encamentaron l'Escalope Alonso, que ye, digamos, una capa d'un cachopu. Filete rebozao con xamón, salsa de tomate y quesu gratináu percima. Bona carne, tienra y amás, el quesu yá'l tomate dan un extra de xugosidá.


Vien acompañáu de pataques de les de verdá y unos pimientos del piquillo.



Repitimos escalope, porque ta bien bonu, y acompañámoslo amás d'unos Pimientos del Padrón, que nun yera dómina d'ellos, pero taben bien.


Tolos postres son caseros, y espectaculares. Pero amás María del Mar  díxonos que-y quedaben unos frixuelos y que nos los faía nun minutu si  queríamoslos ... como pa dicir que non. Maraviosos. De los meyores que recuerdo.


Amás tomamos Tarta de Nuez y Ablanes. Remoyada. Xugosa y rica. Y Tarta d'Almendra, más consistente pero nada empalagosa.


Acabamos con cafés y unos clines caseros d'aguardiente de sidra con naranxa, llimón y miel. Buenísimo.

Salimos a unos 16€ por cabeza. Como veis, relación calidá-precio inmeyorable. Bones cantidaes de cocina casera mui rica regaes con sidra del propiu llagar.

Un indispensable en La Felguera. 

0 comentarios :

Publicar un comentario