Nueva Collecha de Viuda de Angelón 2016 - Esperiencies Gastronómiques Aramburu

ARAMBURU UVIÉU

Direición: C/ Fierro, 9
Teléfonu: 984 285 781

Web: http://aramburu-asturias.es/
Facebook: https://www.facebook.com/AramburuAsturias/
Twitter: [@AramburuAstur] http://www.twitter.com/AramburuAstur/
Instagram: [@aramburuastur] https://www.instagram.com/aramburuastur/


LLAGAR SIDRA VIUDA DE ANGELÓN - POMAR

Direición: La Teyera S/N - Nava
Teléfonu: 985 716 770

Web: http://www.sidraviudaangelonpomar.es/
Facebook: https://www.facebook.com/sidrapomar.viudaangelon/
Twitter: [@sidraangelon] https://twitter.com/sidraangelon
Instagram: [@sidraviudaangelonpomar] https://www.instagram.com/sidraviudaangelonpomar/


Aramburu ta de 50 aniversariu. Son 50 años ufiertando los meyores productos asturianos (y de'l restu del mundu) nes sos tiendes de Ribeseya, Llanes; y dende va añu y mediu aproximadamente, tamién n'Uviéu.


Con una situación envidiable nel centru d0Uviéu, la tienda de Aramburu ufierta una variedá abondosa de productos, dende la ganadería propia, los meyor embutidos, quesos, conserves, pasando por una escoyeta de bébores que nun dexa de crecer y anovase. Ye un espaciu enorme pero queda pequeñu énte tanta variedá de productos.


Dende va un tiempu, amás, vienen ufiertando les sos Esperiencies Gastronómiques Aramburu, onde ufierten nun espaciu habilitáu nun pisu inferior de la tienda, prebes, cursos y degustaciones, siempres empobinaes a dar a conocer productos de calidá. Cunten con cocina propio.


Nesta ocasión, averamos a probar la presentación de la nueva collecha de Sidra Viuda de Angelón. Cuntamos cola presencia del so propietariu y enólogu, Fran Ordóñez, que fixo un repaso divulgativu alrodiu la hestoria y ellaboración de la sidra mientras nos presentaba caúnu de los sos productos.


Si siguís la nuestra web, conoceréis bien el llagar Viuda de Angelón, del que somos fieles siguidores, consumidores y amigos. Nesti casu, la pasión non mos ciega ya qu'anguaño ye'l llagar que cunta con mayor variedá de productos nel mercáu, y el más puntero n'innovación. Productos calidables oldeados con premios nes principales feries de sidra del mundu. Ye curiosu comprobar cómo Viuda de Angelón trunfa n'Asturies cola so sidra natural y DOP; pero internacionalmente  failo cola so sidra de nueva espresión, sobremanera sidra de xelu, Rosée, sidra de mesa y brut nature.


Agora mesmu, la gama de productos qu'ufierta Viuda de Angelón tomen dende'l aperitivo o vermú de la comida (Rosée y/o Sidra de Pera), la mesma comida (1947, Prau Monga Brut Nature y/o Viuda de Angelón Brut) hasta'l postre (Diamantes de Hielo).


Comenzamos probando Sidra Natural Viuda de Angelón y la so Sidra Natural DOP Práu Monga. Fran esplicónos los requisitos qu'una sidra debe cumplir pa pertenecer a la DOP y los principales son: garantizar calidá del productu y manzana 100% asturiana.


Asturies ye l'únicu sitiu del mundu onde la manzana se paña de forma manual. Debido a la orografía y a que nun esisten llatifundios de pumares equí, resulta imposible mecanizalo. Eso, que malapenes se sabe nin se valora, da un plus d'artesanía al productu. Sicasí, países como China (primer productor mundial de manzana), EEXX o Francia tienen unos precios más competitivos debido a la mecanización na esplotación.


El lote que probemos de sidra Natural Viuda de Angelón lleva 10 díes embotelláu nun tonel de madera de castañal de 60 años. A partir del mes estimase'l consumu óptimo, debido a que el color adquire una llixera oxidación que se va corrixendo na botella. Esta sidra tien un color pardín (por mor d'esa oxidación). Arumes a frutos secos y un toque lláctico bien curiosu. Y na boca resulta una sidra redondo con pocu agrín. Fácil de beber. Mui rica.


P'acompañar la sidra, Roberto  preparónos una escoyeta de quesos. Comenzamos con un Gouda Pesto Colloráu, quesu holandés fechu con lleche de vaca. Entemez con tomate colloráu y oréganu y da-y un tastu mui particular a pizza. Per orixinal y ricu.


Prau Monga DOP, collecha 2015 (en 2015 recoyó la manzana). Sidra que yá lleva más tiempu na botella y que tien el color mariellu pajizo perfectu. Golores a yerba, a práu, maraviosu. Y tastu más acedo que l'anterior, y pa mi, más ricu, anque la mayoría de la sala prefirió l'anterior sidra.


El viniente quesu que probemos foi Le Moulis, de lleche crudo de cabra con 3 meses de curación. Fechu nel pirinéu francés. Un quesu graso pero suave, Ricu.


