Publicidá

Blog Archive

Contact Me

Nombre

Correo electrónico

Mensaje

Hover Setting

default

Casa Zulima


Direición: Caliao (Parque Natural de Redes) - Casu
Teléfonu: 985 612 834 - 615 693 804


http://www.casazulima.com/
https://www.facebook.com/casazulima


Recomendaciones: Cabritu. Va ser complicáu d'escaecer


Calidá: 3/5
Preciu: 17€


Comentarios: Retomamos les Farturrutes. Esta vegada diriximos a la parte los Arrudos, en Casu, una de les maravíes asturianes nel Parque Natural de Redes. Como la ruta hasta'l Llagu Ubales diba llevanos abondo, llegamos hasta la Fuentona (qu'abastecía d'antiguo les agües de Xixón). Ye un percorríu d'una belleza impresionante.


A la vuelta, y dempués de facer sesión de semeyes a les cerveces artesanes de moda asturianes, fuimos comer en Casa Zulima.

Caliao ye un pueblu preciosu asturianu, con un ambiente rural y unes vistes precioses. Mui recomendable una visita y dase un paséu peles sos cais. Amás hai bona carretera pa llegar.

Metanes Caliao atópase Casa Zulima. asitiada nuna mini plaza onde puede tase fuera tomando daqué tranquilamente. El restorán estremase'n zona de barra con meses y dos salones tras, ún con chimenea que tien que ser una gociada d'esfrutar pel hibiernu.

Nós acutamos porque suel haber xente abondo de fin de selmana, pero'l día que fuimos había sitiu de sobra. Tamién ye ciertu que llegamos de la ruta a les 15:00h.


Comimos 6 persones y pidimos un pocu de too pa probar. La so cocina ye tradicional asturiana con productos de la zona. Sobremanera la fabada y la carne.



Empezamos pola Fabada. Indicáronnos que ye una ración pa dos persones, pero esi platu comelu una persona ensin problema. La fabada taba perrica, nel so puntu, pa mi, la faba tenía la piel un pocu gorda pero'l compangu taba realmente espectacular.



Ensalada Mista. Bona ración de llechuga casera con bonos llombos de ventresca.


Siguimos pol Bacaláu con Fritada. Mui, mui ricu. Bona ración, con un bacaláu suave qu'entraba solo. Acompañáu d'unes pataques.


Fora de carta encamentáronnos el Cachopu, ricu y xugosu, con bon rellenu y bona selección de xata. Pa mi gustu ta un pelín pasao, pero caltien perbién el sabor. Vien acompañáu d'unos pimientos y unes pataques.


Pidimos Picadiellu con Güevu y Pataques, impresionante, picantín, con un güevu de casa


Anque'l dueñu nun lo creía, porque pensaba que díbamos españar, pidimos Cabritu Guisao, y foi un aciertu. El nivel de restu de la comida taba altu, pero'l Cabritu foi lo meyor ensin dulda. Espectacular. Tienru, xugosu, bona cantidá.

A esti altor de la comida yá tábamos a puntu d'españar, pero nun podíamos colar ensin probar los postres.


Quesu Casín con Dulce. Como nun podía ser d'otra manera, en Casu hai que tomar el Quesu Casín, quesu llocal de lleche de vaca entera, ensin pasteurizar, con un sabor y golor fuerte que fai les delicies de los queseros. Puntazu lo d'acompañalo con dulce.


Tarta de Quesu. Ye más bien un flan. Suave y ricu, y con una testura maraviyosa.


Como podéis comprobar, la carta indica si'l platu tien gluten y lácteos. Un aciertu.


Bebimos Vinu Cosechero con Casera y Agua.

Con Cafés y Clines, pagamos 99,40€. Mui, mui baratu.


Caliao ye un gran sitiu p'afayar, y Casa Zulima un gran conservador de la cocina tradicional asturiana.


No hay comentarios

Publicar un comentario