Restaurante Cucharas



La carta estremáse'n tapes y platos. Unes más pa picar y los otros más contundentes onde caben ensalaes, arroces, pexes y carnes. Como nos indicaron, dambes alternatives pueden compartise.

Asina que pidimos un par de tapes pa empezar, y un pexe pa compartir.


Pa beber, un Martín Códax que, n'ausencia dalguna referencia asturiana, bien en forma de vinu o sidra Brut, ye'l meyor blancu que teníen. Mayor variedá y calidá nos tintos.




Na espera, una Crema de Verdures y Garbanzos mui sabrosa:




Empezamos con unes  Brochetes Restallaes de Llangostinos. Una tapa simple pero que siempres funciona pa empezar. Enartaos en palos de brocheta preparaos pa dir moyando nel mueyu qu'acompañaba:




La Fayuela “Ástur-Mex” gustónos enforma. Col so guacamole, un puntu picante ensin pasase, y una bona presentación:




Y esti Salmón Confitáu con Crema Llimón. Gran detalle'l emplatáu individual cuando pidimos un pexe pa compartir. Colorida presentación. El salmón taba bien bonu, anque un pelín pasáu de puntu col que nos suel prestar. Sutil puntu de llimón na crema. Tou sobre un puré de pataca que quiciabes ye lo que faía un pocu más seco al salmón. Pero polo xeneral, bon platu:




Como nos llamaron l'atención 2 postres y ún paecía más llixeru, decidimos a pidir dambos.

La Tarta de Quesu y Llimón llamaba l'atención porque nunca probáramos esta combinación. Y qué sorpresa. Taba perrica ensin ser duce por demáis. El toque de llimón bien llixeru, ensin matar al quesu:




Y un Sorbete de Mojito que foi lo meyor de la nueche. Un auténticu mojito cremosu. Una pasada:




El total de 61€ paeciónos más qu'afecho:





Quedamos con ganes de dellos platos qu'había na carta, asina que vamos tener que volver a esti Cucharas que tien muncho potencial y que de xuru va tener ésitu a esgaya.

0 comentarios :

Publicar un comentario