Mimmö

Direición: Avenida Roces s/n - Xixón
Teléfonu:  984 082 929


Web: http://www.mimmodelivery.com/
Facebook: https://www.facebook.com/Mimmo-by-Padrino
Instagram: [@mimmo_by_padrino] http://instagram.com/mimmo_by_padrino


Comentarios: Toos conocéis -y si nun ye asina, yá táis tardando-, la famosa "cocina sobro masa" qu'ufierta Il Padrino en Xixón. Un conceutu que va más allá de les pizzerías d'anguaño, ufiertando productu de primera, de forma  orixinal y a bon preciu. Tanto ye asina, que cuesta enforma atopar mesa.


Lo habitual nestos casos ye espandir el negociu buscando una semeya del llocal orixinal, dacuando con aciertu ... pero dacuando non. Pero d'empresarios tan mozos y con tantu talentu como Tomy Estébanez hai d'esperar siempres daqué distintu, y eso ye lo que nos ufierta -xunto col so sociu Mario-, nel so nuevu local Mimmö.


Asitiáu en Nuevo Roces, barriu-dormitoriu pela rodiada Xixón, diéronse cunta qu'esa zona, con muncha población, y polo normal mozo, escarez d'ufierta gastronómica calidable. Tanto en llocales como en repartos. Por eso, decidieron abrir un local enfocáu a esi públicu, y en cuenta de faelo nel centru (col perxuiciu que supon tocantes a desplazamientos y repartida) faenlo nel epicentru de Nuevu Roces.


El conceutu ye'l mesmu que caltienen en Padrino, cocina orixinal, distinta, de productu pero enfocada a la cocina llamada "rápida". Que puedes tomar n'el mesmu llocal o pidir que te la lleven a casa. Vas atopar Entrantes típicos de cocina rápida, ensalaes, hamburgueses, les sos mítiques pizzas, perrinos y postres. Amás, carta de vinos y cerveza.


Pel momento, namás reparte  pela zona de Roces, Nuevo Roces, Viesques, Xixón Sur, Pumarín y La Camocha. Anque si gústavos el conceutu, podéis averar hasta ellí y comer n'el mesmu local, que ta bien guapu.


Pa la so apertura, convidáronnos a probar un pocu de la ufierta del local. Pusímonos en manes de Tommy y salimos encantaos cola ufierta gastronómica y la calidá de lo qu'ufierten.


Recibiéronnos con un Cava At Roca Brut Rosat 2014, vieno esplumosu elegante y refrescante.


Yá sentaos na mesa, un Kerpen Handpicked Riesling 2014. Riesling que nun namoró, entraba ácidu y con un toque (abondo) dulzuxu a la fin.


Pa combinalo, la so Pizza de Pulpu a Feira. Espectacular. La masa suavísima y cruxente, inclusive inda más fina que la del Padrín. Enriba, un pulpu perfinu con aceite, qu'amiesta perfectamente cola masa.


La segunda pizza foi de Boletus, Foie, Mueyu de Tomate Caseru, Paleta Ibérica yá Ideazabal Afumáu. Inda meyor. Impresionante. Amiestu de sabores más el cruxente de la masa. Perfecta.


Camudamos de vinu, a la ufierta del Pésicu Tintu de sabéis que tantu nos gusta. Vinu asturiano fora del DO Cangas, intensu pero al empar elegante. Gran vinu.


Probámoslo cola so Hamburguesa de Pitu Caleya, Y lo primero a reseñar ye la calidá del pan. Pan que marca un antes y un dempués y tres el que nun vas querer probar otru n'hamburgueses.#Panadería Florencio, en Salinas, el pan de referencia de dalgún de les nueses estrelles michelín. Evidentemente más caru, pero paga la pena.


Col pan, pitu caleya, mueyu caseru de ketchup, un mueyu especial Mimmö que nun nos quixeron confesar, pero que ta per ricu, mozzarella y llechuga.


Probemos tamién el so Perrín Asturcelta. Pan de Florencio pa una salchicha de Gochu Asturcelta que nos encanta. Cebolla, Bacon, el mesmu ketchup caseru yá'l so misteriosu mueyu Mimmö.


Lo  normal ye baxar el nivel nos postres, pero non nesti casu ... acompañáronnos con Moscatel Enrique-Mendoza 2013. Vinu duce DO d'Alicante, ellaboráu a partir de Moscatel d'Alexandría. Mui ricu.


Arroz con Lleche envasáu de Casa Gerardo. Poco más qu'añedir a ún de los arroces con lleche más reconocíos d'Asturies.


Y lo acompañenr d'ún de los descubrimientos de la nueche, Xeláos Artesanos de Granxa Alvarín. Tienen dellos sabores, probemos dellos y son ESPECTACULARES. Son de Tinéu y probemos la variedá de chocolate y la de mangu. Tenéis de probalos.


Mimmö vien de mimu, y eso precisamente ye lo que fixo Tomy: mimanos. Una suerte los que vivís pellí cerca que vos llega'l repartu. El restu los mortales ... vamos tener que dir conocelo más de cutiu a Nuevo Roces.

0 comentarios :

Publicar un comentario