Restaurante V. Crespo

Direición: C/ del periodista Adeflor, 3, Xixón

Teléfonu: 985 34 74 88

Web: http://www.restaurantevcrespo.com/

Calidá: 3/5

Preciu: 40€


Un clásicu de Xixón que teníamos ganes de probar y aprovechamos un menú promocional con maridaxe pa ello.

Vicente Crespo fundóse nel 1994, y tando agora centráu nel so nuevu Bömarzo, esti lo lleva'l so fíu.

Lo primeru que llama l'atención na so barra en forma de cascu de barcu, que da entrada a un comedor clásicu, ensin vistes a esteriores, decoráu al más puru estilu marineru.

Empezamos con unes Mini Croquetes de Xamón Ibéricu maridaes con Finu. Bones croquetes con sabor anque nun nos peguen enforma les pataques paya qu'acompañaben:

Dempués, una Ensalada de Coríu, Vinagreta de Pases y Piñones maridada tamién con Finu. Demasiada llechuga pal nuesu gustu, pero bona vinagreta col coríu:

Siguimos con unos Raviolis de Llagostinos y Crema de Oricios maridaos con Vinu Espumosu. Escelente ravioli y magnífica crema. Nun quedó nada. Platazu. Ensin dulda, el meyor de la nueche:

Siguimos con un Llombu de Bacaláu Alioli maridáu con Vinu Blancu, per bonu y eso que'l bacaláu nun ye de los nuesos pexes favoritos. Nel so puntu con un alioli esquisitu.

Y unos Medallones de Venao, Castañes y Boletus Edulis maridáu con Vinu Tintu. Bon puntu y per bon sabor:

Rematamos con un Sorbete de Llimón que prestó enforma. Nunca camudáramos del segundu al postre con un sorbete, más habitual ente pexe y carne. Pero taba buenísimo. Testura perfeuta y bien refrescante.

Y como postre un Coulant de Chocolate y Frutos Coloraos maridáu con Moscatel. Más que correutu, anque yá nos costó finalo:

Bon restorán nel centru de Xixón, con bon productu, per bona cocina y escelente atención. Paga  la pena conocelo.