Presentación Viesk - Llagar Panizales

Yá vos falamos más d'una ocasión  (y de dos) lo que nos gusta'l Llagar de Panizales. Una de les mentes más inquietes, innovadores y cultivaes dientro'l panorama sidreru mundial.


Allugada nel conceyu de Mieres, n'Espineo (non Espinedo, por dios), con unes vistes impresionantes sobre'l valle mineru, onde s'entemecen antiguos allugamientos ástures cola más voraz industrialización de la minería, el Llagar Panizales aúna esa combinación ente la sidra natural tradicional y l'innovación dientro'l mundu de la sidra.

Bien conocíos pola so famosa Sidra de Hielo Panizales, que vos encamentamos probar porque ye maraviyosa, güei preséntennos Viesk, un aperitivu de sidra ensin aditivos partiendo de la mesma base que la sidra de xelu, pero 6 meses d'avieyamientu en barrica.


El nome Viesk evidentemente vien de Viesca (sitiu pobláu d'arboles y maleza na llingua asturiana) y cuntónos Tinu que lu punxo n'honor al pueblín Viesca asitiáu cerca de Cenera (Mieres).



Gustónos enforma, sobremanera porque ye un productu per frescu qu'entra solo. Pa tomar fríu,como "refrescu" o aperitivu. En cuanto al sabor, nótase'l dulzor que ñaz de la base la sidra de xelu (pa ellaborala conxélase la sidra, lo que provoca qu'ésta tenga muncho más azucre y, polo tanto, mayor graduación alcohólica), pero'l pasu por barrica déxa-y un toque acedu mui interesante. Nun ye tan duce como la de xelu. Fríu, ensin xelu, por favor, que se pierde enforma de la so acidez.


Pa ello, de la mano de Raquel Mendaña del Cómete Asturias (TeleAsturias), entamáronnos una presentación na parte esterior del llagar con personalidaes averaes al mundu la gastronomía y de la sidra n'Asturies. Nun faltó de nada, gaita y tambor, DJ, pinchos, xamón, mesa de quesos d'Aitor Luis Vega y cócteles.


Y precisamente equí ye onde Viesk destacó, nos cócteles. De la mano de Nacho Cuevas d'i+drink esfrutamos de distintes combinaciones basaes en Viesk qu'amosaron espectaculares.


Diseñu espectacular del avilesín Roberto Bacigalupe, pa una bébora qu'ensin dulda, va dar que falar.

Llarga vida  a Tino y la so sidra. Y llarga vida a Viesk. ¡Pasión a esgaya!


0 comentarios :

Publicar un comentario