Palaciu de Rubianes

Direición: Rubianes - Cerecea - Piloña
Teléfonu:  985 707 612



Recomendaciones: Menú


Web: http://www.palacioderubianes.com/
Facebook: https://www.facebook.com/pages/HotelGolf-Palacio-de-Rubianes/


Calidá: 4/5
Preciu: 25€


Comentarios: Tuvimos de fin de selmana per Piloña saborguiando sos pinchos y convidaronmos a comer nel Palaciu de Rubianes.

Namás pela carretera pa llegar ellí, yá merez la pena dir. Piloña ye un paraísu inesploráu dientro d'Asturies. Carreteres estreches, con unes vistes a la sierra'l Sueve espectaculares. Y cuando enfoques la carretera hasta Rubianes ... y ves apaecer el Palaciu ... ún queda ablucáu.

El Palaciu ye espectacular. Remonta a un caserón del SXVIII, que foi reformáu dafechu como hotel nel añu 2005 calteniendo la esencia señorial del Palaciu. De cuentu. Asitiáu nuna tenllera, con un campu de golf a sos pies y unes vistes impresionantes onde corona'l Sueve (y los Picos d'Europa). Una redolada maraviyosa. El palaciu impón, de piedra, y si das una vuelta alredor, afayes pequeños requexos que lo faen encantador: horru, capiya de piedra, antiguu molín y torre.


Perfeutu pa celebrar bodes o grandes eventos, tamién ye un hotel onde pues agospiar (y alloñar del mundu). Merez la pena.


Ablucaos por el so esterior, l'interior nun queda atrás. Decoración preciosa, amplia y con encantu. El salón ye enorme (tanto que nos acompañó nel mesmu salón una comunión y en nengún momentu fadiaron).


 Ufierten un Menú de 25€ de fin de selmana y dellos platos fora de menú.


Empezamos con una Falpayar Escabechada como aperitivo, de la zona. Bien rica y pa comer d'un bocao.

Crema de Puerros con Bacaláu, otru aperitivo de la casa. Buenísima.



De primeru del menú, escoyí una Crema de Mariscu, que taba mui bona, trupa (enforma), y con bon condimentu.


Per bon platu.


Otros collacios decantaron por un Risotto de Caza, que taba bastante malu. L'arroz dafechu pasáu.


Yá'l Pulpu a la Brasa foi unu de el ganadores de la comida.


De segundu, pidí un platu fora'l menú que taba bonísimo, Llubina con Mueyu de Cogordes, maraviyosu platu. La combinación de cogordes y llubina encantóme. Bon cachu de llubina y nel so puntu.


Anque'l Sollombu nun se quedó tras.


De postre, Tarta de Quesu o Espluma de Chocolate Blanco con Maracuyá, los dos taben bonísimos.


Esnalaron.


Pa beber, Analivia Verdejo 2013, Arnegui Rioja Tempranillo y Agua Borines. Vienen col menú, asina que desconozo la carta de vinos y si esisten referencies asturianes.


Un sitiu maraviyosu pa perdese, con bona comida. Hubo fallos, pero hai que volver probar la carta y eses habitaciones.

0 comentarios :

Publicar un comentario