Curuxera + Quesos d'Aitor Luis Vega

BREW PUB L'ESPUMERU & CURUXERA BREWERY

Direición: C/Julian Duro, 22 - La Felguera
Teléfonu: 985 696 625

Facebook: https://www.facebook.com/Brew-Pub-Espumeru-Curuxera-Brewery
Twitter: [@curuxerabrewery] https://twitter.com/curuxerabrewery


EXCLUSIVES VEGA

Direición: Daniel Moyano, 4, La Corredoria - Uvieu / Oviedo
Teléfonu: 630 476 475

Web: http://www.exclusivasluisvega.com/
Facebook: https://www.facebook.com/aitorluisvega
Twitter: [@AitorLuisVega] https://twitter.com/AitorLuisVega
Instagram: [@avigil1978] http://instagram.com/avigil1978


En La Felguera ta la cervecería más guapa d0Asturies, y posiblemente del mundu (y asegúrovos que llevo visitaes unes cuantes). L'Espumeru tienlo tou, llocal enorme con una decoración en piedra y madera cuidadísima y preciosa; sala de billar al fondu, chimenea qu'usen pel hibiernu pa calecer la sala, terraza cubierta (na cai y un patiu interior enorme paralelu al local) y la so propia microcervecería.


L'únicu Brew Pub que tenemos n'Asturies (xuntu col Ca Beleñu), L'Espumeru produz la so propia cerveza y nun la viende (nin embotella) a nengún otru local. Con una filosofía bien clara, Hugo Suárez, lleva dende 2010 produciendo Cerveza Curuxera, n'honor a la canal de Llaviana del que llogra l'agua pa ellaborala y qu'amás, n'asturianu, significa "sitiu onde abonden les curuxes o curuxos".


El local lleva abiertu dende 1997 y sufrió delles ampliaciones. Pero ensin dulda ún de los sos principales atractivos foi'l día qu'Hugo s'animó a convertir parte del almacén de tras nuna microcervecería. Con una importante inversión, fixo'l so suañu realidá, producir la so propia cerveza nel so chigre. Ensin pretensiones d'espansión, el so oxetivu ye faer una bona cerveza y qu'esa esperiencia vaya acomuñada al so local. Y algamolu.


Hugo namás viende la so cerveza nel so local (dalguna referencia en botella queda, pero adulces van sumiendo). Ellabora 5 variedaes distintes coles qu'abarca práuticamente tolos tipos de cerveza qu'hai nel mercáu anguaño. Pilxen (una roxa lager suavina), Yankee (una american pale ale con un toque d'amargor), Trigu (una cerveza de trigu tipu alemana suavina), Conventín (tipo cerveza belga d'abadía) y Strix (una negra tipu stout).


Axuntamos unos cuantos veceros y curiosos pal eventu qu'abrió al públicu'l pasáu 24 de Xunu. Consistía nuna visita guiada pola so micro-cervecería onde nos esplicaría'l procesu d'ellaboración de la cerveza y les diferencies ente les sos variedaes; y una posterior cata maridada con quesos d'Aitor Luis Vega, l'otru crack allantáu en La Felguera del que nunca cansaremos d'encamentavos.


Hugo esplicó a nivel de primerizos (pero de xemes en cuando entrando más en detalle gracies a dalguna entruga de dalgún espertu cerveceru que s'animó a la cata) los ingredientes pa ellaborar la cerveza (agua, malta, llúpulu y lleldu) y cómo a partir d'ende les posibilidaes d'ellaboración son infinites. Ello ye que comentónos en primicia que taba plantegándose ellaborar dalguna cerveza más.


La coción, l'amiestu, cuándo se s'echa'l lúpulu, la fermentadura ... Hugo foi esplicandonos tol procesu nuna micro que ye pequena, pero que ta bien cuidada y bien preparada pa esposiciones, charres o, inclusive, cursos d'ellaboración.


Tres la charra, fuimos a la parte de tras de L'Espumeru onde nos recibió Aitor Luis Vega con una impresionante mesa llena de distintos quesos. Sentámonos y empezamos la cata.


Empezamos cola so cerveza Conventin. De color claru, yá que tien pocu lleldu disueltu, el so nome provien d'un míticu chigre cerveceru de La Felguera que desanició va años. Ye una cerveza típica belga, con 6,5%. Sabor dulzuxo. La so cerveza más traicionera, porque esos 6,5% entren solos.


Aitor acompañala del Quesu Taramundi. Quesu famoso n'Asturies por acompañase de nuez y ablanes, Aitor dempués de probalo la primer vegada, propunxo a los sos ellaboradores que-y fixeren una partida especial pa la so tienda ensin nuez nin ablana. Ye un quesu con 15 díes de fermentadura, suave y d'arumes intensos. Ricu.


Siguimos cola Pilxen. Una cerveza rubia tipu lager (la roxa de tola vida) al estilu checu, con un sabor mui suave. Perfeuta pa enfrescase los díes de calor. Con 5%, ye llimpia y tien un llixeru toque d'amargor que-y da'l llúpulu checu.


Cola Pilxen, Quesu Moluengo. D'Albacete. Quesu artesano de lleche crudo de cabra envolubráu con ceniza vexetal, lo que-y da un aspeutu y sabor curiosu. Quesu arumoso y llargu na boca, tien un llixeru picor a la fin. Per bonu.


Finamos la cata cola cerveza Yanky, la so APA (American Pale Ale), al estilu americanu. Una cerveza con arume a llúpulu que lleva 5 vegaes más lúpulu que les anteriores. Llixeru arume a piescu; na boca ye amargosa, pero llixera. La mio favorita de toes.


Yá'l quesu perfeuto, un Gouda Old Amsterdam, quesu mantegoso de lleche de vaca de 18 meses de maduración. Quesu de peralta calidá mundialmente conocíu. Combina un sabor más fuerte xuntu con una testura blanda. Hasta tien un toque cruxente na boca por cuenta los cristales de calciu que se formen mientres la so maduración. Un auténticu lluxazu de quesu.





Finalmente, pudimos tastiar munchos más quesos nuna mesa preciosa qu'Aitor yá'l so equipu preparáronnos. Ehí yá, caún, decidióse pola cerveza (o cerveces) que más-y prestaron, inclusive probemos les otres dos que quedaron por probar, Trigu y Strix.


Presta ver a xente con entamu, con una filosofía clara de lo que quier, ensin anteponer el dineru y los intereses comerciales, y escorriendo el so suañu. Si amás xune a otru apasionáu polos quesos como ye Aitor, entós la combinación yá nos fai la boca agua. Xente de La Felguera trabayando por La Felguera, un lluxazu.



¡Ah! y como primicia podemos cuntavos qu'en curtiu vamos poder esfrutar de los meyores platos en L'Espumeru. Y va ser el primer BrewPub con cocina d'Asturies. Suma y sigue.

0 comentarios :

Publicar un comentario