Publicidá

Contact Me

Nombre

Correo electrónico

Mensaje

Hover Setting

default

Presentación y Harmonización de Conservas Costera



Artículu publicáu na Revista La Sidra el mes de Noviembre

Asturies ye ún de los paraísos mundiales pa les algues, tocantes a variedá y calidá (envalórase qu'esisten más de 400 especies distintes na mariña asturiana); pero ye bien curioso que se tuvieren que poner “de moda” les algues comestibles a partir de la esplosión de la cocina asiática n'occidente.
Hasta agora, lo que n'Asturies conocemos como Ocle, namás s'usaba como abonu pal campu, anque si comprobemos la definición del Diccionariu de l'Academia de la Llingua Asturiana, Ocle ye la palabra asturiana pa definir l'alga, non namás l'alga colorao destinada al abonu. Afortunadamente dende va unos años, tán abondando empreses asturianes que se dediquen al cultivu y comercialización d'algues, y ente elles, dalguna comestible. L'alga na cocina ye bien apreciada n'Asia, sobremanera en Xapón, siendo ésti'l mayor productor, consumidor y esportador del mundu. Cola llegada de la cocina asiática, fusión y vexetariana a les nueses tierres, el so usu espardióse; y cada vez atopamos más platos con algues en restoranes asturianos ya supermercaos. Ye un complementu ideal pa la cocina, riques en proteínes, vitamines y minerales. Perfectes pa dietes y pa regular el colesterol.

Por mor del llanzamientu al mercáu de la nueva llínea d'Algues Comestibles de Conservas Costera, la Revista La Sidra entamó una harmonización de los sos productos con sidra asturiano que tuvi l'arguyu de dirixir.
Aconceyaos na famosa sidrería de Lluanco Las Delicias, pudimos tastiar dellos de los sos productos más conocíos como'l so Ventrisca de Bonitu, los sos distintos patés (bonitu, centollu, oriciu, sardina marinada y anchoa), los sos distintos tipos de sardines (afumaes y afumaes con tomate) y boquerones en vinagre.


Pa ello, harmonizamos les sos conserves con distintos tipos de sidra. Sidra Natural DOP Villacubera, Sidra de Mesa Villacubera Monovarietal Regona, Sidra Brut Nature Guzmán Riestra y Sidra Semi Seca Guzmán Riestra. Variedá y calidá de productu asturianu, onde destacó sobre manera la sidra natural Villacubera, bono de beber pero con cuerpu, y Guzmán Riestra Brut Nature, una de les meyores Brut Nature que se producen, seca y con segunda fermentadura na botella. Como colofón final, pudimos probar el so alga Kombu Royal con Paté d'Oricios. Una combinación atrevida, pa romper tabúes gastronómicos, y alloñada del principal encamientu pa esti tipu d'alga, como son les tortielles, ensalaes o arroces. Sospriende'l so sabor a mar, pero muncho más nidiu de lo esperao; y xuntu cola so maraviyosa testura, afayóse como un magníficu complementu pa un paté que namora. Con esta combinación ganó, ensin dulda, la sidra natural Villacubera del llagar Cortina. A la fin, como siempres, volvemos reivindicar la sidra natural como'l perfectu comodín pa tou tipu de comíes, inclusive les más esótiques.

Salú,
David Castañón


Nome del Productu: Patés de Bonito del Norte, Centollu, Oricios, Anchoas y Sardinas/Crema de Mar. Sardinas Ahumadas. Boquerones en Vinagre. Alga Kombu Royal.
Empresa: Conservas Costera

Nombre del Producto: Sidra DOP Natural Villacubera y Sidra Villacubera Regona
Empresa: Cortina

Nome del Productu: Sidra Espumosa Guzmán Riestra Semiseca y Sidra Espumosa Guzmán Riestra Brut Nature.
Empresa: Llagar Riestra

Llugar: Sidrería Las Delicias (Lluanco)
Fecha: 08-Ochobre-2016



No hay comentarios

Publicar un comentario