Nueva Visita: Dosmasuno Gastro

Direición: C/ del Carmen 3, Xixón

Teléfonu: 984 05 39 80

Web: http://www.dosmasunogastro.com/

Facebook: https://www.facebook.com/dosmasunogastro

Twitter:       [ @dosmasunogastro ] https://twitter.com/dosmasunogastro

Visites anteriores: 

http://www.lesfartures.com/2014/12/dosmasuno-gastro.html

Calidá: 4/5

Preciu: 35€

Ún de los llocales más de moda, sinón el que más, nel centru Xixón. 

Pa cenar en fin de selmana, convien acutar con díes o inclusive selmanes d'antelación.

Nel  comedor, al tar siempres a tope, y anque nun tien muncha capacidá, y quiciabes pol tipu de techu altu, tiense una llixera impresión de barullu. La xente va alzando la voz, y n'ocasiones cuesta caltener conversaciones. Ye l'únicu pero que podemos atopar a esti fantásticu Gastro Bar.

Esta visita ye de va unos meses, antes de navidá, y ye que volvimos dempués d'enforma tiempu. Tuviéramos al entamu la so andadura y teníamos munches ganes de repetir dellos platos y de probar nueves creaciones. Y comprobemos que siguíen cola mesma calidá y el por qué nos gusta tantu.


Como cortesía, los sos clásicos vasinos con humus y otra crema y unos cayaos de pan pa moyar. Presta:

Puede considerase yá un clásicu estos Bombones de cebolla relleno de chipirón con mueyu de tinta y xengibre. Un pinchu ganador que siempres trunfa. En ración pa compartir:

Los Canelones rellenos de pitu caleya con mazana y llagostinos son puru sabor, con un mueyu que nun perdona:

Y llanzámonos dempués a probar esti Pulpu del pedreru con morciella saltiada y pimientos asaos. Toos coincidimos en que la base de pataca y morciella resulta un puntu ensuga y fai que'l pulpu nun resalte tolo que debiera, anque'l toque los pimientos asaos sí qu'apurre un dulzor interesante. L'únicu platu que tuvo un pocu per debaxo la perfección: 

Esta Presa asturcelta “Gancedo” con picada de frutos secos y frutes sorprendió pol so bon puntu y perfeutu acompañamientu. Como toes los mueyos que cocinen, de moyar y nun parar:

P'adulzar, 100% chocolate (brownie, mousse, cremosu, flan, xeláu...) un postre de chocolate en testures que llama l'atención pola so voluminosa presentación. Pa los chocolateros:

Como non, acompañónos una Sidra Brut Nature Emilio Martínez. Encántanos que s'empiece a establecer la sidra de mesa que tan bien acompaña esti tipu de propuestes.


Pa 4, tocamos a unos 30€ por persona, con una botella de sidra, agua y cafés. Meyor, imposible.