Nueva Visita: De Labra

Direición: C/ Finca la Quinta, 11 - Oviedo (Uviéu)
Teléfonu: 985 11 76 76


Web: http://delabra.es/
Facebook: https://www.facebook.com/restaurantedelabra
Twitter: [@DeLabraOviedo] https://twitter.com/DeLabraOviedo
Instagram: [@de_labra] http://instagram.com/de_labra


Anterior Visita: http://www.lesfartures.com/2015/02/nueva-visita-de-labra.html
Calidá: 4/5
Preciu: 33€


Comentarios: Siempres nos prestó Delabra, amás de ser un sitiu espectacular y ufiertar distintos ambientes, siempres que vamos, comemos perbién y a con una rcp per bona.


Tres la tráxica muerte de Chus, fíxose cargu del local el so sobrín Miguel Álvarez Delabra, que llevaba trabayando nel local dende diba años. Formáu na Escuela d'Hostelería de Barcelona, como'l so tíu, siempres enfocó la so carrera escontra'l Delabra. Tres unos años de formación per Llondres, EEXX yá Dubai, tornó a Delabra pa faese cargu del local.


Delabra lleva abiertu dende'l 2004. Tien una filosofía clara d'ufiertar productu de primera intentando abarcar tolos públicos. Ellí vas atopar menúes a distintos precios, tapes pa picar, platos ellaboraos, zona de Teppanyaki, bodes y eventos ... Amás, na so perguapa zona esterior tienen dellos gües AsturWangyu Tajima con certificáu de sangre puro, que vas poder tastiar n'el mesmu restorán. La carne más esclusivo xaponesa entemecida con gües asturianos.


Según entres, una preciosa zona de barra onde tomar daqué mientres esperes a cenar. O dempués. Como quieras. Ellí puedes tomar vinu asturiano, cerveza artesano o sidra esplumoso. Nós empezamos con una xoya de cerveza que ye la Duchesse de Bourgogne. Una Red Ale de Flandes que ta espectacular con una maduración en barriques de carbayu d'hasta 18 meses.


Acompañenla del primer aperitivu: una esbilla de quesos (casi) asturianos fecha por Aitor Luis Vega: Geo de Lazana, Afuega'l Pitu Blancu y Roxu, Idiazábal y La Peral. Con Compota de Mazana y Mermelada de Physalis.


La idea yera probar el so Menú de Temporada. Consta de 3 aperitivos, 2 entrantes, 1 pexe o carne a escoyer y 1 postre. Puede dir maridáu con vinu o non. El so preciu maridáu son 33€ y ensin maridar 25€. Una rcp inmeyorable. Nós, como tenemos enchufe, probemos la carne yá'l pexe, maridáu. El Menú camuda cada mes.

Ufierten 3 panes distintos: De Pases y Nueces, Chapata y de Tomate y Oriéganu.


Empezamos el menú con una Cerveza. Ceriux Vendimia. La cerveza del menú ye la que tomamos en barra, y ufiertáronnos ésta pa nun repitir ... probámosla y volvimos a la Duquesa.


Nada que ver.


Mantequilla de Paprika con Pimienta. Con unos panes turraos. Mui rica de mano.

Croqueta de Compangu con Caldu Ibérico de 5J y Arbeyos de Wasabi. 3 mini platos en 1, con una combinación distinta que nos encantó. Toos por separáu ta ricos, la croqueta, nidia y elegante, y con bon rellenu; el caldu espectacular pa entrar en calor y los arbeyos con sabor a wasabi p'acompañar.


El primer entrante foi Crema de Trompeta de la Muerte con Castaña en Testures. Presentación de luxu, primero cola castaña estazada al centru del platu, y darréu la crema nuna xarra sirvida de forma individual. Impresionante combinación que nos encantó, una de los meyores de la cena ensin dulda. Sabor a cogorda y con un amiestu de castaña y compota de mazana que queda perfecta.
Per ricu.


Camudamos al vinu. Empezamos con un Hiruzta, 100% Hondarribi Zuri. DO Txakoli de Getaira. Frescu y afrutáu, a temperatura perfecto (otru de los puntos fuertes del local ye'l so cuidu pol vinu).


Traxéronnos el segundu entrante, Arroz Meloso d'Oricios y Mazana. Lleva mazana osmotizada en sidra. Predomina'l sabor fuerte a oriciu, que nos encanta. Lo único que nun nos namoró foi esa combinación col Txacoli, el platu come al vinu.


Volvimos camudar de vinu pal pexe. Bila Haut Chapoutier Tintu. Coté de Rousillon. Vinu tinto col sabor particular de la Syrah. Un tintu que va xenial con pexe. Nidiu, elegante. Per ricu.


Bacaláu Confitáu, Caldu de Cocíu y Garbanzos en Garam Masala. El gran trunfador de la nueche y ún de los meyores bacalaos que comí nunca. Platu perfectu, el puntu perfectu. El caldu buenísimo y el toque de los garbanzos pa camudar de testura, xenial.


Encantónos a toos.


Pa la carne camudamos de vinu: Devesa de La Granxa, Vieno d'Alejandro Fernández, 100% Tinta de Toru, V.T. Castiella. Un tintu con crianza, potente y que foi xenial cola carne.


Costiella de Black Angus Lacada en Bourbon con Pan d'Escanda. Equí namás probemos media ración porque yá nun podíamos muncho más. A pesar d'ello, bon cachu de costiella, tienra, nel so puntu perfectu, y col toque de bourbon que se nota pa faelo más "duce". Al centru, un cachu pan d'escanda que nos encantr. Gran platu.


Acabamos con un Moscatel de Naranxa López Hermanos. 100% Moscatel d'Alexandría, Málaga, pal postre. Vinu duce de 15º maceráu con pulgos de naranxa. Nun namoró.


El postre ye una Ganache de Chocolate, Bizcuechu d'Aceite y Cocu. Per bonu, y a pesar de l'aparente contundencia, suave. Gustónos enforma.


Tou esto por solu 33€ por persona. Paeznos una rcp inmeyorable. Cocina de calidá maridada caúna col so vinu. Nun ambiente relaxáu, tranquilu, con una atención de primera y nuna redolada preciosa.

Tienen otru Menú Degustación más completu por 44€ ensin vinu y 57€ con vinu. vamos probalo. Confirmáu: Delabra sigue encantándonos. ¡Ah! Y siguen almitiendo Tickets Restaurant.

0 comentarios :

Publicar un comentario