Presentación y Harmonizaxe de Conserves Costera

Artículu publicáu en La Revista La Sidra Mes d'Abril


Siempres ye un arguyu comprobar cómo una empresa asturiana entama pola innovación, y más cuando ye d'una calidá tan contrastao como Conserves Costera.


Tres unos años d'asentamientu de la marca, deciden presentar una nueva gama de patés dempués d'un proceso d'investigación y escoyeta, que va xunise a la extensa ufierta de productos que yá tienen nel mercáu. Los nuevos patés quieren estremase por el so tastu y calidá, y tres probalos, comprobemos que cumplen esi envís con creces. Los sos tastos son: Bonito del Norte, Centollo, Oricios, Anchoes y Sardines/Crema de Mar.


Pa presentar los productos cuntamos cola presencia d'Ignacio Ventura Alonso, conseyeru delegáu de Conserves Costera, y parte del so equipu. Comentar qu'el so desenvolvimientu produxo en collaboración col Institutu de Desenvolvimientu Económico del Principáu d'Asturies (IDEPA) y l'Asociación d'Industries Cárniques ASINCAR.
L'escenariu escoyíu pa la prueba de los sos nuevos productos, foi la Sidrería el Lavaderu en Xixón. Marcu privilexáu con una plaza a rebosar d'ambiente sidrero, allugamos nun precioso salón decoráu en piedra onde gociamos d'una atención exquisito.


L'envís del alcuentru yera harmonizar los nuevos patés de Conserves Costera con distintos tipos de sidra: Sidra Menéndez Natural y Sidra DO Val d'Ornón; Sidra Natural Tareco; Sidra Espumosa Guzmán Riestra Semiseca y Sidra Espumosa Guzmán Riestra Brut Nature.
A priori, esti tipu de conserves harmonicen perfectamente con cualquier tipu de sidra. Pero queríamos llevar l'exerciciu un poco más allá y comprobar cómo les nueves espresiones de la sidra combinen perfectamente cola sidra natural. Comenzamos colos Patés de Bonitu del Norte y Centollu, onde la Sidra Natural Menéndez y DO Val d'Ornón demostraron aguantar el tipu perfectamente. Quiciabes el toque más acedu de Val d'Ornón combina meyor con un paté con un tastu más marcáu como'l Centollo. .


Pa el viniente paté, d'Oricios, comprobemos cómo una sidra natural como Tareco, pero tomada como si fora de mesa (ensin echar), da-y la intensidá de tastu y golor necesario pa contrarrestar un tastu más fuerte que los anteriores. Ye un paté que destaca pola so cremosidá y Tareco apurre'l cuerpu necesariu pa un paté delicioso. Foi una de les combinaciones favorites.
Siguimos aumentando la intensidá del tastu de los patés, y pa los dos últimos, anchoes y sardines, la sidra que meyor aguantó foi la Espumosa de Guzmán Riestra. Primero la semiseca y darréu la seca. Al principio sosprendió'l tastu brut nature de la sidra espumosa nos asistentes, pero demostró que la burbuya seca va perfecta con tastos más salinos ya intensos. Acabamos con una Tortilla d'Alga, Oricios y Bonitu como sorpresa final de la casa. Estimar a los asistentes l'atención emprestada, a la sidrería El Lavaderu la so acoyida y a la Revista La Sidra'l so enfotu.

Salú,
David Castañón


Nombre del Producto: Patés de Bonito del Norte, Centollu, Oricios, Anchoae y Sardines/Crema de Mar.
Empresa: Conserves Costera

Nombre del Producto: Sidra Menéndez y Sidra Val D’Ornón
Empresa: Menéndez

Nombre del Producto: Sidra Tareco
Empresa: Casería San Juan del Obispo

Nombre del Producto: Sidra Espumosa Guzmán Riestra Semiseca y Sidra Espumosa Guzmán Riestra Brut Nature.
Empresa: Llagar Riestra

Lugar: Sidrería El Lavaderu (Xixón)
Fecha: 12-Marzu-2016

0 comentarios :

Publicar un comentario