Taberna Salcedo


Direición: Bermudez de Castro 38, Oviedo / Uviéu
Teléfonu: 984 28 37 49

Calidá: 3/5


Vinatería allugada nel barriu de Teatinos n'Uviéu que dispon de tapes variaes y menús del día pa poder probar la so cocina, tamién destaca qu'entamen xornaes de comida tradicional italiana les cuales yá encamentáronnos delles vegaes, queda pendiente una próxima visita pa probar esa cocina italiana, estes xornaes son la última selmana de cada mes aprovechando l'orixe italianu de la so cocinera Annalisa.

Ye d'una vinatería perbién decorada, un llocal pequenu con una decoración basada en madera que consigue un espaciu bien atopadizu.


Una pena qu'una vinatería na capital d'Asturies nun se promocione'l vinu la tierra, yá lo comentamos en numberoses ocasiones, creemos que se debe de potenciar el consumu del productu llocal y si enriba ta más que reconocíu que tenemos unos vinos de bona calidá que menos que promocionalo dafechu, ye una pena y esperemos que puedan dir incluyendo estos vinos nel futuru yá que ye un atractivu tantu pa la xente paisano como pa los turistes que quieran probar el vinu la zona.


Nesta ocasión fuimos a probar el menú de fin de selmana empezando por una Fabada Asturiana mui correuta, bona calidá del compangu y una faba bien fecha y de bon tamañu, qu'anque nun ye la meyor fabada que probemos (ta'l llistón bien alto) queda nun bon nivel.


Pa siguir unos decidimos por Secretu ibéricu y  otros pola Merluza en mueyu. Dos platos más que correutos, el secretu nel so puntu xusto de sal y xugosidá acompañáu por unes pataques y unos pimientos coloraos, una ración d'un tamañu considerable. La merluza mui rica, el mueyu qu'acompañaba dába-y un sabor amariscáu qu'acompaña perfeutamente.


De postre Flan de quesu, Yogur con mermelada y Cuayada con nueces y miel. Postres caseros perfeutos pa rematar la comida.


Pa beber acompañen el menú con un vinu tinto Palacio del Burgo, un rioja Joven que nun namoró pero déxase beber.


0 comentarios :

Publicar un comentario