El Cabanón

Direición: C/Estación, 19-21. Avilés
Teléfonu: 678 774 336



Facebook: https://www.facebook.com/Cerveceria-el-Cabanon
Twitter: [@CERVECERIACABAN] https://twitter.com/cerveceriacaban


Faise (mui) complicáu intentar falar oxetivamente de la que ye la to segunda casa. Un llocal acomuñáu a vivencies personales, al espertar del interés cerveceru y llenu de momentos intensos ya irrepetibles.

Tolos que me conocéis sabéis que siempres vos falo perbién del Cabanón, y que tolo bono que-y pase va quedase curtiu, y agora voi intentavos esplicar porqué.


Pablo García Serrano, o Pablo Cabanón, lleva 14 años al mandu la cervecería. ¡14 años! Anque llevaba abierta dende l'añu 98, ya inclusive tomamos dalguna cerveza xuntos ellí. Inda m'alcuerdo del día que me cuntó que taba negociando pa faese cargu del chigre y de tolos planes ya ilusiones que tenía en mente pal local.

Fíu d'hosteleros, empezó la so carrera nel chigre los padres, n'Antromeru, onde siempres s'entemecieron parroquianos y turistes en perfeuta harmonía, y ye que la familia siempres tuvo esi don. Ún de los fuertes del Cabanón, ensin dulda, ye la familiaridá y que consigan que teas como na to casa, ya sías habitual o la primer vegada qu'entres pel local.



Cuando Pablo tomó les riendes del chigre, n'Asturies la ufierta cervecera yera prácticamente inesistente. Guinness, dalguna Murphys, escasamente una London Pride y 3 o 4 cerveces belgues. Abondo pa creenos los reis del mundu cerveceru dempués d'afayar un mundu más allá de la Mahou. D'aquella, coincidió cola puxanza del barriu (Sabugo) como zona de movida y El Cabanón quedó práuticamente clisáu como llocal de copes.


Cola crisis, y la zona'l Carbayéu pegando cada vegada más fuerte, viendo cómo entamaben a pesllar un llocal tres otru na so mesma cai, Pablo tuvo qu'optar por cerrar o reinventase, ufiertar daqué distintu. Y optó pola cerveza. Cuando naide más lu faía, cuando la cerveza nun taba de moda. Empezó con unes 25 referencies de cerveza, en plenu boom de la cerveza belga d'abadía, trayendo cerveces qu'agora atopamos en supermercaos, pero que fai 10 yeren práuticamente imposibles d'atopar (anguaño na mayoría de llocales a lo máximu que podemos aspirar ye atopar una Grimberger).


A lo llargo d'estos años, y tres probar cientos de cerveces nel so llocal, el Cabanón camudóse nuna de les cerveceríes de referencia del Estáu. Con él aprendimos a estremar una lager, una Pale Ale, una IPA, una APA, una llambica, una Stout, una Saison ... Pasamos de la moda la cerveza belga a les americanes, agora les nórdiques. Ellí probemos les primeres cerveces artesanes, cuando nun "taben de moda" y les primeres cerveces artesanes asturianes (entá m'alcuerdo de les primeres botelles de Caleya o Cotoya que pasaron pol llocal, inda ensin etiqueta).


Agora ye muncho más fácil abrir un llocal qu'apueste pola cerveza, pero d'aquella nun lo yera. Por eso ye xusto reconocer a Pablo (y a Andres LúpuluRichi CantinaFranky Ca BeleñoDavid Cimmeria ...) que gracies a lo qu'ellos entamaron, anguaño podemos beber la meyor cerveza del mundu n'Asturies. Y eso ye un lluxazu que los que tuvimos ehí, y vimos lo que peliaron (y peleen) tenemos qu'agradecer.


El Cabanón cunta con 3 grifos de cerveza fixos. Pilsner Urquell (una roxa suave checa de baxa graduación, que güel y sabe. Perfeuta pa enfrescar), Leffe Bruin (cerveza flamenca d'abadía de 6,5%, lo que comúnmente conocemos como una tostada. Toque dulzuxu a vainilla a la fin) y una Hoegaarden (una cerveza flamenca de trigu de baxa graduación con un toque cítricu).


Amás, otros 5 grifos rotativos onde siempres vas atopar cerveza artesano y cerveza asturiano. Estos grifos van camudando, y siempres s'intenta compensar pa tener distintos tipos de cerveza pa qu'ún pueda tomar delles pintes de forma progresiva, de más suave o refrescante a más trupa y reposada. Pinchen los barriles baxo demanda y según el so óptimo puntu de consumu, lo que fai que siempres atopes ún nuevu que probar.


Si esto te paez pocu, n'El Cabanón vas atopar unes 150 referencies en botella, dende les clásiques belgues o alemanes, hasta les cerveces más rares de cualesquier  parte del mundu. Tienes distintos sabores, tipos, procedencies y formatos.


Como tanta información y tipos de cerveza, puede agafar al públicu non avezáu (o al que va d'ello, qu'hai posturéu enforma). Asina que lo meyor ye qu'entres y pídas encamientu a Pablo. Con 3 o 4 entrugues, va atopar la cerveza que más s'avera al to gustu. Si yes más conservador, vas beber un sabor más algamadizu, pero siempres coles meyores cerveces (tomar una pilsner urquell ye una maravía) y si te presta probar sabores distintos, siempres vas atopar una cerveza esclusiva que te va sorprender.


Y como non solo de cerveza vive l'humanu (anque podríamos), El Cabanón tamién ufierta una colección  abondo completa de güisqui, sobremanera especializándose nel güisqui de malta escocés. Cuenta con unes 25 referencies pa tou tipu de gustos y precios. Amás d'Escocia tamién vas atopar referencies d'otros paises como Irlanda o Xapón. Paga la pena probalos.


Delles vegaes al añu, entama prebes de cerveza y de güisqui. P'afitar productos que ya tien nel llocal, pa probar productos nuevos por si encaxen n'él, o a cencielles pa buscar esperiencies nueves colos sos parroquianos. Dalguna yá vos falamos y suelen cuntar cola presencia de distintos espertos. Amás, eventos mui raros ya esclusivos como l'apertura de barriles de tipu Cask, como vos cuntamos equí nel so día.


¿Inda nun vos convencí? Pos lo meyor que podéis faer ye dir, entrar, y si me veis pela barra, pidi-y a Pablo una Estrella de Galicia o una Cruzcampo. Solo por ve-y la cara de circunstancies, a la primer pinta de lo que queráis, convido yo.

0 comentarios :

Publicar un comentario