Vinoteo: Preba los Quesos Más Premiaos 2016

Direición: C/Campoamor, Nº 29 - Uviéu / Oviedo
Teléfonu: 984 081 696

Web: http://vinoteo.com/
Facebook: https://es-es.facebook.com/vinoteo
Twitter: [@vinoteo] https://twitter.com/vinoteo


EXCLUSIVAS VEGA

Direición: Daniel Moyano, 4, La Corredoria - Uvieu / Oviedo
Teléfonu: 630 476 475

Web: http://www.exclusivasluisvega.com/
Facebook: https://www.facebook.com/aitorluisvega
Twitter: [@AitorLuisVega] https://twitter.com/AitorLuisVega
Instagram: [@avigil1978] http://instagram.com/avigil1978


BODEGAS TORRES

Web: http://www.torres.es/
Facebook: https://www.facebook.com/bodegastorres
Twitter: [@bodegastorres] https://twitter.com/bodegastorres
Instagram: [@bodegastorres] https://instagram.com/bodegastorres/
Youtube: https://www.youtube.com/user/bodegastorres


Empezamos temporada de prebes nel Vinoteo, y entamamos a lo grande, con una seleición de los quesos premiaos nel prestixosu concursu Cincho, que se celebren en Palencia tolos años.

Pa ello cuntamos cola presencia d'Aitor Luis Vega, al que de xuru yá conocéis bien si nos lleéis. Ún de los mayores espertos queseros que tenemos n'Asturies, dueñu d'ún de los puestos queseros más prestosos que podemos atopar y miembru de xuraos con sonadía internacional. Aitor foi l'encargáu d'emponenos pela parte quesera esplicándonos la procedencia y carauterístiques de cada quesu.


P'acompañalo, na parte los vinos, cuntamos cola presencia de Pedro Iglesias, delegáu n'Asturies de Bodegas Torres, qu'acaba de consiguir el premiu a la marca de vinos europea más almirada polos profesionales del sector.


Amás, Juanjo, complementónos la cata con dalguna sorpresa marca de la casa, como unos magníficos panes artesanos, de trigu, de centenu, y un amiestu de los dos; y unos dulces caseros de la so madre (santa) de piescu negru y de calabaza. Brutales


Pedro propúnxonos como primer vinu la so Viña Esmeralda. Vinu blanco onde predomina la uva moscatel y un sabor importante a fruta. Un vinu fresco que maridó perfeutamente colos dos quesos que probemos, aguanta na boca.


El primer quesu que probemos foi'l Cebreiro Curáu, segundu premiu nos quesos de pasta blando de lleche de vaca de cuayamientu enzimáticu. De normal sale a la venta con 2 meses de curación, anque Aitor (d'ende'l so llabor d'afinador) ufiertalu con 4 meses, que ye'l so estáu óptimo. Recuérdanos a toos en sabor y testura al nuesu Rei Silu, un pelín picante y sabor seco en boca a la fin. Mui ricu.


Siguimos con un Gorgonzola Dolce de Latteria Di Cameri. Primer premiu na categoría de quesos azules de vaca. Un quesu húmedo y cremoso, que vien acompañáu d'un Pan Soplao d'Albacete.

Camudamos de vinu, a un Rosáu. Viña Esmeralda Rosé. Un monovarietal de Cabernet Sauvignon de Chile, de 2016 (en Chile tienen les estaciones camudaes y ellí yá acabaron la vendimia). Un vinu mui potente pa ser un Rosáu, por cuenta l'altitú de los sos viñeos. Distintu. Con bona acidez y un toque importante a fresa y artimora. Va xenial colos quesos.

El meyor quesu de cabra de lleche pasteurizada foi ún de los favoritos de la nueche, el Gouda Brabander L'Amuse, quesu holandés con 1 añu de maduración. Nesos 12 meses consigue crear unos mini cristales de proteína que-y dan una testura y un sabor increíble.


Moluengo de la Rueda, meyor quesu de lleche de cabra de cuayamientu llácticu. D'Albacete. Con apenes 15 díes, ye un quesu mui cremoso nel que tamién se come la corteza. Con un llixeru picor a la fin. Per ricu.


Camudamos a la bodega Jean Leon, perteneciente al grupu Torres. El Jean Leon 3055 ye un vinazu blancu d'uva Chadonnay y pasu per barrica. Muncho más grasu y potente na boca que tolos anteriores, foi'l mio favoritu de tolos que probemos.

Ojos del Guadiana Etiqueta Negra, meyor quesu aneyo de lleche crudo d'oveya. Un quesu distinto, bien curiáu que gana'l premiu tolos años. Quesu curáu, cola corteza bañada n'aceite d'oliva virxe estra y miel. Tien 6 meses de maduración, una acidez per controlada y un sabor espectacular. Otru de los favoritos de la nueche.


La Torta Gran Casar, de Quesos del Casar SL, ganó'l premiu al meyor quesu de pasta blando de lleche d'oveya de cuayu vexetal. Aitor comentónos que la torta del Casar nació d'un defectu, yá que intentaben faer un quesu de cabra maduru, pero al nun cuayar vendenlo como un quesu blando.


P'acabar, como traca final, tomamos Estelado Brut Reserva, meyor vinu esplumoso del mundu ellaboráu con uves non propies del champagne. Vinu chileno ellaboráu a partir d'uva país, llevada dende Tenerife, que-y da un color rosao maciu. Un esplumosu per frescu con un toque a artimora.


Pa finar, Gouda Búcaro, de la Quesería El Bucarito. Quesu azul de Rota (Cádiz) bien cremosu y suave pa ser un quesu azul.

Tolos quesos son relativamente fáciles d'atopar nes queseríes asturianes, y de xacíu, nel puestu d'Aitor na Plaza d'Abastos de La Felguera o via web.


Como siempres, Juanjo, anfitrión de lluxu, ufiértanos lo meyor, prebes distintes, orixinales, con gran calter divulgativu y con precios bien algamadizos. Empieza la temporada de prebes del Vinoteo, y les que s'averen tienen per bona pinta, asina que tai sollertes a les sos redes sociales p'apuntavos.

0 comentarios :

Publicar un comentario