Sidra Brut Nature Prau Monga DOP Sidra d'Asturies, una de les xoyes de la corona mundial actuales nel mundu de la sidra. Sidra fechu pol métodu champagnoise (como'l champagne o'l cava, con una segunda fermentadura na botella), de 7,2% y 0% d'azucre residual. Anguaño amás podemos esfrutar d'una sidra Reserva de 3 años y mediu. Un luxu de sidra que va con tou y que ta siendo un ésitu n'EEXX (ellí viéndese sobre tou en cañeru).


Quesu Manchegu El Pesebre Semi Curáu, ellaboráu con lleche crudo d'oveya. Con flora bacteriana na corteza que se come, yá-y da un puntazo xenial.


Siguimos cola so Sidra Brut Viuda de Angelón, que la so diferencia principal cola anterior ye qu'en vegada de faer la segunda fermentadura na botella (métodu champagnoise), faila en depósitos, d'ende la so denominación granvas. En teoría un productu menor al anterior, en costu d'ellaboración y en tastu (y polo tantu en tienda), pero ye perfecta pa un primer aproximamientu al mundu brut de la sidra. Digo en teoría, porque ta buenísimo, yá'l so preciu ye mui baxu. Una sidra penerada, con un color más claru, y con arumes frutales (sobre tou a plátanu). Tien menos agrín que l'anterior, y un pelín d'azucar.


Cantar de Gredos. Quesu de lleche crudo de cabra con 4 meses de maduración en bodega. Corteza mugorosa con golor importante a fungu. Testura elástica pero non arenosa (más típica na zona). ;ui ricu.


La so Sidra de Mesa 1947, sidra natural clarificada y penerada que nun ye necesariu d'echar. Más asemeyada a un vinu blanco (nun ye espumosa). Sidra que nos últimos años ameyoró de forma espectacular, ye una sidra con cuerpu, que güel (arume importante a frutos secos) y que sabe (llimpia en boca y persistente), y qu'aguanta perfeutamente el tipu énte lo que-y pongamos per delantre, pero sobro toos, con arroces. Mui redonda.


Sidra Pomar Rosée, sidra espumoso rosao. El color  adquírelo al amestase cola mesma pulpa de la mazana, ensin nengún aditivu artificial. Sidra golosa, que fresca entra ensin qu'enteres, y que ta siendo tou un ésitu en Sudamérica. Perfecta pal vermut. Una pena que tea trunfando tanto fuera y que equí cueste tanto atopala. Mui aromática, con arumes de fruta puro que te recordarán al lambrusco italianu y 5% d'alcohol de pura fruta en boca. Perfecta col quesu.


Sidra Viuda de Angelón de Pera, Sidra ellaborao pente medies d'el métodu granvas, pero fecha con pera, recuperando una tradición antigua asturiana d'ellaboración de sidra con pera debido a la gran cantidá de perales qu'esistíen antiguamente. Cuando s'acababa la mazana n'Asturies, debido a la gran demanda nes esportaciones, comenzó a ellaborase sidra de Pera, y va unos años Fran recuperó esa tradición. Sidra espumoso que xele y sabe a pera, suavey que entra sola. Presentada en botellín qu'esporta a EEXX, fecha con peres de Villamayor.


Quesu Pregondón. De lleche crudo de vaca, maurecíu 7 meses nuna cueva de Gamonéu, pero ensin afumar. Quesu d'Amieva. Quesu fuerte con un toque secu, que pide a berros sidra. Amás, Roberto dio-y so toque guardándolo un añu por que gane más tastu. Mui bonu.


Siguimos con otra de les sorpreses de la nueche, Sidra Viuda de Angelón de Pera pero recién embotellada y en plenu procesu de fermentadura. Pa comprobar la diferencia cola anterior de pera "yá fecha". Golor importante a mantequilla, mucho más lláctica que l'anterior. Y que yá apunta bones maneres. Ye una sidra con unes 8500 botelles de producción que'l so 98% viende n'EEXX. Una pena qu'equí non la valoremos.


Cantar de Gredos con Corteza Llavao. De 3 a 8 meses de maduración. ésti tien un toque vexetal importante. La so corteza llavase a diariu con agua destilao y sal, ye un quesu mantecoso y frescu qu'entra xenial. Mui bonu.


Y acabamos con otra de les xoyes de la corona, anque'l llistón taba altísimo. Gran ovación na mesa pa recibir la Sidra Diamantes de Hielo, una sidra de xelu de 11,5% , con un procesu d'ellaboración bien llaborioso (pa consiguir una botella de 37,5cl precisa l'equivalente a 10 botelles de sidra natural). Una sidra con un azucre residual de 140g/l, una golosina, que güel y sabe a fruta maduro pero que nun empalaga. Podríamos vivir bebiendo namás sidra de xelu. Perfeuta. Acaba de consiguir el premiu a la segunda meyor sidra de xelu del mundu nel concursu de Michigan (EEXX).


Acabamos col so maridaxe perfeutu, Quesu Cabrales El Teyedu, de Pepe Bada. Quesu de Tielve y sin duda ún de los meyor cabrales. Quesu cremosu, con golor intensu y tastu col picante xustu. Quiciabes un cabrales más asequible pa toos.


Gran llabor divulgativa d'Aramburu pa dar a conocer un llagar del que deberíamos tar arguyosos pola so gran sidra y el so llabor innovador y exportador dando a conocer Asturies por tol mundu. 

0 comentarios :

Publicar un comentario