Casa Ramón

Direición: Plaza de Daoíz y Velarde, 1 - Oviedo / Uviéu

Teléfonu:  985 201 415

Recomendaciones: Calamares. Carne de matanza propio.

Facebook: https://www.facebook.com/restaurantecasaramon/
Instagram: [@casaramonoviedo] http://instagram.com/casaramonoviedo

Calidá: 4/5

Comentarios:  La Plaza'l Fontán n'Uviéu ye ún de los llugares más guapos y emblemáticos de la ciudá. Pasiar poles sos cais empedraes o dir mercar daqué al mercáu, ye ún de los mayores placeres qu'ufierta Uviéu. Pa los nativos, y tamién pa los turistes. Por eso, aprucen tiendes gourmet onde se vienden productos artesanos (como Aramburu, de la que yá vos falamos) y restoranes enfocaos a turistes onde se busca más la cartera del visitante que la calidá de la cocina.

Siempres pensé que Casa Ramón pertenecía a esti tipu de llocales, un sitiu preciosu pa tomar unes botellines de sidra na terraza con vistes a la Plaza'l Fontán yá'l Palaciu del Marqués de San Feliz, pero pocu más. Y sorprendióme pa perbién.

Ye l'únicu edificiu original que se caltien de la Plaza'l Fontán, y tien dos terraces, una al interior de la plaza y otra escontra la plaza Daoíz y Velarde. Dambes precioses, con zona de sol y solombra, y dambes con camareros de cutiu echando sidra. Pel branu, son perfeutes pa picar daqué con una bona botella de sidra.

Falando de sidra, tienen 4 palos de sidra, seleición y DOP. Y los pinchos dende la barra hasta la terraza son continuos.

Según entres nel llocal, zona allargada de barra pa tomar una botellina, y a lo fonderu, un comedor pequenu más informal. Xubiendo por unes escaleres de madera, apuertes a la planta cimera dedicada n'esclusiva a comedor. Preciosu comedor con ventanes antigües y unes vistes espectaculares. Merez la pena tomase una botellina na terraza, pero pa comer ... meyor el comedor cimeru.

Comimos dos persones, y dexamos encamentar un pocu polo que nos ufiertó'l dueñu, Olegario.

Asina que empezamos con unes tostes de Salmón Afumáu y Caviar. Vienen acompañaes con un mueyu d'eneldu. Probámosles con y ensin, y la verdá ye que ta tan bonu ensin, que nel mueyu moyamos el pan a la fin namás.

Namás pol siguiente platu pagó la pena la comida, Gamba d'Huelva, a la plancha y acompañaes d'un llimón que nin osamos tocar pa nun contaminar tan preciáu manxar. Espectaculares. Sabroses, col toque xustu de plancha y pa rellambese los deos.

Como nun yera plan de siguir rellambiendonos, siguimos con una de les especialidaes de la casa que nun puede faltar, unos calamares frescos. Pero frescos de verdá. Dixéronnos los puestos del mercáu del Fontán onde los consiguen, y claro, teniendo a mano productu de primera, lo difícil ye que salgan mal.

Otru platu cenciellu, pero que nos encantó foron los Fritos de Merluza Rellenos d'Anchoa. Somos unos apasionaos de la merluza, fecha casi comoquier, y esi toque sutil saláu de sabor que-y da l'anchoa, queda xenial.

Pasamos a la carne, y esplíquennos que tienen matanza propia de xata, y un par de proovedores de calidá pa cuando se-yos acabe la mesma.

La Xata Guisada ta espectacular, Clásica, pero buenísima, con un mueyu pa morrese moyando pan y pataques panaderes, pero de les de verdá. Per rica.

Y yá pa rematar, anque casi ensin fuerces, la Tapa de Xata, dos filetes de xatu pa los que casi nun fai falta'l cuchiellu. Desfaese. Acompañáu d'unes pataques frites que dio pena dexales, porque yá nun nos entraba más.

Acabamos con otra especialidá de la casa, una Tarta d'Almendra. Otru mitu que nos cai, una tarta xugosa y que nun dexa la boca como una alpargata. Mui rica.

Indíquennos que tienen una de les cartes más llargues d'Europa, y ye que los platos qu'ufierten son innumberables. Complicáu que tou tea perfeutu, pero lo que probemos taba buenísimo.

Acompañamos la comida con un Martínez Lacuesta Crianza 2009. Un rioja frescu, qu'entra bien suave y que va perfeutamente col pescao y la carne suave. Gustónos enforma. A pesar del calor que faía fora, frescu, entró xenial.

Nun puedo dicir lo que costó porque nun pagué, pero los precios que vi son normales. Depués yá depende de lo qu'ún pida y la bébora colo qu'acompañe.

Un sitiu preciosu, asitiáu nuna de les places más emblemátiques d'Uviéu, con una terraza espectacular, y agora, yá sí, podemos dicir, con una cocina que tuvo al altor.