Nueva Visita: Llar de Viri

Direición: San Román de Candamu

Teléfonu: 985 828 022

Anterior Visita: http://www.lesfartures.com/2014/11/llar-de-viri.html

Páxina Web: http://www.llardeviri.eu/

Calidá: 4/5

Preciu: 30 €

Comentarios: Como yá comentaba'l nuesu compañeru David na anterior visita, el Llar de Viri ye ún de los principales precursores del movimientu  Slow Food n'Asturies.

Dempués de tolos comentarios que me fixeren sobre la so comida la verdá que díbamos comer con unes mires bien altes, y nun defraudaron. Yeramos 5 persones a comer y queríamos probar un pocu de too asina que tábamos un pocu perdíos ente qué pidir y cantidaes, menos mal que taba Viri p'ayudar y encamentar.

Un tratu encantador, dixímos-y lo que más nos pruyía y ella encárgase de calcular les cantidaes pa que pudiéramos probalo tou, siempres presta un tratu cercano y afayadizu.

Pa empezar pidimos un pastel de puerros, un sabor suave, ye un platu perfeutu pa empezar la comida y compartilo ente dellos, gustando inclusive a la comensal a la que nun-y gusten los puerros, gran empiezu.

Tamién queríamos probar la so famosa Fabada ganadora del premiu a la meyor Fabada del añu 2013, la verdá que taba bien bona, gran calidá del compangu, nótase que ye productu de casa. Anque nesti platu tuvo l'únicu problema del día, pidiéramos al entamu la Fabada'l camareru escaézse-y trayela nel so momentu, colo que la comimos dempués de los segundos platos que vos comentaremos más p'alantre.

Ye un simple erru, y esculpáronse por ello con gran educación, pero claru comete una Fabada cuando yá tas a fartucar fai que nun s'esfrute lo mesmo.

Tamién quiximos probar el Pitu caleya y el Venao. El pitu bien ricu colos sos arbeyinos de la güerta pero difícil superar esi Venao, fechu nel so puntu con gran sabor del so mueyu ye un platu espectacular.

Viri encamentanos un platu de temporada Setes encebollaes con flan d'arroz. vien presentáu como se ve na semeya, ensin entemecer l'arroz coles cogordes.

Nel momentu que s'entemez tou quedó una especie d'arroz meloso con tol sabor d'eses cogordes encebollaes. Personalmente'l platu que más prestó de la comida, sabor a esgaya concentráu nesti platu.

De postre fiximos un esfuerzu y pidimos pa compartir "Arroz con lleche", "Tarta Picapiedra" (Bizcuechu con crema pastelera y almendra) y "Compota de mazana y natielles"

Toos caseros y bien bonos, sorprendióme la compota de mazana y natielles porque nunca oyera esi amiestu y ye perfeuta.

Unos cafés de Pota y unos clines pa esfrutar tranquilamente de la sobremesa.

Pa beber decantiamos por un Pésicu Tintu de Dominiu del Urogallo que nunca falla

Gran comida y salimos encantaos, munches gracies a Viri pol tratu recibíu y cola calidá de la so comida casera. En total pagamos 147 € a estremar ente 5 persones y salimos a españar.